ಢಾಕಾ, 04 ಸೆಪ್ಟೆಂಬರ್ (ಹಿ.ಸ.) :
ಆ್ಯಂಕರ್ : ಬಾಂಗ್ಲಾದೇಶ ಟಿ20 ತಂಡದ ನಾಯಕ ಲಿಟನ್ ಕುಮಾರ್ ದಾಸ್ ತಮ್ಮ ತಂಡವು ಮುಂಬರುವ ಏಷ್ಯಾಕಪ್‌ಗೆ ಸಂಪೂರ್ಣ ಸಿದ್ಧವಾಗಿದೆ ಎಂದು ತಿಳಿಸಿದ್ದಾರೆ. ಸೆಪ್ಟೆಂಬರ್ 9ರಿಂದ ಯುಎಇಯಲ್ಲಿ ಟೂರ್ನಿ ಆರಂಭವಾಗಲಿದ್ದು, ಬಾಂಗ್ಲಾದೇಶ ಸೆಪ್ಟೆಂಬರ್ 11ರಂದು ಹಾಂಗ್ ಕಾಂಗ್ ವಿರುದ್ಧ ಅಭಿಯಾನ ಆರಂಭಿಸಲಿದೆ.
ಇತ್ತೀಚೆಗೆ ಬಾಂಗ್ಲಾದೇಶವು ನೆದರ್ಲ್ಯಾಂಡ್ಸ್ ವಿರುದ್ಧದ ಮೂರು ಪಂದ್ಯಗಳ ಟಿ20 ಸರಣಿಯನ್ನು 2–0 ಅಂತರದಿಂದ ಗೆದ್ದುಕೊಂಡಿತು. ಮೂರನೇ ಪಂದ್ಯ ಮಳೆಯಿಂದ ರದ್ದಾಗಿತ್ತು. ಇದು ತಂಡದ ಸತತ ಮೂರನೇ ಸರಣಿ ಗೆಲುವು, ಇದಕ್ಕೂ ಮೊದಲು ಅವರು ಶ್ರೀಲಂಕಾ ಮತ್ತು ಪಾಕಿಸ್ತಾನವನ್ನು ಸೋಲಿಸಿದ್ದರು.
ತಂಡದ ಯಶಸ್ಸಿಗೆ ಕಾರಣವಾಗಿ ಲಿಟನ್ ಪೂರ್ವ-ಸರಣಿ ಶಿಬಿರವನ್ನೇ ಗುರುತಿಸಿದರು. ಢಾಕಾದಲ್ಲಿ ಫಿಟ್‌ನೆಸ್ ಕ್ಯಾಂಪ್ ಹಾಗೂ ಸಿಲ್ಹೆಟ್‌ನಲ್ಲಿ ಕೌಶಲ್ಯ ಶಿಬಿರ ನಡೆಸಿದ್ದರಿಂದ ಆಟಗಾರರಿಗೆ ಉತ್ತಮ ಪಿಚ್‌ಗಳಲ್ಲಿ ಅಭ್ಯಾಸ ಮಾಡುವ ಅವಕಾಶ ದೊರಕಿತು. “ನಾನು ಇದುವರೆಗೆ ಇಷ್ಟು ಉತ್ತಮ ಶಿಬಿರವನ್ನು ನೋಡಿಲ್ಲ” ಎಂದು ಲಿಟನ್ ಮೆಚ್ಚುಗೆ ವ್ಯಕ್ತಪಡಿಸಿದರು.
ಆಟಗಾರರಿಗೆ ನೀಡಲಾದ ಪಂದ್ಯಾವಕಾಶದ ಮಹತ್ವವನ್ನೂ ಅವರು ಒತ್ತಿಹೇಳಿದರು. “ಅಭ್ಯಾಸ ಮುಖ್ಯ, ಆದರೆ ಪಂದ್ಯದಲ್ಲಿನ ಪ್ರದರ್ಶನವೇ ನಿಜವಾದ ತಯಾರಿ. ಬಹುತೇಕ ಪ್ರತಿಯೊಬ್ಬರೂ ಕನಿಷ್ಠ ಒಂದು ಪಂದ್ಯದಲ್ಲಿ ಕೊಡುಗೆ ನೀಡಿದ್ದಾರೆ. ಇದು ನಮ್ಮ ತಂಡಕ್ಕೆ ವಿಶ್ವಾಸ ತುಂಬಿದೆ” ಎಂದರು.
ಅವರ ಪ್ರಕಾರ, ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಉತ್ತಮವಾಗಿ ಆಡಿರುವುದರಿಂದ ಮಧ್ಯಮ ಕ್ರಮಾಂಕಕ್ಕೆ ಹೆಚ್ಚು ಅವಕಾಶ ಸಿಗಲಿಲ್ಲ. ಆದರೆ ಇದನ್ನು ಅವರು ಸಕಾರಾತ್ಮಕವಾಗಿ ಕಂಡಿದ್ದಾರೆ. “ಏಷ್ಯಾಕಪ್‌ನಲ್ಲಿ ಪ್ರತಿಯೊಬ್ಬರೂ ಬ್ಯಾಟಿಂಗ್ ಮಾಡುವ ದಿನ ಬರುತ್ತದೆ, ಆದರೆ ಈಗಾಗಲೇ ನಮ್ಮ ಟಾಪ್ ಆರ್ಡರ್ ಬಲವಾಗಿ ಆಡಿರುವುದು ಒಳ್ಳೆಯ ಲಕ್ಷಣ” ಎಂದು ಲಿಟನ್ ಹೇಳಿದರು.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
