ನವದೆಹಲಿ, 08 ಮೇ (ಹಿ.ಸ.) :

ಆ್ಯಂಕರ್ : ಇತ್ತೀಚೆಗೆ ಪೂರ್ಣಗೊಂಡ ಐದು ರಾಜ್ಯಗಳ ವಿಧಾನ ಸಭಾ ಚುನಾವಣೆಗಳು ಹಾಗೂ ಐದು ರಾಜ್ಯಗಳ ಏಳು ವಿಧಾನ ಸಭಾ ಕ್ಷೇತ್ರಗಳಿಗೆ ನಡೆದ ಉಪಚುನಾವಣೆಗಳಿಗೆ ಸಂಬಂಧಿಸಿದಂತೆ ಚುನಾವಣಾ ಆಯೋಗವು ದಾಖಲೆಯ ಸಮಯದಲ್ಲಿ ಸೂಚ್ಯಂಕ ಕಾರ್ಡ್ ಮತ್ತು ಅಂಕಿ-ಅಂಶಗಳ ಸಮಗ್ರ ವರದಿಗಳನ್ನು ಪ್ರಕಟಿಸಿದೆ. ಪಾರದರ್ಶಕತೆ ಮತ್ತು ತ್ವರಿತ ಮಾಹಿತಿಯ ಲಭ್ಯತೆಯಲ್ಲಿ ಇದು ಮಹತ್ವದ ಹೆಜ್ಜೆಯಾಗಿದೆ ಎಂದು ಆಯೋಗ ತಿಳಿಸಿದೆ.

ಆಯೋಗದ ಮಾಹಿತಿ ಪ್ರಕಾರ, ಎಲ್ಲ 830 ವಿಧಾನ ಸಭಾ ಕ್ಷೇತ್ರಗಳಿಗೆ ಸಂಬಂಧಿಸಿದ ದತ್ತಾಂಶವನ್ನು ಸಾರ್ವಜನಿಕ ಬಳಕೆಗೆ ಲಭ್ಯವಾಗುವಂತೆ ಮಾಡಲಾಗಿದೆ. ಅಭ್ಯರ್ಥಿಗಳ ವಿವರಗಳು, ಮತದಾರರ ಸಂಖ್ಯೆ, ಮತ ಚಲಾಯಿಸಿದವರ ಮಾಹಿತಿ, ಮತ ಎಣಿಕೆ ವಿವರಗಳು, ಪಕ್ಷವಾರು ಮತ ಹಂಚಿಕೆ ಮತ್ತು ಅಭ್ಯರ್ಥಿವಾರು ಫಲಿತಾಂಶಗಳನ್ನು ಸೂಚ್ಯಂಕ ಕಾರ್ಡ್ಗಳಲ್ಲಿ ಒಳಗೊಂಡಿದೆ.

ಪಶ್ಚಿಮ ಬಂಗಾಳದ 144-ಫಾಲ್ಟಾ ವಿಧಾನ ಸಭಾ ಕ್ಷೇತ್ರದಲ್ಲಿ ಮರು ಮತದಾನವು ಮೇ 21ರಂದು ನಡೆಯಲಿರುವುದರಿಂದ, ಆ ಕ್ಷೇತ್ರದ ಅಂತಿಮ ಮಾಹಿತಿ ನಂತರ ಪ್ರಕಟವಾಗಲಿದೆ ಎಂದು ತಿಳಿಸಲಾಗಿದೆ.

72 ಗಂಟೆಗಳೊಳಗೆ ಪ್ರಕಟಣೆ

ಚುನಾವಣಾ ಫಲಿತಾಂಶ ಘೋಷಣೆಯಾದ ಬಳಿಕ ಕೇವಲ 72 ಗಂಟೆಗಳೊಳಗೆ ಸೂಚ್ಯಂಕ ಕಾರ್ಡ್ ಮತ್ತು ಅಂಕಿ-ಅಂಶಗಳ ವರದಿಗಳನ್ನು ಬಿಡುಗಡೆ ಮಾಡಿರುವುದು ಚುನಾವಣಾ ಆಯೋಗದ ಹೊಸ ಸಾಧನೆ ಎಂದು ಹೇಳಲಾಗಿದೆ. ಹಿಂದೆ ಇದೇ ಪ್ರಕ್ರಿಯೆಗೆ ಹಲವು ವಾರಗಳು ಅಥವಾ ತಿಂಗಳುಗಳ ಕಾಲ ಬೇಕಾಗುತ್ತಿತ್ತು. ಕ್ಷೇತ್ರಾಧಿಕಾರಿಗಳು ಕೈಯಾರೆ ಮಾಹಿತಿಯನ್ನು ನಮೂದಿಸುವ ವ್ಯವಸ್ಥೆಯಿಂದ ವಿಳಂಬವಾಗುತ್ತಿತ್ತು.

ಈಗ ಇಸಿಐಎನ್ಇಟಿ ಡಿಜಿಟಲ್ ವೇದಿಕೆಯ ಬಳಕೆಯಿಂದ ಮಾಹಿತಿ ಸಂಗ್ರಹ ಮತ್ತು ಪ್ರಕಟಣೆ ವೇಗ ಪಡೆದುಕೊಂಡಿದೆ. ಡಿಜಿಟಲ್ ವ್ಯವಸ್ಥೆಯಿಂದ ಚುನಾವಣಾ ಮಾಹಿತಿಯ ನಿರ್ವಹಣೆಯಲ್ಲಿ ದಕ್ಷತೆ ಹೆಚ್ಚಾಗಿದೆ ಎಂದು ಆಯೋಗ ತಿಳಿಸಿದೆ.

ಎಲ್ಲರಿಗೂ ಮಾಹಿತಿ ಲಭ್ಯ

ಸೂಚ್ಯಂಕ ಕಾರ್ಡ್ ಗಳನ್ನು ಇಸಿಐನೆಟ್ ಅನ್ವಯಿಕೆ ಹಾಗೂ ಚುನಾವಣಾ ಆಯೋಗದ ಅಧಿಕೃತ ಜಾಲತಾಣದ ಮೂಲಕ ಪಡೆಯಬಹುದಾಗಿದೆ. ಜೊತೆಗೆ, ಆಯೋಗವು ಒಟ್ಟು 14 ಅಂಕಿಅಂಶಗಳ ವರದಿಗಳನ್ನು ಸಹ ಬಿಡುಗಡೆ ಮಾಡಿದೆ.

ಈ ವರದಿಗಳಲ್ಲಿ ರಾಜ್ಯವಾರು ಮತ್ತು ಕ್ಷೇತ್ರವಾರು ಮತದಾರರ ವಿವರಗಳು, ಮತಗಟ್ಟೆಗಳ ಸಂಖ್ಯೆ, ಮತದಾನದ ಪ್ರಮಾಣ, ಮಹಿಳೆ-ಪುರುಷರ ಮತದಾನದ ಪಾಲ್ಗೊಳ್ಳುವಿಕೆ, ಪಕ್ಷವಾರು ಮತ ಶೇಕಡಾವಾರು, ಕ್ಷೇತ್ರವಾರು ಸಾರಾಂಶ ಮತ್ತು ವಿವರವಾದ ಫಲಿತಾಂಶಗಳು ಸೇರಿವೆ.

ಸಂಶೋಧಕರಿಗೂ ಉಪಯುಕ್ತ

ಚುನಾವಣಾ ಸಂಬಂಧಿತ ದತ್ತಾಂಶವನ್ನು ಪಾರದರ್ಶಕವಾಗಿ ಮತ್ತು ಸುಲಭವಾಗಿ ಲಭ್ಯವಾಗುವಂತೆ ಮಾಡುವ ಉದ್ದೇಶದಿಂದ ಈ ಪ್ರಕಟಣೆ ಮಾಡಲಾಗಿದೆ ಎಂದು ಚುನಾವಣಾ ಆಯೋಗ ತಿಳಿಸಿದೆ. ಸಂಶೋಧಕರು, ಶಿಕ್ಷಣ ತಜ್ಞರು, ವಿದ್ಯಾರ್ಥಿಗಳು ಮತ್ತು ಸಾರ್ವಜನಿಕರಿಗೆ ಈ ಮಾಹಿತಿಯಿಂದ ಪ್ರಯೋಜನವಾಗಲಿದೆ ಎಂದು ಹೇಳಿದೆ.

ಆದರೆ, ಮೂಲ ಮತ್ತು ಅಂತಿಮ ದತ್ತಾಂಶವು ಸಂಬಂಧಿತ ಚುನಾವಣಾಧಿಕಾರಿಗಳು ನಿರ್ವಹಿಸುವ ಶಾಸನಬದ್ಧ ನಮೂನೆಗಳಲ್ಲಿಯೇ ದಾಖಲಾಗಿರುತ್ತದೆ ಹಾಗೂ ಅದನ್ನೇ ಅಧಿಕೃತ ದಾಖಲೆ ಎಂದು ಪರಿಗಣಿಸಲಾಗುತ್ತದೆ ಎಂದು ಆಯೋಗ ಸ್ಪಷ್ಟಪಡಿಸಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa