ನವದೆಹಲಿ, 11 ಮೇ (ಹಿ.ಸ.) :

ಆ್ಯಂಕರ್ : ದೇಶದ ಹೆದ್ದಾರಿ ಸಂಚಾರ ವ್ಯವಸ್ಥೆಯಲ್ಲಿ ಮಹತ್ವದ ತಾಂತ್ರಿಕ ಬದಲಾವಣೆಯ ಭಾಗವಾಗಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ದೆಹಲಿಯ ಯುಇಆರ್-2ರ ಮುಂಡ್ಕಾ-ಬಕ್ಕರ್ವಾಲಾ ಟೋಲ್ ಪ್ಲಾಜಾದಲ್ಲಿ ಬಹುಪಥ ಮುಕ್ತ ಸಂಚಾರ ಟೋಲ್ ವ್ಯವಸ್ಥೆಗೆ ಚಾಲನೆ ನೀಡಿದರು. ದೇಶದಲ್ಲಿಯೇ ಈ ಮಾದರಿಯ ಎರಡನೇ ಟೋಲ್ ವ್ಯವಸ್ಥೆ ಇದಾಗಿದೆ. ಇದಕ್ಕೂ ಮೊದಲು ಗುಜರಾತಿನ ರಾಷ್ಟ್ರೀಯ ಹೆದ್ದಾರಿ-48ರ ಸೂರತ್-ಭರೂಚ್ ವಿಭಾಗದ ಚೋರಯಾಸಿ ಟೋಲ್ ಪ್ಲಾಜಾದಲ್ಲಿ ಇದೇ ವ್ಯವಸ್ಥೆ ಆರಂಭಿಸಲಾಗಿತ್ತು.

ಟೋಲ್ ಬಳಿ ವಾಹನ ನಿಲ್ಲಿಸುವ ಅಗತ್ಯವಿಲ್ಲ

ಹೊಸ ವ್ಯವಸ್ಥೆಯಲ್ಲಿ ವಾಹನಗಳು ಟೋಲ್ ಪ್ಲಾಜಾದಲ್ಲಿ ನಿಲ್ಲಿಸುವುದು ಅಥವಾ ವೇಗ ಕಡಿಮೆ ಮಾಡುವ ಅವಶ್ಯಕತೆ ಇರುವುದಿಲ್ಲ. ವಾಹನಗಳು ಸಾಮಾನ್ಯ ವೇಗದಲ್ಲೇ ಟೋಲ್ ದಾಟಲಿದ್ದು, ಟೋಲ್ ಶುಲ್ಕವು ವಾಹನದ ಫಾಸ್ಟ್ಟ್ಯಾಗ್ ಖಾತೆಯಿಂದ ಸ್ವಯಂಚಾಲಿತವಾಗಿ ಕಡಿತಗೊಳ್ಳಲಿದೆ.

ಈ ವ್ಯವಸ್ಥೆಯಲ್ಲಿ ಉನ್ನತ ಗುಣಮಟ್ಟದ ಕ್ಯಾಮೆರಾಗಳು, ಸ್ವಯಂಚಾಲಿತ ವಾಹನ ಸಂಖ್ಯೆ ಗುರುತಿಸುವ ತಂತ್ರಜ್ಞಾನ, ರೇಡಿಯೋ ಅಲೆ ಗುರುತು ವ್ಯವಸ್ಥೆ, ರಾಡಾರ್, ಲಿಡಾರ್ ಮತ್ತು ಫಾಸ್ಟ್ಟ್ಯಾಗ್ ಆಧಾರಿತ ಡಿಜಿಟಲ್ ಜಾಲವನ್ನು ಬಳಸಲಾಗುತ್ತಿದೆ.

ಸಂಚಾರ ದಟ್ಟಣೆ ಇಳಿಕೆ, ಇಂಧನ ಉಳಿತಾಯ

ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಮಾಹಿತಿ ಪ್ರಕಾರ, ಈ ವ್ಯವಸ್ಥೆಯಲ್ಲಿ ಯಾವುದೇ ಭೌತಿಕ ಗೇಟ್ ಅಥವಾ ಮಾನವ ಹಸ್ತಕ್ಷೇಪ ಇರುವುದಿಲ್ಲ. ಇದರಿಂದ ಟೋಲ್ ಪ್ಲಾಜಾಗಳಲ್ಲಿ ಉಂಟಾಗುತ್ತಿದ್ದ ದೀರ್ಘ ವಾಹನ ಸಾಲುಗಳು ಮತ್ತು ಸಂಚಾರ ದಟ್ಟಣೆ ಬಹಳ ಮಟ್ಟಿಗೆ ಕಡಿಮೆಯಾಗಲಿದೆ.

ವಾಹನಗಳು ನಿರಂತರ ವೇಗದಲ್ಲಿ ಚಲಿಸುವುದರಿಂದ ಪ್ರಯಾಣದ ಅವಧಿ ಕಡಿಮೆಯಾಗುವುದರ ಜೊತೆಗೆ ಇಂಧನ ಉಳಿತಾಯ ಮತ್ತು ವಾಹನಗಳಿಂದ ಹೊರಬರುವ ಹೊಗೆ ಪ್ರಮಾಣವೂ ಕಡಿಮೆಯಾಗಲಿದೆ.

ಸಂಪೂರ್ಣ ಡಿಜಿಟಲ್ ಮೇಲ್ವಿಚಾರಣೆ

ಈ ವ್ಯವಸ್ಥೆ ಸಂಪೂರ್ಣ ಡಿಜಿಟಲ್ ಮತ್ತು ನೈಜ ಸಮಯದ ಮೇಲ್ವಿಚಾರಣೆಯ ಆಧಾರದ ಮೇಲೆ ಕಾರ್ಯನಿರ್ವಹಿಸುತ್ತದೆ. ಇದರಿಂದ ಟೋಲ್ ಸಂಗ್ರಹ ಪ್ರಕ್ರಿಯೆ ಹೆಚ್ಚು ಪಾರದರ್ಶಕವಾಗಲಿದ್ದು, ಆದಾಯ ಸೋರಿಕೆ ತಡೆಯಲು ಸಹಕಾರಿ ಆಗಲಿದೆ.

ಸಂಚಾರ ಚಲನೆ, ಲೆಕ್ಕಪರಿಶೋಧನಾ ಮಾಹಿತಿ ಮತ್ತು ದತ್ತಾಂಶ ವಿಶ್ಲೇಷಣೆಯನ್ನು ಮೇಲ್ವಿಚಾರಣೆ ಮಾಡುವ ವ್ಯವಸ್ಥೆಯನ್ನೂ ಇದರಲ್ಲಿ ಅಳವಡಿಸಲಾಗಿದೆ.

17 ಟೋಲ್ ಪ್ಲಾಜಾಗಳಿಗೆ ವಿಸ್ತರಣೆ

ಮೊದಲ ಹಂತದಲ್ಲಿ ದೇಶದ ಒಂಬತ್ತು ರಾಜ್ಯಗಳ 17 ಟೋಲ್ ಪ್ಲಾಜಾಗಳನ್ನು ಈ ವ್ಯವಸ್ಥೆಗೆ ಸೇರಿಸಲಾಗಿದೆ. ಗುಜರಾತಿನ ಚೋರಯಾಸಿ ಟೋಲ್ ಪ್ಲಾಜಾ ಈಗಾಗಲೇ ಕಾರ್ಯನಿರ್ವಹಿಸುತ್ತಿದ್ದು, ದೆಹಲಿಯ ಮುಂಡ್ಕಾ ಟೋಲ್ ಪ್ಲಾಜಾ ಇದೀಗ ಚಾಲನೆ ಪಡೆದಿದೆ.

ಹರಿಯಾಣ, ರಾಜಸ್ಥಾನ, ತಮಿಳುನಾಡು, ಆಂಧ್ರಪ್ರದೇಶ, ಮಹಾರಾಷ್ಟ್ರ, ಕರ್ನಾಟಕ ಮತ್ತು ಅಸ್ಸಾಂ ರಾಜ್ಯಗಳ ಹಲವು ಟೋಲ್ ಪ್ಲಾಜಾಗಳನ್ನು ಸೆಪ್ಟೆಂಬರ್ ವೇಳೆಗೆ ಹಂತ ಹಂತವಾಗಿ ಈ ವ್ಯವಸ್ಥೆಗೆ ಸಂಪರ್ಕಿಸಲು ಯೋಜಿಸಲಾಗಿದೆ.

ಎರಡನೇ ಹಂತದಲ್ಲಿ 2027ರ ಮಾರ್ಚ್ ವೇಳೆಗೆ ದೇಶದಾದ್ಯಂತ 108ಕ್ಕೂ ಹೆಚ್ಚು ಟೋಲ್ ಪ್ಲಾಜಾಗಳನ್ನು ಈ ವ್ಯವಸ್ಥೆಯಡಿ ತರಲು ಉದ್ದೇಶಿಸಲಾಗಿದೆ.

ಟೋಲ್ ಪಾವತಿಸದ ವಾಹನಗಳಿಗೆ ಕಠಿಣ ಕ್ರಮ

ಫಾಸ್ಟ್ಟ್ಯಾಗ್ನಲ್ಲಿ ಕಡಿಮೆ ಮೊತ್ತ, ಅಮಾನ್ಯ ಸ್ಥಿತಿ ಅಥವಾ ಕಪ್ಪುಪಟ್ಟಿ ಸಮಸ್ಯೆ ಕಂಡುಬಂದರೆ, ವ್ಯವಸ್ಥೆಯು ಸ್ವಯಂಚಾಲಿತವಾಗಿ ದ್ವಿಗುಣ ಟೋಲ್ ಶುಲ್ಕದ ಇ-ನೋಟಿಸ್ ನೀಡಲಿದೆ. ಬಾಕಿ ಮೊತ್ತ ಪಾವತಿಸುವವರೆಗೆ ಸಂಬಂಧಿತ ಫಾಸ್ಟ್ಟ್ಯಾಗ್ ಅಮಾನತುಗೊಳ್ಳಲಿದೆ.

ಬಾಕಿ ಟೋಲ್ ಹೊಂದಿರುವ ವಾಹನಗಳಿಗೆ ಮಾಲೀಕತ್ವ ವರ್ಗಾವಣೆಗೆ ಅಗತ್ಯವಿರುವ ಅನುಮತಿ ಪತ್ರ ನೀಡಲಾಗುವುದಿಲ್ಲ ಎಂದು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ತಿಳಿಸಿದೆ. ವಾಣಿಜ್ಯ ವಾಹನಗಳ ಫಿಟ್ನೆಸ್ ಪ್ರಮಾಣಪತ್ರ ಹಾಗೂ ರಾಷ್ಟ್ರೀಯ ಪರವಾನಗಿ ನವೀಕರಣವನ್ನೂ ಟೋಲ್ ಪಾವತಿ ಸ್ಥಿತಿಗೆ ಜೋಡಿಸಲಾಗಿದೆ.

ಈ ಸಂಬಂಧ ಜನವರಿ 13 ಮತ್ತು ಮಾರ್ಚ್ 17ರಂದು ಹೊರಡಿಸಿದ ಗೆಜೆಟ್ ಅಧಿಸೂಚನೆಗಳ ಮೂಲಕ ಕಾನೂನುಬದ್ಧ ನಿಯಮಗಳನ್ನು ಜಾರಿಗೆ ತರಲಾಗಿದೆ.

ಈ ಕಾರ್ಯಕ್ರಮದಲ್ಲಿ ಕೇಂದ್ರ ಸಚಿವರಾದ ಹರ್ಷ ಮಲ್ಹೋತ್ರಾ, ಅಜಯ್ ತಮ್ತಾ, ಪಶ್ಚಿಮ ದೆಹಲಿ ಸಂಸದ ಕಮಲ್ಜೀತ್ ಸೆಹ್ರಾವತ್, ವಾಯುವ್ಯ ದೆಹಲಿ ಸಂಸದ ಯೋಗೇಂದರ್ ಚಂದೋಲಿಯಾ ಮತ್ತು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧ್ಯಕ್ಷ ಸಂತೋಷ್ ಕುಮಾರ್ ಯಾದವ್ ಉಪಸ್ಥಿತರಿದ್ದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa