ಬೆರ್ಹಾಂಪುರ, 14 ಅಕ್ಟೋಬರ್ (ಹಿ.ಸ.):

ಒಡಿಶಾದಲ್ಲಿ ಅಪರೂಪದ ಅಂಗರಚನೆ ಹೊಂದಿರುವ ಸಯಾಮಿ ಅವಳಿ ಶಿಶುವಿನ ಜನನವಾಗಿದ್ದು, ವೈದ್ಯಕೀಯ ಲೋಕದಲ್ಲಿ ಅಚ್ಚರಿ ಮೂಡಿಸಿದೆ.

ಎರಡು ಪ್ರತ್ಯೇಕ ತಲೆಗಳು ಮತ್ತು ಎರಡು ಬೆನ್ನುಹುರಿಗಳನ್ನು ಹೊಂದಿರುವ ಈ ಶಿಶುವಿಗೆ ಒಂದೇ ಹೃದಯ ಹಾಗೂ ಒಂದೇ ದೇಹವಿದೆ. ಸದ್ಯ ಮಗುವಿನ ಆರೋಗ್ಯ ಸ್ಥಿತಿ ಗಂಭೀರವಾಗಿದ್ದು, ವೈದ್ಯರ ತಂಡ ತೀವ್ರ ನಿಗಾ ವಹಿಸಿದೆ.

ಜನನದ ಬಳಿಕ ಮಗುವಿನ ಅಸಾಮಾನ್ಯ ದೈಹಿಕ ರಚನೆಯನ್ನು ಗಮನಿಸಿದ ವೈದ್ಯರು, ತಕ್ಷಣವೇ ಶಿಶುವನ್ನು ಆಸ್ಪತ್ರೆಯ ವಿಶೇಷ ನವಜಾತ ಶಿಶು ಆರೈಕೆ ಘಟಕಕ್ಕೆ (ಎಸ್ಎನ್ಸಿಯು) ಸ್ಥಳಾಂತರಿಸಿದ್ದಾರೆ.

ಜನನದ ಸಮಯದಲ್ಲಿ ಮಗು 2.6 ಕೆ.ಜಿ. ತೂಕ ಹೊಂದಿತ್ತು. ಎದೆಯ ಮೇಲ್ಭಾಗದಲ್ಲಿ ಎರಡು ಪ್ರತ್ಯೇಕ ತಲೆಗಳು ಮತ್ತು ಮುಖಗಳಿದ್ದು, ಎರಡು ಬೆನ್ನುಹುರಿಗಳು ದೇಹದ ಕೆಳಭಾಗದೊಂದಿಗೆ ಸಂಪರ್ಕ ಹೊಂದಿವೆ ಎಂದು ತಿಳಿದುಬಂದಿದೆ.

ವೈದ್ಯರಿಂದ ನಿರಂತರ ನಿಗಾ

ಮಗುವಿಗೆ ಒಂದೇ ಹೃದಯವಿರುವುದರಿಂದ ಅದರ ಆರೋಗ್ಯ ಸ್ಥಿತಿ ವೈದ್ಯರಿಗೆ ಸವಾಲಾಗಿ ಪರಿಣಮಿಸಿದೆ. ಹಿರಿಯ ಮಕ್ಕಳ ತಜ್ಞರು ನಿರಂತರ ಚಿಕಿತ್ಸೆ ನೀಡುತ್ತಿದ್ದು, ಮಗುವಿನ ಆಂತರಿಕ ಅಂಗಾಂಗಗಳ ಸ್ಥಿತಿಯನ್ನು ತಿಳಿದುಕೊಳ್ಳಲು ಸಿಟಿ ಸ್ಕ್ಯಾನ್, ಎಂಆರ್ಐ ಹಾಗೂ ಎಕೋಕಾರ್ಡಿಯೋಗ್ರಾಮ್ ಸೇರಿದಂತೆ ಅಗತ್ಯ ವೈದ್ಯಕೀಯ ಪರೀಕ್ಷೆಗಳನ್ನು ನಡೆಸಲಾಗುತ್ತಿದೆ. ಹೆಚ್ಚಿನ ತಜ್ಞರ ಚಿಕಿತ್ಸೆಯ ಅಗತ್ಯ ಕಂಡುಬಂದಲ್ಲಿ ಭುವನೇಶ್ವರದ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ (ಏಮ್ಸ್)ಗೆ ಶಿಫಾರಸು ಮಾಡುವ ಸಾಧ್ಯತೆಯಿದೆ.

ಮೊದಲ ಮಗುವಿನ ಜನನದಿಂದ ಆಘಾತ

ಕಂಧಮಾಲ್ ಜಿಲ್ಲೆಯ ತುಮುಡಿಬಂಧ್ ವ್ಯಾಪ್ತಿಯ ತಿಡಿಪದರ್ ಗ್ರಾಮದ ತ್ರಿಲೋಚನ್ ಮಾಝಿ ಮತ್ತು ರೂನಿ ಮಾಝಿ ದಂಪತಿಗೆ ಈ ಮಗು ಮೊದಲ ಸಂತಾನವಾಗಿದೆ. ಮೊದಲ ಮಗುವಿನ ಜನನದ ನಿರೀಕ್ಷೆಯಲ್ಲಿದ್ದ ದಂಪತಿಗೆ ಶಿಶುವಿನ ಅಸಾಮಾನ್ಯ ದೈಹಿಕ ರಚನೆ ಆಘಾತ ಉಂಟುಮಾಡಿದೆ.

ಕಡು ಬಡತನದಲ್ಲಿರುವ ಬುಡಕಟ್ಟು ಕುಟುಂಬಕ್ಕೆ ಮುಂದಿನ ದಿನಗಳಲ್ಲಿ ಅಗತ್ಯವಾಗಬಹುದಾದ ವಿಶೇಷ ಚಿಕಿತ್ಸೆ, ಶಸ್ತ್ರಚಿಕಿತ್ಸೆ ಮತ್ತು ತೀವ್ರ ನಿಗಾ ಚಿಕಿತ್ಸೆಯ ವೆಚ್ಚವನ್ನು ಭರಿಸುವುದು ಕಷ್ಟವಾಗಿದೆ. ಹೀಗಾಗಿ ಮಗುವಿನ ಜೀವ ಉಳಿಸಲು ಸರ್ಕಾರ ಹಾಗೂ ಸಾರ್ವಜನಿಕರು ನೆರವು ನೀಡಬೇಕು ಎಂದು ಕುಟುಂಬ ಆಶಯ ವ್ಯಕ್ತಪಡಿಸಿದೆ.

ಏನಿದು ಡೈಸೆಫಾಲಿಕ್ ಪ್ಯಾರಾಪಾಗಸ್?

ವೈದ್ಯಕೀಯ ವಿಜ್ಞಾನದಲ್ಲಿ ಈ ಅಪರೂಪದ ಸ್ಥಿತಿಯನ್ನು ‘ಡೈಸೆಫಾಲಿಕ್ ಪ್ಯಾರಾಪಾಗಸ್’ ಎಂದು ಕರೆಯಲಾಗುತ್ತದೆ. ಇದು ಸಯಾಮಿ ಅವಳಿಗಳ ಒಂದು ಅಪರೂಪದ ರೂಪವಾಗಿದ್ದು, ಎರಡು ತಲೆಗಳನ್ನು ಹೊಂದಿರುವ ಅವಳಿಗಳು ದೇಹದ ಕೆಲವು ಭಾಗಗಳನ್ನು ಹಂಚಿಕೊಂಡಿರುತ್ತವೆ.

ಗರ್ಭಾವಸ್ಥೆಯ ಆರಂಭಿಕ ಬೆಳವಣಿಗೆಯಲ್ಲಿ ಒಂದೇ ಫಲವತ್ತಾದ ಭ್ರೂಣವು ಎರಡು ಪ್ರತ್ಯೇಕ ಭ್ರೂಣಗಳಾಗಿ ಸಂಪೂರ್ಣವಾಗಿ ವಿಭಜನೆಯಾಗಲು ವಿಫಲವಾದಾಗ ಇಂತಹ ಜೋಡಿತ ಅವಳಿಗಳ ಬೆಳವಣಿಗೆ ಸಂಭವಿಸಬಹುದು.

ಈ ಪ್ರಕರಣದಲ್ಲಿ ಎರಡು ತಲೆಗಳು ಮತ್ತು ಎರಡು ಬೆನ್ನುಹುರಿಗಳಿದ್ದರೂ, ಹೃದಯದಂತಹ ಪ್ರಮುಖ ಅಂಗ ಒಂದೇ ಆಗಿರುವುದು ಚಿಕಿತ್ಸೆಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿದೆ.

ಶಸ್ತ್ರಚಿಕಿತ್ಸೆ ದೊಡ್ಡ ಸವಾಲು

ಜೋಡಿತ ಅವಳಿಗಳನ್ನು ಪ್ರತ್ಯೇಕಿಸುವ ಶಸ್ತ್ರಚಿಕಿತ್ಸೆ ಅವರ ಆಂತರಿಕ ಅಂಗಾಂಗಗಳ ರಚನೆ, ರಕ್ತಪರಿಚಲನೆ ಹಾಗೂ ಇತರ ಪ್ರಮುಖ ಅಂಗಗಳ ಹಂಚಿಕೆಯ ಮೇಲೆ ಅವಲಂಬಿತವಾಗಿರುತ್ತದೆ.

ಒಂದೇ ಹೃದಯವನ್ನು ಹೊಂದಿರುವ ಇಂತಹ ಪ್ರಕರಣಗಳಲ್ಲಿ ಶಸ್ತ್ರಚಿಕಿತ್ಸೆ ಅತ್ಯಂತ ಅಪಾಯಕಾರಿ ಮತ್ತು ಸಂಕೀರ್ಣವಾಗಿರಬಹುದು.

ಆದ್ದರಿಂದ ಮುಂದಿನ ಚಿಕಿತ್ಸೆಯ ನಿರ್ಧಾರವನ್ನು ವೈದ್ಯಕೀಯ ಪರೀಕ್ಷೆಗಳ ವರದಿ ಹಾಗೂ ತಜ್ಞರ ಮೌಲ್ಯಮಾಪನದ ಆಧಾರದ ಮೇಲೆ ಕೈಗೊಳ್ಳಬೇಕಿದೆ.

ಅಪರೂಪದ ಈ ವೈದ್ಯಕೀಯ ಪ್ರಕರಣದಲ್ಲಿ ಮಗುವಿನ ಆರೋಗ್ಯ ಸುಧಾರಿಸಿ ಜೀವ ಉಳಿಯಲಿ ಎಂಬ ಆಶಯದೊಂದಿಗೆ ಕುಟುಂಬ ಸರ್ಕಾರದ ನೆರವಿನ ನಿರೀಕ್ಷೆಯಲ್ಲಿದೆ.

---------------

ಹಿಂದೂಸ್ತಾನ್ ಸಮಾಚಾರ್ / BHARGAVI G R