ನವದೆಹಲಿ, 12 ಮೇ (ಹಿ.ಸ.) :

ಆ್ಯಂಕರ್ : ಫ್ರೆಂಚ್ ವಿಮಾನ ನಿರ್ಮಾಣ ಸಂಸ್ಥೆ ಏರ್ಬಸ್ ಸಹಯೋಗದೊಂದಿಗೆ ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ ಭಾರತದಲ್ಲೇ ನಿರ್ಮಿಸಿರುವ ಮೊದಲ ಸಿ-295 ಮಿಲಿಟರಿ ಸಾರಿಗೆ ವಿಮಾನವನ್ನು ಗುಜರಾತ್ನ ವಡೋದರಾದ ಅಂತಿಮ ಜೋಡಣೆ ಘಟಕದಲ್ಲಿ ಅನಾವರಣಗೊಳಿಸಲಾಗಿದೆ. ಭಾರತೀಯ ವಾಯುಪಡೆಯ ‘ಆತ್ಮನಿರ್ಭರ ಭಾರತ’ ಅಭಿಯಾನಕ್ಕೆ ಇದು ಮಹತ್ವದ ಮೈಲಿಗಲ್ಲಾಗಿದೆ.

ಖಾಸಗಿ ಭಾರತೀಯ ಕಂಪನಿಯೊಂದು ದೇಶದಲ್ಲೇ ಸಂಪೂರ್ಣ ಮಿಲಿಟರಿ ವಿಮಾನದ ಅಂತಿಮ ಜೋಡಣೆ ಘಟಕವನ್ನು ನಿರ್ಮಿಸಿ ಕಾರ್ಯಾರಂಭ ಮಾಡಿರುವುದು ಇದೇ ಮೊದಲ ಬಾರಿ ಎಂದು ಹೇಳಲಾಗಿದೆ.

2021ರಲ್ಲಿ 21,935 ಕೋಟಿ ರೂಪಾಯಿ ಮೌಲ್ಯದ ಒಪ್ಪಂದದಡಿ ಭಾರತೀಯ ವಾಯುಪಡೆಯಿಗಾಗಿ 56 ಸಿ-295 ಮಿಲಿಟರಿ ಸಾರಿಗೆ ವಿಮಾನಗಳನ್ನು ಪೂರೈಸುವ ಯೋಜನೆಗೆ ಏರ್ಬಸ್ ಡಿಫೆನ್ಸ್ ಅಂಡ್ ಸ್ಪೇಸ್ ಮತ್ತು ಟಾಟಾ ಒಕ್ಕೂಟ ಕೈಜೋಡಿಸಿತ್ತು.

ಒಪ್ಪಂದದ ಪ್ರಕಾರ ಮೊದಲ 16 ವಿಮಾನಗಳನ್ನು ಸ್ಪೇನ್ನಲ್ಲಿ ತಯಾರಿಸಿ ಭಾರತಕ್ಕೆ ನೇರವಾಗಿ ಪೂರೈಸಲಾಗುತ್ತಿದೆ. ಉಳಿದ 40 ವಿಮಾನಗಳನ್ನು ಮುಂದಿನ ಹತ್ತು ವರ್ಷಗಳಲ್ಲಿ ಭಾರತದಲ್ಲೇ ಟಾಟಾ ಒಕ್ಕೂಟ ತಯಾರಿಸಲಿದೆ. ಭಾರತದಲ್ಲಿ ನಿರ್ಮಾಣವಾಗುವ ಎಲ್ಲಾ ವಿಮಾನಗಳನ್ನು 2031ರ ಆಗಸ್ಟ್ ಒಳಗೆ ವಾಯುಪಡೆಗೆ ಹಸ್ತಾಂತರಿಸುವ ಗುರಿ ಹೊಂದಲಾಗಿದೆ.

ಮೊದಲ ಸಿ-295 ವಿಮಾನವು 2023ರ ಸೆಪ್ಟೆಂಬರ್ 20ರಂದು ವಡೋದರಾದ ವಾಯುಪಡೆ ನೆಲೆಯಲ್ಲಿ ಇಳಿದಿತ್ತು. ಗ್ರೂಪ್ ಕ್ಯಾಪ್ಟನ್ ಪಿ.ಎಸ್. ನೇಗಿ ಅವರು ಫ್ರಾನ್ಸ್ನಿಂದ ಈಜಿಪ್ಟ್ ಮತ್ತು ಬಹ್ರೇನ್ ಮೂಲಕ ವಿಮಾನವನ್ನು ಭಾರತಕ್ಕೆ ಹಾರಿಸಿ ತಂದಿದ್ದರು. ಬಳಿಕ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ಹಿಂಡನ್ ವಾಯುನೆಲೆಯಲ್ಲಿ ಈ ವಿಮಾನವನ್ನು ಭಾರತೀಯ ವಾಯುಪಡೆಯ ಸಾರಿಗೆ ದಳಕ್ಕೆ ಅಧಿಕೃತವಾಗಿ ಸೇರ್ಪಡೆಗೊಳಿಸಿದ್ದರು.

ಇದಕ್ಕೂ ಮುನ್ನ 2023ರ ಸೆಪ್ಟೆಂಬರ್ 13ರಂದು ಸ್ಪೇನ್ನ ಸೆವಿಲ್ಲೆಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಆಗಿನ ವಾಯುಪಡೆಯ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ವಿ.ಆರ್. ಚೌಧರಿಗೆ ಮೊದಲ ಸಿ-295 ವಿಮಾನದ ಕೀಲಿಗಳನ್ನು ಏರ್ಬಸ್ ಸಂಸ್ಥೆ ಹಸ್ತಾಂತರಿಸಿತ್ತು. ಆ ಸಂದರ್ಭದಲ್ಲಿ ವಾಯುಪಡೆಯ ಮುಖ್ಯಸ್ಥರು ಸ್ವತಃ ವಿಮಾನವನ್ನು ಹಾರಿಸಿ ಅದರ ಸಾಮರ್ಥ್ಯವನ್ನು ಪರೀಕ್ಷಿಸಿದ್ದರು.

ಸಿ-295 ವಿಮಾನದ ಪ್ರಮುಖ ವೈಶಿಷ್ಟ್ಯಗಳು

ಸಿ-295 ಮಿಲಿಟರಿ ಸಾರಿಗೆ ವಿಮಾನವನ್ನು ಇಬ್ಬರು ಪೈಲಟ್ಗಳು ನಿಯಂತ್ರಿಸಬಹುದು. ಇದು 73 ಸೈನಿಕರು ಅಥವಾ 48 ಪ್ಯಾರಾಟ್ರೂಪರ್ಗಳನ್ನು ಸಾಗಿಸುವ ಸಾಮರ್ಥ್ಯ ಹೊಂದಿದೆ. ತುರ್ತು ವೈದ್ಯಕೀಯ ಸೇವೆಗಾಗಿ 12 ತೀವ್ರ ನಿಗಾ ಸ್ಟ್ರೆಚರ್ಗಳು ಅಥವಾ 27 ಸಾಮಾನ್ಯ ಸ್ಟ್ರೆಚರ್ಗಳೊಂದಿಗೆ ವೈದ್ಯಕೀಯ ಸಿಬ್ಬಂದಿಯನ್ನು ಸಾಗಿಸಬಹುದಾಗಿದೆ.

ವಿಮಾನವು ಗರಿಷ್ಠ 9,250 ಕೆಜಿ ತೂಕ ಹೊರುವ ಸಾಮರ್ಥ್ಯ ಹೊಂದಿದ್ದು, ಗಂಟೆಗೆ 482 ಕಿಲೋಮೀಟರ್ ವೇಗದಲ್ಲಿ ಸಂಚರಿಸಬಲ್ಲದು. ಗರಿಷ್ಠ 13,533 ಅಡಿ ಎತ್ತರದಲ್ಲಿ ಹಾರಬಲ್ಲ ಈ ವಿಮಾನಕ್ಕೆ ಟೇಕ್ಆಫ್ ಮಾಡಲು ಸುಮಾರು 844ರಿಂದ 934 ಮೀಟರ್ ಉದ್ದದ ರನ್ವೇ ಅಗತ್ಯವಿದೆ. ಲ್ಯಾಂಡಿಂಗ್ಗೆ ಕೇವಲ 420 ಮೀಟರ್ ರನ್ವೇ ಸಾಕಾಗುತ್ತದೆ.

ವಿಮಾನದಲ್ಲಿ ಶಸ್ತ್ರಾಸ್ತ್ರ ಮತ್ತು ರಕ್ಷಣಾ ವ್ಯವಸ್ಥೆಗಳನ್ನು ಅಳವಡಿಸಲು ಆರು ಹಾರ್ಡ್ ಪಾಯಿಂಟ್ಗಳ ವ್ಯವಸ್ಥೆ ಕಲ್ಪಿಸಲಾಗಿದೆ. ಎರಡೂ ರೆಕ್ಕೆಗಳ ಕೆಳಭಾಗದಲ್ಲಿ ತಲಾ ಮೂರು ಸ್ಥಳಗಳಲ್ಲಿ 800 ಕೆಜಿ ತೂಕದ ಶಸ್ತ್ರಾಸ್ತ್ರಗಳನ್ನು ಅಳವಡಿಸಬಹುದಾಗಿದೆ.

ವಿಮಾನದ ಬಿಡಿಭಾಗಗಳನ್ನು ಹೈದರಾಬಾದ್ನ ಘಟಕದಲ್ಲಿ ತಯಾರಿಸಲಾಗುತ್ತಿದ್ದು, ಅಂತಿಮ ಜೋಡಣೆ ಕಾರ್ಯವನ್ನು ವಡೋದರಾ ಘಟಕದಲ್ಲಿ ನಡೆಸಲಾಗುತ್ತಿದೆ. ಭಾರತದ ರಕ್ಷಣಾ ಉತ್ಪಾದನಾ ಕ್ಷೇತ್ರದಲ್ಲಿ ಈ ಯೋಜನೆ ಮಹತ್ವದ ಸ್ವದೇಶಿ ಸಾಧನೆ ಎಂದು ಪರಿಗಣಿಸಲಾಗಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa