ನವದೆಹಲಿ, 20 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಎಚ್-1ಬಿ ವೀಸಾ ಶುಲ್ಕವನ್ನು 1 ಲಕ್ಷ ಡಾಲರ್ (ಸುಮಾರು ರೂ. 90 ಲಕ್ಷ) ಗೆ ಏರಿಸುವ ಪ್ರಸ್ತಾಪವನ್ನು ಲೋಕ ಸಭೆಯಲ್ಲಿನ ಕಾಂಗ್ರೆಸ್ ಉಪನಾಯಕ ಗೌರವ್ ಗೊಗೊಯ್ ತೀವ್ರವಾಗಿ ಖಂಡಿಸಿದ್ದಾರೆ.

ಅವರು ಈ ಕ್ರಮವನ್ನು ಭಾರತದ ಪ್ರತಿಭಾನ್ವಿತ ವೃತ್ತಿಪರರ ಭವಿಷ್ಯಕ್ಕೆ ಹೊಡೆತ ಎಂದಿದ್ದು, “ಅಮೆರಿಕದ ನಿರ್ಧಾರವು ಭಾರತದ ಅತ್ಯುತ್ತಮ ಬುದ್ಧಿವಂತರ ಹಿತಾಸಕ್ತಿಗೆ ಹಾನಿಕಾರಕವಾಗಿದೆ” ಎಂದು ಎಕ್ಸ್-ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.

ಇದೇ ವೇಳೆ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಮೌನವನ್ನು ಅವರು ಟೀಕಿಸಿ, “ಮಾಜಿ ಪ್ರಧಾನಿ ಡಾ. ಮನಮೋಹನ್ ಸಿಂಗ್ ಭಾರತೀಯ ರಾಜತಾಂತ್ರಿಕರು ಅವಮಾನಿತರಾದಾಗ ದೇಶದ ಪರವಾಗಿ ಧ್ವನಿ ಎತ್ತಿದ್ದರು. ಆದರೆ ಇಂದಿನ ಪ್ರಧಾನಿ ಮೌನವಾಗಿರುವುದು ರಾಷ್ಟ್ರೀಯ ಹಿತಾಸಕ್ತಿಗೆ ವಿರೋಧ” ಎಂದು ಆರೋಪಿಸಿದ್ದಾರೆ.

ಪ್ರಸ್ತುತ ಎಚ್-1ಬಿ ವೀಸಾ ನೋಂದಣಿ ಶುಲ್ಕ $215 (ಸುಮಾರು ರೂ. 19,000), ಫಾರ್ಮ್ 129 ಶುಲ್ಕ $780 (ಸುಮಾರು ರೂ. 68,000) ಆಗಿದೆ. ಇತ್ತೀಚೆಗೆ ಯುಎಸ್ ಕಾಂಗ್ರೆಸ್ ಸದಸ್ಯ ಜಿಮ್ ಬ್ಯಾಂಕ್ಸ್ ಮಂಡಿಸಿದ “ಅಮೆರಿಕನ್ ಟೆಕ್ ವರ್ಕ್‌ಫೋರ್ಸ್ ಕಾಯ್ದೆ” ಮಸೂದೆ ವೀಸಾ ಶುಲ್ಕವನ್ನು $60,000 ರಿಂದ $150,000 ರವರೆಗೆ ಹೆಚ್ಚಿಸಲು ಪ್ರಸ್ತಾಪಿಸಿದೆ.

ದತ್ತಾಂಶ ಪ್ರಕಾರ, ಅಮೆರಿಕದಲ್ಲಿ ಎಚ್-1ಬಿ ವೀಸಾ ಹೊಂದಿರುವವರಲ್ಲಿ 71% ಭಾರತೀಯರು, ಚಿಲಿ 11.7% ಹಂಚಿಕೆಯಿಂದ ಎರಡನೇ ಸ್ಥಾನದಲ್ಲಿದೆ. ಜೂನ್ 2025 ರವರೆಗೆ ಅಮೆಜಾನ್ 12,000 ಎಚ್-1ಬಿ ವೀಸಾಗಳನ್ನು ಅನುಮೋದಿಸಿದ್ದು, ಮೈಕ್ರೋಸಾಫ್ಟ್ ಮತ್ತು ಮೆಟಾ ತಲಾ 5,000 ವೀಸಾಗಳನ್ನು ಪಡೆದಿವೆ.

ಈ ಶುಲ್ಕ ಏರಿಕೆ ಭಾರತ ಮೂಲದ ಐಟಿ ವೃತ್ತಿಪರರು ಹಾಗೂ ಅಮೆರಿಕನ್ ತಂತ್ರಜ್ಞಾನ ಕಂಪನಿಗಳಿಗೆ ಹೊಸ ಸವಾಲುಗಳನ್ನು ಉಂಟು ಮಾಡಲಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa