ನವದೆಹಲಿ, 27 ಸೆಪ್ಟೆಂಬರ್ (ಹಿ.ಸ.):
ಆ್ಯಂಕರ್:ದೇಶದಲ್ಲಿ ಹೈಡ್ರೋಜನ್ ರೈಲಿನ ಬಳಿಕ ರೈಲು ಸಾರಿಗೆಯನ್ನು ಮತ್ತಷ್ಟು ಸ್ವಚ್ಛ ಹಾಗೂ ಇಂಧನ ದಕ್ಷಗೊಳಿಸುವ ನಿಟ್ಟಿನಲ್ಲಿ ಭಾರತೀಯ ರೈಲ್ವೆ ಮತ್ತೊಂದು ಮಹತ್ವದ ಹೆಜ್ಜೆ ಇಡುತ್ತಿದೆ. ದೇಶದ ಮೊದಲ ಎಲ್ಎನ್ಜಿ (ದ್ರವೀಕೃತ ನೈಸರ್ಗಿಕ ಅನಿಲ) ಆಧಾರಿತ ರೈಲು ಇಂದು ಸಂಚಾರ ಆರಂಭಿಸಲಿದೆ. ಕೇಂದ್ರ ಗೃಹ ಹಾಗೂ ಸಹಕಾರ ಸಚಿವ ಅಮಿತ್ ಶಾ ಅವರು ಗುಜರಾತ್ನ ಸಾಬರಮತಿಯಲ್ಲಿ ರೈಲಿಗೆ ಹಸಿರು ನಿಶಾನೆ ತೋರಿಸಲಿದ್ದಾರೆ.
ಈ ಸಂದರ್ಭದಲ್ಲಿ ಅಮಿತ್ ಶಾ ಅವರು ಸಾಬರಮತಿಯಲ್ಲಿ ₹1,542 ಕೋಟಿಗೂ ಅಧಿಕ ಮೊತ್ತದ ವಿವಿಧ ರೈಲು ಯೋಜನೆಗಳಿಗೆ ಚಾಲನೆ, ಶಿಲಾನ್ಯಾಸ ಹಾಗೂ ಲೋಕಾರ್ಪಣೆ ನೆರವೇರಿಸಲಿದ್ದಾರೆ. ಸುಮಾರು ₹700 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾಗಿರುವ ಡಬ್ಲ್ಯೂಎಜಿ-12 ಎಂಜಿನ್ ನಿರ್ವಹಣಾ ಶೆಡ್ ಉದ್ಘಾಟನೆಯೂ ಇದರಲ್ಲಿ ಸೇರಿದೆ.
ರೈಲ್ವೆ ಪ್ರಕಾರ, ಈ ವ್ಯವಸ್ಥೆ ಅಳವಡಿಸುವುದರಿಂದ ಡೀಸೆಲ್ ಬಳಕೆಯಲ್ಲಿ ಶೇ.40ರವರೆಗೆ ಇಳಿಕೆಯಾಗುವ ನಿರೀಕ್ಷೆಯಿದೆ. ಇದರಿಂದ ಇಂಧನ ವೆಚ್ಚ ಕಡಿಮೆಯಾಗುವುದರ ಜೊತೆಗೆ ಇಂಗಾಲದ ಡೈಆಕ್ಸೈಡ್, ಸಾರಜನಕ ಆಕ್ಸೈಡ್ ಹಾಗೂ ಸೂಕ್ಷ್ಮ ಕಣಗಳ ಹೊರಸೂಸುವಿಕೆಯೂ ಕಡಿಮೆಯಾಗಲಿದೆ.
ಸಾಬರಮತಿ ಸಮಗ್ರ ಕೋಚಿಂಗ್ ಡಿಪೋದ ತಲಾ 1,400 ಅಶ್ವಶಕ್ತಿ ಸಾಮರ್ಥ್ಯದ ಎರಡು ಚಾಲನಾ ವಿದ್ಯುತ್ ಬೋಗಿಗಳನ್ನು ಎಲ್ಎನ್ಜಿ-ಡೀಸೆಲ್ ದ್ವಿ-ಇಂಧನ ವ್ಯವಸ್ಥೆಗೆ ಪರಿವರ್ತಿಸಲಾಗಿದೆ. ಈ ಎರಡು ಚಾಲನಾ ಬೋಗಿಗಳನ್ನು ಎಂಟು ಬೋಗಿಗಳ ರೈಲು ಸಂಚಾರಕ್ಕೆ ಬಳಸಲಾಗುತ್ತದೆ.
ಪ್ರತಿ ಎಂಜಿನ್ನಿಂದ ವಾರ್ಷಿಕ ಸುಮಾರು ₹11.9 ಲಕ್ಷ ಉಳಿತಾಯವಾಗುವ ನಿರೀಕ್ಷೆಯಿದೆ. ಎರಡು ಎಂಜಿನ್ಗಳ ಮೂಲಕ ಒಟ್ಟು ವಾರ್ಷಿಕ ಉಳಿತಾಯ ಸುಮಾರು ₹23.9 ಲಕ್ಷವಾಗಲಿದೆ. ಸಾಂಪ್ರದಾಯಿಕ ಡೀಸೆಲ್ ಎಂಜಿನ್ನ ಶಕ್ತಿ, ವಿಶ್ವಾಸಾರ್ಹತೆ ಹಾಗೂ ಕಾರ್ಯಾಚರಣಾ ಸಾಮರ್ಥ್ಯವನ್ನು ಉಳಿಸಿಕೊಳ್ಳುವ ರೀತಿಯಲ್ಲಿ ಈ ವ್ಯವಸ್ಥೆಯನ್ನು ವಿನ್ಯಾಸಗೊಳಿಸಲಾಗಿದೆ.
ಎಂಜಿನ್ ಎಲ್ಎನ್ಜಿ ಮತ್ತು ಡೀಸೆಲ್ ಎರಡರಲ್ಲೂ ಕಾರ್ಯನಿರ್ವಹಿಸಬಲ್ಲದು. ಅಗತ್ಯಕ್ಕೆ ಅನುಗುಣವಾಗಿ ಎರಡೂ ಇಂಧನಗಳ ನಡುವೆ ಬದಲಾಯಿಸಬಹುದು. ಯಾವುದೇ ಸ್ಥಳದಲ್ಲಿ ಎಲ್ಎನ್ಜಿ ಲಭ್ಯವಿಲ್ಲದಿದ್ದರೆ ರೈಲನ್ನು ಡೀಸೆಲ್ನಲ್ಲೇ ಸಂಚರಿಸಬಹುದಾಗಿದೆ. ಇದರಿಂದ ಇಂಧನ ಲಭ್ಯತೆಗೆ ಸಂಬಂಧಿಸಿದ ಸಮಸ್ಯೆಗಳಿಂದಾಗಿ ದೂರದ ರೈಲು ಸಂಚಾರಕ್ಕೆ ಅಡಚಣೆಯಾಗುವ ಸಾಧ್ಯತೆ ಕಡಿಮೆಯಾಗಲಿದೆ.
--------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
