ನಾಗ್ಪುರ್, 31 ಜುಲೈ (ಹಿ.ಸ.) :

ಆ್ಯಂಕರ್ : ರಾಷ್ಟ್ರೀಯ ಸೇವಿಕಾ ಸಮಿತಿಯ ಮಾಜಿ ಮುಖ್ಯಸ್ಥೆ ಪ್ರಮೀಳಾ ತಾಯಿ ಮೇಧೆ ೯೭ನೇ ವಯಸ್ಸಿನಲ್ಲಿ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಿಧನರಾಗಿದ್ದಾರೆ.

ಮಹಾರಾಷ್ಟ್ರದ ನಂದೂರ್ಬಾರ್ ಜಿಲ್ಲೆಯಲ್ಲಿ ಜನಿಸಿದ ಪ್ರಮೀಳಾ ತಾಯಿ, ಬಾಲ್ಯದಲ್ಲಿಯೇ ಸಮಿತಿಯ ಸಂಸ್ಥಾಪಕಿ ಲಕ್ಷ್ಮಿಬಾಯಿ ಕೇಳ್ಕರ್ (ಮೌಸಿಜಿ) ಅವರ ಪ್ರಭಾವದಿಂದ ರಾಷ್ಟ್ರ ಸೇವಾ ತಪಸ್ಸಿಗೆ ತಮ್ಮ ಜೀವನವನ್ನೇ ಅರ್ಪಿಸಿದ್ದರು.

ಅವರು ಪದವಿ ಹಾಗೂ ಶಿಕ್ಷಕ ತರಬೇತಿ ಪಡೆದ ನಂತರ ನಾಗ್ಪುರದ ಶಾಲೆಯಲ್ಲಿ ಶಿಕ್ಷಕಿ ಆಗಿ ಹಾಗೂ ನಂತರ ಹಿರಿಯ ಲೆಕ್ಕಪರಿಶೋಧಕರಾಗಿ ಸರ್ಕಾರಿ ನೌಕರರಾಗಿಯೂ ಸೇವೆ ಸಲ್ಲಿಸಿದರು. ಆದರೆ ಸಮಿತಿಯ ಕಾರ್ಯದಲ್ಲಿ ತೊಡಗಿಕೊಳ್ಳಲು ಅವರು ಸ್ವಯಂ ನಿವೃತ್ತಿ ಹೊಂದಿದರು.

ಶಾಖಾ ಮಟ್ಟದಿಂದ ಆರಂಭಿಸಿ ನಗರ, ವಿಭಾಗ, ರಾಜ್ಯ ಹಾಗೂ ರಾಷ್ಟ್ರೀಯ ಮಟ್ಟದ ಜವಾಬ್ದಾರಿಗಳನ್ನು ನಿರ್ವಹಿಸಿದ ಪ್ರಮೀಳಾ ತಾಯಿ, 1978 ರಿಂದ 2003ರವರೆಗೆ ಅಖಿಲ ಭಾರತ ಉಸ್ತುವಾರಿ ಅಧಿಕಾರಿಯಾಗಿ 25 ವರ್ಷಗಳ ಕಾಲ ಸೇವೆ ಸಲ್ಲಿಸಿದರು. ಈ ಅವಧಿಯಲ್ಲಿ ಅವರು ಇಂಗ್ಲೆಂಡ್, ಅಮೆರಿಕ, ಕೆನಡಾ ಹಾಗೂ ದಕ್ಷಿಣ ಆಫ್ರಿಕಾದ ಡರ್ಬನ್ ಮುಂತಾದ ದೇಶಗಳಿಗೆ ಭೇಟಿ ನೀಡಿ ಸಮಿತಿಯ ಚಟುವಟಿಕೆಯನ್ನು ವಿಸ್ತರಿಸಿದರು.

2003ರ ಫೆಬ್ರವರಿಯಿಂದ ಸಮಿತಿಯ ಸಹ-ಮುಖ್ಯ ನಿರ್ದೇಶಕರಾಗಿ ಕಾರ್ಯನಿರ್ವಹಿಸಿದ ಅವರು, 2003ರ ಆಗಸ್ಟ್ 2ರಿಂದ 2004ರ ಮೇ 2ರವರೆಗೆ 266 ದಿನಗಳ ಕಾಲ ದೇಶದಾದ್ಯಂತ ಪ್ರಚಾರ ಯಾತ್ರೆ ನಡೆಸಿದರು. ಸುಮಾರು 28,000 ಕಿ.ಮೀ ದೂರ ಪ್ರಯಾಣಿಸಿ, ಮಹಿಳಾ ಶಕ್ತಿ ಮತ್ತು ರಾಷ್ಟ್ರೀಯ ಚೇತನೆಯ ಸಂದೇಶವನ್ನು ನೀಡಿದ ಅವರು, ನ್ಯೂಜೆರ್ಸಿಯ ಮೇಯರ್ ರವರಿಂದ ಗೌರವ ಪೌರತ್ವ ಗೌರವವನ್ನೂ ಪಡೆದಿದ್ದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa