ನವದೆಹಲಿ, 05 ಜನವರಿ (ಹಿ.ಸ.) :

ಆ್ಯಂಕರ್ : ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ದೇಶಭಕ್ತಿ, ದೃಷ್ಟಿಕೋನ ಮತ್ತು ಅಭಿವೃದ್ಧಿಯ ಸಂದೇಶವನ್ನು ಸಾರ್ವಜನಿಕರಿಗೆ ಪರಿಣಾಮಕಾರಿಯಾಗಿ ತಲುಪಿಸುವಲ್ಲಿ ‘ಖುತ್ಬತ್-ಎ-ಮೋದಿ’ ಪುಸ್ತಕ ಪ್ರಮುಖ ಪಾತ್ರ ವಹಿಸಲಿದೆ ಎಂದು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಹೇಳಿದರು.

ಸೋಮವಾರ ರಾಷ್ಟ್ರೀಯ ಉರ್ದು ಭಾಷಾ ಪ್ರಚಾರ ಮಂಡಳಿ (ಎನ್‌ಸಿಪಿಯುಎಲ್) ಪ್ರಕಟಿಸಿದ ‘ಖುತ್ಬತ್-ಎ-ಮೋದಿ’ ಪುಸ್ತಕವನ್ನು ಬಿಡುಗಡೆ ಮಾಡಿ ಮಾತನಾಡಿದ ಅವರು, 2014ರಿಂದ 2025ರ ಅವಧಿಯಲ್ಲಿ ಕೆಂಪುಕೋಟೆಯಿಂದ ಪ್ರಧಾನ ಮಂತ್ರಿಯವರು ರಾಷ್ಟ್ರವನ್ನುದ್ದೇಶಿಸಿ ನೀಡಿದ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣಗಳ ಉರ್ದು ಸಂಕಲನವೇ ಈ ಕೃತಿ ಎಂದು ವಿವರಿಸಿದರು. ಸುಮಾರು ಆರು ಕೋಟಿ ಉರ್ದು ಭಾಷಿಕ ಸಹೋದರ–ಸಹೋದರಿಯರಿಗಾಗಿ ಈ ಪುಸ್ತಕವನ್ನು ಪ್ರಕಟಿಸಲಾಗಿದೆ ಎಂದು ಅವರು ತಿಳಿಸಿದರು.

ಪ್ರಧಾನ ಮಂತ್ರಿಯವರ ಚಿಂತನೆಗಳು, ನಿರ್ಣಯಗಳು ಮತ್ತು ದೃಷ್ಟಿಕೋನಗಳನ್ನು – ಸ್ವಚ್ಛ ಭಾರತದಿಂದ ಅಭಿವೃದ್ಧಿ ಹೊಂದಿದ ಭಾರತದವರೆಗೆ – ಈ ಪುಸ್ತಕ ಸಮಗ್ರವಾಗಿ ಒಳಗೊಂಡಿದೆ ಎಂದು ಪ್ರಧಾನ್ ಹೇಳಿದರು. ನಾಗರಿಕರನ್ನು ರಾಷ್ಟ್ರದ ಆಶಯಗಳು, ಆಕಾಂಕ್ಷೆಗಳು ಹಾಗೂ ಪ್ರಧಾನ ಮಂತ್ರಿಯವರ ದಾರ್ಶನಿಕ ಚಿಂತನೆಯೊಂದಿಗೆ ಸಂಪರ್ಕಿಸುವ ಪ್ರಬಲ ಮಾಧ್ಯಮವಾಗಿ ಇಂತಹ ಪ್ರಕಟಣೆಗಳು ಕಾರ್ಯನಿರ್ವಹಿಸುತ್ತವೆ ಎಂದರು.

ಪ್ರಧಾನ ಮಂತ್ರಿಯವರ ಭಾಷಣಗಳ ಮೂಲಕ ಅಂತ್ಯೋದಯ, ಗರೀಬ್ ಕಲ್ಯಾಣ್, ಸ್ವಚ್ಛ ಭಾರತ, ಉಜ್ವಲ ಯೋಜನೆ ಸೇರಿದಂತೆ 1.4 ಶತಕೋಟಿ ಭಾರತೀಯರ ಕನಸುಗಳಿಗೆ ಸಂಬಂಧಿಸಿದ ಪ್ರಮುಖ ವಿಷಯಗಳನ್ನು ಓದುಗರಿಗೆ ತಲುಪಿಸಲಾಗಿದೆ ಎಂದು ಅವರು ಹೇಳಿದರು. ದೇಶದ ಗುರಿಗಳು ಮತ್ತು ಪ್ರಧಾನ ಮಂತ್ರಿಯವರ ದೃಷ್ಟಿಕೋನದ ಕುರಿತು ಸಮಾಜದಲ್ಲಿ ವ್ಯಾಪಕ ಚರ್ಚೆ ಮೂಡಿಸಲು ‘ಖುತ್ಬತ್-ಎ-ಮೋದಿ’ ಪುಸ್ತಕವು ದೇಶದ ಪ್ರತಿಯೊಂದು ಗ್ರಂಥಾಲಯವನ್ನೂ ತಲುಪಬೇಕು ಎಂಬುದು ತಮ್ಮ ಆಶಯ ಎಂದು ಪ್ರಧಾನ್ ತಿಳಿಸಿದರು.

ಭಾರತದ ಶ್ರೀಮಂತ ಪರಂಪರೆ, ಸಂಸ್ಕೃತಿ ಮತ್ತು ಜ್ಞಾನ ಪರಂಪರೆಯನ್ನು ಪ್ರತಿಬಿಂಬಿಸುವ ಹೆಚ್ಚಿನ ಪ್ರಕಟಣೆಗಳನ್ನು ಉರ್ದು ಭಾಷೆಯಲ್ಲಿ ಹೊರತರುವಂತೆ ರಾಷ್ಟ್ರೀಯ ಉರ್ದು ಭಾಷಾ ಪ್ರಚಾರ ಮಂಡಳಿಗೆ ಅವರು ಸಲಹೆ ನೀಡಿದರು. ಖುತ್ಬತ್-ಎ-ಮೋದಿ ಯಂತಹ ಶ್ಲಾಘನೀಯ ಕೃತಿಯನ್ನು ಪ್ರಕಟಿಸಿದ್ದಕ್ಕಾಗಿ ಮಂಡಳಿಯನ್ನು ಅಭಿನಂದಿಸಿದ ಪ್ರಧಾನ್, ಈ ಪುಸ್ತಕವು ಪ್ರಧಾನ ಮಂತ್ರಿಯವರ ಸಂಕಲ್ಪ ಮತ್ತು ಆಲೋಚನೆಗಳನ್ನು ಸಾರ್ವಜನಿಕರು, ಬುದ್ಧಿಜೀವಿಗಳು ಹಾಗೂ ಯುವಜನರಲ್ಲಿ ಪರಿಣಾಮಕಾರಿಯಾಗಿ ತಲುಪಿಸುವಲ್ಲಿ ಮಹತ್ವದ ಪಾತ್ರ ವಹಿಸಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa