ಲಖನೌ, 24 ಡಿಸೆಂಬರ್ (ಹಿ.ಸ.);
ಆ್ಯಂಕರ್:
ಉತ್ತರ ಪ್ರದೇಶದ ರಾಜಧಾನಿ ಲಖನೌನ ಉರ್ಮಿಲಾ ಉದ್ಯಾನದಲ್ಲಿ ನಡೆಯುತ್ತಿದ್ದ ಭಾರೀ ಜನಸಭೆಯಲ್ಲಿ ಅಂದಿನ ಜನನಾಯಕ ಅಟಲ್ ಬಿಹಾರಿ ವಾಜಪೇಯಿ ಭಾಷಣ ಮಾಡುತ್ತಿದ್ದರು. ಅಚಾನಕ್ ಮೈಕ್ನಲ್ಲಿ ಆಕಾಶವಾಣಿ ಪ್ರಸಾರ ಕ್ಯಾಚ್ ಆಗಿ ಅಡಚಣೆ ಉಂಟಾಯಿತು. ಸಭೆಯಲ್ಲಿ ಕೂತಿದ್ದ ಜನರು ‘ಧ್ವನಿ ಸರಿಪಡಿಸಿ’ ಎಂದು ಕೂಗತೊಡಗಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಅಟಲ್ಜಿ, ಜನರನ್ನು ಶಾಂತಗೊಳಿಸುತ್ತಾ, “ನನ್ನ ಧ್ವನಿ ನಿಮಗೆ ಸ್ಪಷ್ಟವಾಗಿ ಕೇಳಿಸುತ್ತಿದೆಯೇ?” ಎಂದು ಪ್ರಶ್ನಿಸಿದರು. ಜನಸಮೂಹದಿಂದ “ಹೌದು, ಹೌದು” ಎಂಬ ಉತ್ತರ ಬಂದಿತು.
ಅದಕ್ಕೆ ತಕ್ಷಣವೇ ಅಟಲ್ಜಿ ನಗುನಗುತ್ತಲೇ, “ಹಾಗಾದರೆ ಒಂದು ಕಿವಿಯಲ್ಲಿ ಆಲ್ ಇಂಡಿಯಾ ರೇಡಿಯೋ ಕೇಳಿ, ಮತ್ತೊಂದು ಕಿವಿಯಲ್ಲಿ ನನ್ನ ಭಾಷಣ ಕೇಳಿ” ಎಂದು ಹೇಳಿದರು. ಈ ಮಾತಿನೊಂದಿಗೆ ಸಭೆ ಸಂಪೂರ್ಣ ಶಾಂತಗೊಂಡಿತು. ಅದೇ ಕ್ಷಣದಲ್ಲಿ ಆಕಾಶವಾಣಿ ಕ್ಯಾಚಿಂಗ್ ಸಹ ನಿಂತುಹೋಯಿತು. ಈ ಸ್ಮರಣೀಯ ಘಟನೆೆಯನ್ನು ಅಟಲ್ಜಿಯ ಆಪ್ತ ಸ್ನೇಹಿತ ಹಾಗೂ ಭಾರತೀಯ ನಾಗರಿಕ ಪರಿಷತ್ತಿನ ಅಧ್ಯಕ್ಷರಾದ ಚಂದ್ರಪ್ರಕಾಶ್ ಅಗ್ನಿಹೋತ್ರಿ ಅವರು ಹಿಂದೂಸ್ಥಾನ್ ಸಮಾಚಾರ ಸುದ್ದಿ ಸಂಸ್ಥೆಯೊಂದಿಗೆ ಹಂಚಿಕೊಂಡಿದ್ದಾರೆ.
ಅಗ್ನಿಹೋತ್ರಿ ಅವರು ಮತ್ತೊಂದು ಸಂದರ್ಭವನ್ನು ನೆನಪಿಸಿಕೊಂಡು ಮಾತನಾಡಿ, ಸ್ವರ್ಗೀಯ ರಾಮಪ್ರಕಾಶ್ ಗುಪ್ತ ಅವರು ಭಾರತೀಯ ಜನಸಂಘದ ಉತ್ತರ ಪ್ರದೇಶ ಅಧ್ಯಕ್ಷರಾಗಿದ್ದ ಕಾಲದಲ್ಲಿ ಅಟಲ್ಜಿ ಲಖನೌಗೆ ಆಗಮಿಸಿದ್ದರು. ಅವರು ಹಿಂಭಾಗದ ವರಾಂಡದಲ್ಲಿ ಕುಳಿತಿದ್ದರು. ಆ ವೇಳೆ ಮಾಜಿ ಶಾಸಕ ಭಗವತಿ ಶುಕ್ಲ ಅವರೊಂದಿಗೆ ಅಟಲ್ಜಿಯನ್ನು ಭೇಟಿ ಮಾಡಲು ನಾವು ಅಲ್ಲಿಗೆ ಹೋದಾಗ, ಭಗವತಿ ಶುಕ್ಲ ಅವರು ಉತ್ತರ ಪ್ರದೇಶ ಜನಸಂಘದ ಸಂಘಟನೆ ಕುರಿತು ಚರ್ಚೆ ಆರಂಭಿಸಿದರು. ಅದಕ್ಕೆ ತಕ್ಷಣವೇ ಅಟಲ್ಜಿ, “ಭಗವತಿ, ನಿಲ್ಲಿ” ಎಂದು ಹೇಳಿ, ರಾಮಪ್ರಕಾಶ್ ಗುಪ್ತರಿಗೆ ಕರೆಸಿಕೊಂಡರು.
ರಾಮಪ್ರಕಾಶ್ ಅವರು ಕುರ್ಚಿಯಲ್ಲಿ ಕುಳಿತ ನಂತರ ಅಟಲ್ಜಿ ಸ್ಪಷ್ಟವಾಗಿ ಹೇಳಿದರು, “ಸಂಘಟನೆಯ ವಿಚಾರವನ್ನು ಮುಖಾಮುಖಿಯಾಗಿ ಚರ್ಚಿಸಬೇಕು. ಬೆನ್ನೆದುರು ಚರ್ಚೆ ನನಗೆ ಇಷ್ಟವಿಲ್ಲ.” ಅಟಲ್ಜಿ ಯಾವತ್ತೂ ಪಾರದರ್ಶಕತೆ ಮತ್ತು ನೇರ ಸಂವಾದಕ್ಕೆ ಮಹತ್ವ ನೀಡುತ್ತಿದ್ದ ನಾಯಕರೆಂದು ಅಗ್ನಿಹೋತ್ರಿ ವಿವರಿಸಿದರು.
ಪಕ್ಷದ ಕಾರ್ಯಕರ್ತರನ್ನು ಭೇಟಿ ಮಾಡುವಾಗಲೂ ಅಥವಾ ವಿಶೇಷ ಸಂದರ್ಭಗಳಲ್ಲಿ ಸ್ವತಃ ಯಾರಾದರೂ ಮನೆಗೆ ಹೋಗುವಾಗಲೂ, ಅಟಲ್ಜಿ ಆ ಮನೆಯ ಸದಸ್ಯರೇ ಎಂಬ ಭಾವ ಮೂಡಿಸುತ್ತಿದ್ದರು. ಚಂದ್ರಪ್ರಕಾಶ್ ಅಗ್ನಿಹೋತ್ರಿ ಅವರು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಹಿರಿಯ ಕಾರ್ಯಕರ್ತರಾಗಿದ್ದು, ಲಖನೌನ ಡಾಲೀಗಂಜ್ ಪ್ರದೇಶದಲ್ಲಿ ವಾಸಿಸುತ್ತಿದ್ದಾರೆ. ಅಟಲ್ಜಿಯೊಂದಿಗಿನ ತಮ್ಮ ಆತ್ಮೀಯ ಸಂಬಂಧಗಳನ್ನು ನೆನಪಿಸಿಕೊಳ್ಳುವಾಗ ಅವರು ಭಾವುಕರಾಗುತ್ತಾರೆ.
‘ಸುಂದರ್ ಸೌಂಡ್ ಸರ್ವಿಸ್’ ಎಂಬ ಹೆಸರಿನ ಸೌಂಡ್ ವ್ಯವಸ್ಥೆಯ ಅಂಗಡಿಯನ್ನು ಅಗ್ನಿಹೋತ್ರಿ ಅವರು ನಡೆಸುತ್ತಿದ್ದರು. ಲಖನೌನ ಬಹುತೇಕ ದೊಡ್ಡ ಕಾರ್ಯಕ್ರಮಗಳಲ್ಲಿ ಅವರ ಸೌಂಡ್ ಸರ್ವಿಸ್ ಬಳಕೆಯಾಗುತ್ತಿದ್ದು, ಅನೇಕ ಐತಿಹಾಸಿಕ ಸಭೆಗಳಿಗೂ ಅದೇ ಸಾಕ್ಷಿಯಾಗಿತ್ತು.
---------------
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
