ಬೌರ್ನ್ಮೌತ್, 04 ಜನವರಿ (ಹಿ.ಸ.) :
ಆ್ಯಂಕರ್ : ಕಳಪೆ ಆರಂಭವನ್ನು ಮೆಟ್ಟಿನಿಂತು ಆರ್ಸೆನಲ್ ಶನಿವಾರ ನಡೆದ ರೋಮಾಂಚಕ ಪಂದ್ಯದಲ್ಲಿ ಬೌರ್ನ್ಮೌತ್ ತಂಡವನ್ನು 3–2 ಗೋಲುಗಳಿಂದ ಮಣಿಸಿದೆ. ಡೆಕ್ಲಾನ್ ರೈಸ್ ಎರಡು ಗೋಲುಗಳೊಂದಿಗೆ ಮಿಂಚಿದರೆ, ಈ ಜಯದಿಂದ ಆರ್ಸೆನಲ್ ಪ್ರೀಮಿಯರ್ ಲೀಗ್ ಅಂಕಪಟ್ಟಿಯಲ್ಲಿ ತನ್ನ ಮುನ್ನಡೆಯನ್ನು ಆರು ಅಂಕಗಳಿಗೆ ವಿಸ್ತರಿಸಿದೆ.
ಪಂದ್ಯವು ಆರ್ಸೆನಲ್ಗೆ ಸುಲಭವಾಗಿರಲಿಲ್ಲ. 10ನೇ ನಿಮಿಷದಲ್ಲಿ ಡಿಫೆಂಡರ್ ಗೇಬ್ರಿಯಲ್ ಮಾಡಿದ ಅಪರೂಪದ ತಪ್ಪನ್ನು ಬಳಸಿಕೊಂಡ ಇವಾನಿಲ್ಸನ್ ಬೌರ್ನ್ಮೌತ್ಗೆ ಮುನ್ನಡೆ ತಂದುಕೊಟ್ಟರು. ಆದರೆ ಕೇವಲ ಆರು ನಿಮಿಷಗಳಲ್ಲೇ ಗೇಬ್ರಿಯಲ್ ಸಮಬಲದ ಗೋಲು ಬಾರಿಸಿ ತನ್ನ ತಪ್ಪನ್ನು ತಿದ್ದಿಕೊಂಡರು.
ದ್ವಿತೀಯಾರ್ಧದ ಆರಂಭದಲ್ಲಿ ಗಾಯದಿಂದ ಚೇತರಿಸಿಕೊಂಡು ಮರಳಿದ್ದ ಡೆಕ್ಲಾನ್ ರೈಸ್ ನಾಯಕ ಮಾರ್ಟಿನ್ ಒಡೆಗಾರ್ಡ್ ನೀಡಿದ ಪಾಸ್ನ್ನು ಬಳಸಿ ಬಾಕ್ಸ್ ಹೊರಗಿನಿಂದ ನಿಖರ ಹೊಡೆತ ನೀಡಿ ಆರ್ಸೆನಲ್ಗೆ ಮುನ್ನಡೆ ನೀಡಿದರು. ನಂತರ ಬದಲಿ ಆಟಗಾರ ಬುಕಾಯೊ ಸಾಕಾ ಅವರ ಅದ್ಭುತ ಸೆಟ್ನಿಂದ ರೈಸ್ ತಮ್ಮ ಎರಡನೇ ಗೋಲು ಗಳಿಸಿದರು. ಇದು ನವೆಂಬರ್ 1ರ ನಂತರ ರೈಸ್ ಅವರ ಮೊದಲ ಲೀಗ್ ಗೋಲುಗಳಾಗಿವೆ.
ಬದಲಿ ಆಟಗಾರ ಜೂನಿಯರ್ ಕ್ರುಪಿ ಡೇವಿಡ್ ರಾಯಾ ಅವರನ್ನು ಮೀರಿಸಿ ಗೋಲು ಬಾರಿಸುವ ಮೂಲಕ ಬೌರ್ನ್ಮೌತ್ಗೆ ಆಸೆ ಮೂಡಿಸಿದರು. ಇದಾದರೂ ಮೈಕೆಲ್ ಆರ್ಟೆಟಾ ತಂಡವು ಒತ್ತಡವನ್ನು ಸಮರ್ಥವಾಗಿ ಎದುರಿಸಿ ಸತತ ಐದನೇ ಗೆಲುವು ಸಾಧಿಸಿತು.
ಈ ಫಲಿತಾಂಶದೊಂದಿಗೆ ಆರ್ಸೆನಲ್ 20 ಪಂದ್ಯಗಳಿಂದ 48 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಆಸ್ಟನ್ ವಿಲ್ಲಾ 42 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದರೆ, ಒಂದು ಪಂದ್ಯ ಕಡಿಮೆ ಆಡಿರುವ ಮ್ಯಾಂಚೆಸ್ಟರ್ ಸಿಟಿ 41 ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದೆ. ಸಿಟಿ ಭಾನುವಾರ ಚೆಲ್ಸಿಯಾ ವಿರುದ್ಧ ಆಡಿ ಅಂತರವನ್ನು ಕಡಿಮೆ ಮಾಡಲು ಪ್ರಯತ್ನಿಸಲಿದೆ.
ಇನ್ನೊಂದೆಡೆ, ಬೌರ್ನ್ಮೌತ್ ಸಂಕಷ್ಟಗಳು ಮುಂದುವರಿದಿವೆ. ತಂಡವು ಸತತ 11 ಲೀಗ್ ಪಂದ್ಯಗಳಲ್ಲಿ ಗೆಲುವಿಲ್ಲದೆ ಉಳಿದಿದೆ. ಫಾರ್ವರ್ಡ್ ಆಂಟೊಯಿನ್ ಸೆಮೆನ್ಯೊ ವರ್ಗಾವಣೆ ವಿಂಡೋದಲ್ಲಿ ತಂಡ ತೊರೆಯುವ ಸಾಧ್ಯತೆ ಇದ್ದು, ಅಂತಿಮ ಶಿಳ್ಳೆಯ ಬಳಿಕ ಅಭಿಮಾನಿಗಳಿಗೆ ಕೈ ಬೀಸಿದ ದೃಶ್ಯ ಗಮನ ಸೆಳೆಯಿತು.
ಒತ್ತಡದ ಕ್ಷಣಗಳಲ್ಲೂ ಜಯ ಸಾಧಿಸುವ ಸಾಮರ್ಥ್ಯವನ್ನು ತೋರಿಸಿರುವ ಆರ್ಸೆನಲ್, 2004ರ ನಂತರದ ತಮ್ಮ ಮೊದಲ ಪ್ರೀಮಿಯರ್ ಲೀಗ್ ಪ್ರಶಸ್ತಿಯತ್ತ ದೃಢ ಹೆಜ್ಜೆ ಇಡುತ್ತಿದೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
