ನವದೆಹಲಿ, 08 ಜುಲೈ (ಹಿ.ಸ.):

ಆ್ಯಂಕರ್:

ವೆನೆಜುವೆಲಾದಲ್ಲಿ ಭೂಕಂಪ ಸಂತ್ರಸ್ತರಿಗೆ ಮಾನವೀಯ ನೆರವು ಮತ್ತು ವೈದ್ಯಕೀಯ ಸೇವೆ ಒದಗಿಸಲು ಭಾರತೀಯ ಸೇನೆ ಕೈಗೊಂಡಿದ್ದ ‘ಆಪರೇಷನ್ ಅಮಿಸ್ಟಾಡ್’ ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, 41 ಸದಸ್ಯರ ಭಾರತೀಯ ಸೇನಾ ವೈದ್ಯಕೀಯ ತಂಡ ಭಾರತಕ್ಕೆ ಮರಳಲು ಆರಂಭಿಸಿದೆ.

ದಕ್ಷಿಣ ಅಮೆರಿಕದ ಉತ್ತರ ಭಾಗದಲ್ಲಿ ಸಂಭವಿಸಿದ ಎರಡು ಪ್ರಬಲ ಭೂಕಂಪಗಳ ಬಳಿಕ ಭಾರತವು ಜೂನ್ 26ರಂದು ವಿಶೇಷ ಸಂಯೋಜಿತ ಕಾರ್ಯಪಡೆ (ಕಾಂಪೋಸಿಟ್ ಟಾಸ್ಕ್ ಫೋರ್ಸ್)ಯನ್ನು ವೆನೆಜುವೆಲಾಗೆ ಕಳುಹಿಸಿತ್ತು. ಜೂನ್ 28ರೊಳಗೆ ಕಾರಕಾಸ್‌ನ ಲಾ ರಿಂಕೊನಾಡಾ ಪ್ರದೇಶದಲ್ಲಿ ಸಂಪೂರ್ಣ ಕಾರ್ಯನಿರ್ವಹಿಸುವ ತಾತ್ಕಾಲಿಕ ಕ್ಷೇತ್ರ ಆಸ್ಪತ್ರೆಯನ್ನು ಸ್ಥಾಪಿಸಲಾಗಿತ್ತು.

ಆಗ್ರಾದ 60 ಪ್ಯಾರಾ ಫೀಲ್ಡ್ ಆಸ್ಪತ್ರೆಯಿಂದ ನಿಯೋಜಿಸಲಾದ 41 ಸದಸ್ಯರ ವೈದ್ಯಕೀಯ ತಂಡವು ಸುಮಾರು ಎರಡು ವಾರಗಳ ಕಾಲ ಸ್ಥಳೀಯ ಆಡಳಿತದೊಂದಿಗೆ ಸಮನ್ವಯ ಸಾಧಿಸಿ ಕಾರ್ಯನಿರ್ವಹಿಸಿತು. ಈ ಅವಧಿಯಲ್ಲಿ ಭೂಕಂಪದಿಂದ ತೊಂದರೆಗೊಳಗಾದ 1,900ಕ್ಕೂ ಹೆಚ್ಚು ಜನರಿಗೆ ತುರ್ತು ಚಿಕಿತ್ಸೆ, ಗಂಭೀರ ಆರೈಕೆ, ಆಘಾತ ನಿರ್ವಹಣೆ ಹಾಗೂ ಶಸ್ತ್ರಚಿಕಿತ್ಸೆ ಸೇರಿದಂತೆ ಅಗತ್ಯ ವೈದ್ಯಕೀಯ ಸೇವೆಗಳನ್ನು ಒದಗಿಸಿತು. ಜೊತೆಗೆ ಸ್ಥಳೀಯ ವೈದ್ಯಾಧಿಕಾರಿಗಳ ಬಳಕೆಗೆ ಎರಡು ಸುಧಾರಿತ ಪೋರ್ಟಬಲ್ ತುರ್ತು ವೈದ್ಯಕೀಯ ವ್ಯವಸ್ಥೆಗಳನ್ನೂ ನಿಯೋಜಿಸಿತು.

ಈ ಕಾರ್ಯಾಚರಣೆಗೆ ಭಾರತೀಯ ವಾಯುಪಡೆಯು ಮಹತ್ವದ ಬೆಂಬಲ ನೀಡಿತು. ಎರಡು ಸಿ-17 ಗ್ಲೋಬ್‌ಮಾಸ್ಟರ್ ವಿಮಾನಗಳ ಮೂಲಕ 35 ಟನ್‌ಗಿಂತ ಹೆಚ್ಚಿನ ವೈದ್ಯಕೀಯ ಸಾಮಗ್ರಿ, ಪರಿಹಾರ ವಸ್ತುಗಳು ಹಾಗೂ ಎರಡು ಪೋರ್ಟಬಲ್ ಆಸ್ಪತ್ರೆ ಘಟಕಗಳನ್ನು ವೆನೆಜುವೆಲಾಗೆ ತಲುಪಿಸಲಾಯಿತು.

ಭೂಕಂಪದಿಂದ ಭಾರೀ ಪ್ರಮಾಣದ ಜೀವಹಾನಿ, ಗಾಯಗಳು ಮತ್ತು ಆಸ್ತಿಪಾಸ್ತಿಗೆ ನಷ್ಟ ಉಂಟಾದ ಹಿನ್ನೆಲೆಯಲ್ಲಿ ಭಾರತವು ಮಾನವೀಯ ನೆರವಿನ ಸಂಕೇತವಾಗಿ ‘ಆಪರೇಷನ್ ಅಮಿಸ್ಟಾಡ್’ ಆರಂಭಿಸಿತ್ತು. ಅನುಭವಿ ವೈದ್ಯರು ಹಾಗೂ ರಕ್ಷಣಾ ಸಿಬ್ಬಂದಿಯನ್ನು ಒಳಗೊಂಡ ಭಾರತೀಯ ತಂಡವು ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆ, ತುರ್ತು ವೈದ್ಯಕೀಯ ಸೇವೆ ಹಾಗೂ ಪರಿಹಾರ ಕಾರ್ಯಗಳಲ್ಲಿ ವೆನೆಜುವೆಲಾ ಅಧಿಕಾರಿಗಳೊಂದಿಗೆ ಕೈಜೋಡಿಸಿತ್ತು.

ಸುಮಾರು ಎರಡು ವಾರಗಳ ಯಶಸ್ವಿ ಸೇವೆಯ ಬಳಿಕ ಭಾರತೀಯ ಸೇನೆಯ ವೈದ್ಯಕೀಯ ತಂಡ ಹಂತ ಹಂತವಾಗಿ ಭಾರತಕ್ಕೆ ಮರಳುತ್ತಿದೆ. ಭೂಕಂಪ ಸಂತ್ರಸ್ತರ ನೆರವಿಗೆ ಭಾರತ ಸದಾ ಬದ್ಧವಾಗಿರುತ್ತದೆ ಎಂದು ಭಾರತೀಯ ಸೇನೆ ತಿಳಿಸಿದೆ.

---------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.