ಬೆಂಗಳೂರು, 17 ಜುಲೈ (ಹಿ.ಸ.):

ಆ್ಯಂಕರ್:

ಅಡುಗೆ ಪ್ರಿಯರ ನಡುವೆ ಇತ್ತೀಚೆಗೆ ದಹಿ ತಡ್ಕಾ ವಿಶೇಷ ಜನಪ್ರಿಯತೆ ಗಳಿಸಿದೆ. ಕೇವಲ ಐದು ನಿಮಿಷಗಳಲ್ಲಿ ಸಿದ್ಧವಾಗುವ ಈ ಖಾದ್ಯ ರುಚಿಕರವಾಗಿರುವುದರ ಜೊತೆಗೆ ಪೌಷ್ಟಿಕವೂ ಆಗಿದೆ. ದಪ್ಪ ಮೊಸರು, ಈರುಳ್ಳಿ, ಟೊಮೇಟೊ, ಬೆಳ್ಳುಳ್ಳಿ, ಶುಂಠಿ ಹಾಗೂ ಸುವಾಸನೆಯ ತಡ್ಕಾ ಇದರ ವಿಶೇಷತೆ.

ಮೊದಲು ದಪ್ಪ ಮೊಸರಿಗೆ ಉಪ್ಪು, ಅರಿಶಿನ ಮತ್ತು ಕೆಂಪು ಮೆಣಸಿನ ಪುಡಿ ಸೇರಿಸಿ ಚೆನ್ನಾಗಿ ಕಲಸಿಕೊಳ್ಳಬೇಕು. ನಂತರ ಬಾಣಲೆಯಲ್ಲಿ ತುಪ್ಪ ಅಥವಾ ಎಣ್ಣೆ ಬಿಸಿ ಮಾಡಿ ಸಾಸಿವೆ, ಜೀರಿಗೆ ಹಾಗೂ ಹಿಂಗು ಹಾಕಿ ಒಗ್ಗರಣೆ ಮಾಡಬೇಕು. ಬಳಿಕ ಒಣ ಕೆಂಪು ಮೆಣಸಿನಕಾಯಿ, ಕರಿಬೇವಿನ ಎಲೆ, ಬೆಳ್ಳುಳ್ಳಿ ಮತ್ತು ಶುಂಠಿ ಹಾಕಿ ಹುರಿಯಬೇಕು. ಈರುಳ್ಳಿಯನ್ನು ಬಂಗಾರದ ಬಣ್ಣ ಬರುವವರೆಗೆ ಹುರಿದು, ನಂತರ ಟೊಮೇಟೊ ಮತ್ತು ಹಸಿಮೆಣಸಿನಕಾಯಿ ಸೇರಿಸಿ ಮೃದುವಾಗುವಂತೆ ಬೇಯಿಸಬೇಕು.

ಕೊನೆಯಲ್ಲಿ ಉರಿಯನ್ನು ಕಡಿಮೆ ಮಾಡಿ ಮೊಸರಿನ ಮಿಶ್ರಣವನ್ನು ಸೇರಿಸಿ ಒಂದು ಅಥವಾ ಎರಡು ನಿಮಿಷ ನಿಧಾನವಾಗಿ ಕಲಸಬೇಕು. ಮೊಸರು ಕುದಿಯದಂತೆ ಎಚ್ಚರಿಕೆ ವಹಿಸಬೇಕು. ಬಳಿಕ ಕೊತ್ತಂಬರಿ ಸೊಪ್ಪು ಹಾಕಿ ಅಲಂಕರಿಸಿದರೆ ರುಚಿಕರವಾದ ದಹಿ ತಡ್ಕಾ ಸವಿಯಲು ಸಿದ್ಧವಾಗುತ್ತದೆ.

ಈ ಖಾದ್ಯವನ್ನು ಬಿಸಿ ಅನ್ನ, ಜೀರಿಗೆ ಅನ್ನ ಅಥವಾ ರೊಟ್ಟಿಯೊಂದಿಗೆ ಸೇವಿಸಿದರೆ ಅತ್ಯುತ್ತಮ ರುಚಿ ನೀಡುತ್ತದೆ. ಹುಳಿ ಕಡಿಮೆ ಇರುವ ತಾಜಾ ಮೊಸರು ಬಳಸಿದರೆ ಇನ್ನಷ್ಟು ಸವಿಯಾಗುತ್ತದೆ. ತುಪ್ಪದಲ್ಲಿ ತಡ್ಕಾ ಮಾಡಿದರೆ ಸುವಾಸನೆ ಮತ್ತು ರುಚಿ ಹೆಚ್ಚಾಗುತ್ತದೆ. ಸರಳ ಪದಾರ್ಥಗಳಿಂದ ಕ್ಷಣಾರ್ಧದಲ್ಲಿ ಸಿದ್ಧವಾಗುವ ಈ ದಹಿ ತಡ್ಕಾ ಮನೆಮಂದಿಯ ಮೆಚ್ಚಿನ ಖಾದ್ಯವಾಗಬಹುದು.

---------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.