ನವದೆಹಲಿ, 07 ನವೆಂಬರ್ (ಹಿ.ಸ.):
ದೀಪಾವಳಿ ಹಬ್ಬದ ಮುನ್ನಾದಿನವಾದ ಇಂದು ಬಾಗ್ಡೋಗ್ರಾ ವಾಯುಪಡೆ ನಿಲ್ದಾಣಕ್ಕೆ ಭೇಟಿ ನೀಡಿದ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು, ಭಾರತೀಯ ವಾಯುಪಡೆಯ ಧೈರ್ಯಶಾಲಿ ಯೋಧರನ್ನು ಭೇಟಿಯಾಗಿ ಸಂವಾದ ನಡೆಸಿದ್ದಾರೆ.
ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಮಾಹಿತಿ ಹಂಚಿಕೊಂಡಿರುವ ಅವರು, ದೇಶದ ಆಕಾಶದ ಸುರಕ್ಷತೆಯಲ್ಲಿ ಭಾರತೀಯ ವಾಯುಪಡೆಯು ನಿರಂತರ ಜಾಗರೂಕತೆ, ಅಪಾರ ಕೌಶಲ ಮತ್ತು ಸದಾ ಸನ್ನದ್ಧತೆಯೊಂದಿಗೆ ಮಹತ್ವದ ಪಾತ್ರ ವಹಿಸುತ್ತಿದೆ ಎಂದು ತಿಳಿಸಿದ್ದಾರೆ.
ಇಂದಿನ ಸಂಕೀರ್ಣ ಭದ್ರತಾ ಪರಿಸ್ಥಿತಿಯಲ್ಲಿ ಅಸಮಪಾರ್ಶ್ವದ ಯುದ್ಧತಂತ್ರ, ಸಾಮೂಹಿಕವಾಗಿ ದಾಳಿ ನಡೆಸುವ ಮಾನವರಹಿತ ವಿಮಾನಗಳು ಹಾಗೂ ಸೈಬರ್ ದಾಳಿಗಳ ಸವಾಲುಗಳು ಎದುರಾಗುತ್ತಿವೆ. ಇಂತಹ ಸಂದರ್ಭದಲ್ಲಿ ದೇಶದ ರಕ್ಷಣೆಗೆ ವಾಯುಪಡೆಯ ಯೋಧರ ವಾಯುಪ್ರದೇಶದ ಅರಿವು ಮತ್ತು ಸೈಬರ್ ದಾಳಿಗಳನ್ನು ಎದುರಿಸುವ ಸಾಮರ್ಥ್ಯ ಅತ್ಯಂತ ಮಹತ್ವದ್ದಾಗಿದೆ ಎಂದು ಹೇಳಿದ್ದಾರೆ.
ಮುಂಚೂಣಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ಪುರುಷ ಮತ್ತು ಮಹಿಳಾ ಯೋಧರನ್ನು ಭೇಟಿಯಾಗಿ, ಅವರಲ್ಲಿರುವ ಅಪಾರ ಉತ್ಸಾಹ, ಕರ್ತವ್ಯನಿಷ್ಠೆ ಹಾಗೂ ಉನ್ನತ ಮನೋಬಲವನ್ನು ಕಂಡು ಸ್ಫೂರ್ತಿ ದೊರೆತಿದೆ ಎಂದು ರಾಜನಾಥ್ ಸಿಂಗ್ ತಿಳಿಸಿದ್ದಾರೆ.
ದೇಶದ ಸಶಸ್ತ್ರ ಪಡೆಗಳು ಹಗಲು-ರಾತ್ರಿ ಎನ್ನದೆ ಗಡಿಯಲ್ಲಿ ಮತ್ತು ದೇಶದ ರಕ್ಷಣೆಯಲ್ಲಿ ಕಾವಲು ಕಾಯುತ್ತಿರುವುದರಿಂದಲೇ ಪ್ರತಿಯೊಂದು ಹಬ್ಬವನ್ನು ಜನರು ಸಂತೋಷ ಮತ್ತು ಶಾಂತಿಯಿಂದ ಆಚರಿಸಲು ಸಾಧ್ಯವಾಗಿದೆ. ಸೈನಿಕರ ಶೌರ್ಯ ಮತ್ತು ನಿಸ್ವಾರ್ಥ ಸೇವೆಯ ಬಗ್ಗೆ ಇಡೀ ದೇಶ ಹೆಮ್ಮೆಪಡುತ್ತದೆ ಎಂದು ಅವರು ಹೇಳಿದ್ದಾರೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
