ಗದಗ, 21 ಜುಲೈ (ಹಿ.ಸ.) :

ಆ್ಯಂಕರ್ : ಗದಗ ಜಿಲ್ಲೆ ನರಗುಂದ ಪಟ್ಟಣದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಮಾಜಿ ಸಚಿವ ಹಾಗೂ ಶಾಸಕ ಸಿ.ಸಿ. ಪಾಟೀಲ ಅವರು ಮಹದಾಯಿ ಯೋಜನೆ ಜಾರಿಗೆ ಬಿಜೆಪಿ ನೇತೃತ್ವದ ಸರ್ಕಾರ ಮೊದಲ ಹೆಜ್ಜೆ ಇಟ್ಟಿತ್ತು ಎಂದು ಹೇಳಿದರು.

ರೈತ ಬಂಡಾಯದ ಹುತಾತ್ಮ ಈರಪ್ಪ ಕೊಡ್ಲಿಕೊಪ್ಪ ಪುತ್ಥಳಿ ನಿರ್ಮಾಣದ ಪ್ರಸ್ತಾಪಕ್ಕೂ ಧ್ವನಿ ನೀಡಿದರು.

“ಹುತಾತ್ಮ ರೈತ ಈರಪ್ಪ ಕೊಡ್ಲಿಕೊಪ್ಪ ಅವರ ಪುತ್ಥಳಿ ನಿರ್ಮಾಣಕ್ಕೆ ಸ್ಥಳ ನೀಡಿದವರು ಶ್ಲಾಘನೀಯರು. ಅವರಿಗೆ ನಾನು ಧನ್ಯವಾದ ಹೇಳುತ್ತೇನೆ,” ಎಂದು ಅವರು ಶ್ರದ್ಧಾಂಜಲಿ ಸಲ್ಲಿಸಿದರು.

ಮಹದಾಯಿ ಕಳಸಾ-ಬಂಡೂರಿ ಯೋಜನೆಯ ಕುರಿತು ಮಾತನಾಡುತ್ತ, “ಈ ಯೋಜನೆಗೆ ಚಾಲನೆ ನೀಡಿದ್ದು ಬಿಜೆಪಿ. ಬಿ.ಎಸ್. ಯಡಿಯೂರಪ್ಪ ಅವರು 100 ಕೋಟಿ ಅನುದಾನ ಬಿಡುಗಡೆ ಮಾಡಿದ್ದರು. ಕೆ.ಎಸ್. ಈಶ್ವರಪ್ಪ ಅವರು ಕನಕುಂಬಿಯಲ್ಲಿ ಭೂಮಿ ಪೂಜೆ ನೆರವೇರಿಸಿದ್ದರು. ಯೋಜನೆಗೆ ವಿಳಂಬವಾಗಿರುವುದಕ್ಕೆ ಗೋವಾದ ವಿರೋಧ ಕಾರಣವಾಗಿದೆ,” ಎಂದು ಹೇಳಿದರು.

“ಈ ಯೋಜನೆಯಲ್ಲಿ ನಾನು ರಾಜಕೀಯ ಮಾಡುವುದಿಲ್ಲ. ಯೋಜನೆಯನ್ನು ಮುಗಿಸುವ ಜವಾಬ್ದಾರಿ ಕೂಡ ಬಿಜೆಪಿ ತೆಗೆದುಕೊಂಡಿದೆ. ಯೋಜನೆ ಜಾರಿಗೆ ಕೇಂದ್ರ ಸರ್ಕಾರವನ್ನು ಮನವೊಲಿಸುತ್ತೇವೆ,” ಎಂದು ಅವರು ಭರವಸೆ ನೀಡಿದರು.

ಪಂಚಮಸಾಲಿ ಮೀಸಲಾತಿ ಹೋರಾಟ ಕುರಿತು ಮಾತನಾಡಿದ ಪಾಟೀಲ, ಶ್ರೀ ಕೂಡಲಸಂಗಮ ಜಯ ಮೃತ್ಯುಂಜಯ ಸ್ವಾಮೀಜಿ ಮತ್ತು ಶಾಸಕ ಕಾಶಪ್ಪನವರ್ ನಡುವಿನ ಭಿನ್ನಾಭಿಪ್ರಾಯ ಸಮಾಜದಲ್ಲಿ ಚರ್ಚೆಗೆ ಕಾರಣವಾಗಿದೆ. ಈ ಭಿನ್ನಾಭಿಪ್ರಾಯ ಬಗೆಹರಿಯಬೇಕು ಎಂಬುದು ಸಮುದಾಯದ ಇಚ್ಛೆ, ಎಂದು ಹೇಳಿದರು.

“ಶ್ರೀಗಳಿಗೆ ಆಗಿದ್ದ ಆರೋಗ್ಯ ಸಮಸ್ಯೆಯಿಂದ ಅವರು ಆಸ್ಪತ್ರೆಗೆ ದಾಖಲಾಗಿದ್ದರು. ಈಗ ಅವರ ಆರೋಗ್ಯ ಸುಧಾರಿಸಿದೆ. ಶ್ರೀಗಳು ಮತ್ತು ಶಾಸಕ ಇಬ್ಬರೂ ಎರಡು ಹೆಜ್ಜೆ ಹಿಂದೆ ಸರಿದರೆ ಸಮಸ್ಯೆ ಬಗೆಹರಿಯುವುದು ಸುಲಭವಾಗುತ್ತದೆ,” ಎಂದು ಅಭಿಪ್ರಾಯಪಟ್ಟರು.

ಸಂಧಾನ ಸಾಧ್ಯವಾಗದಿದ್ದರೆ, ಮೂಲಪೀಠವನ್ನು ಅಲ್ಲಿಯೇ ಇಟ್ಟು ಬೇರೆಡೆ ಶಾಖಾಮಠ ಸ್ಥಾಪನೆ ಮಾಡುವ ಯೋಚನೆ ಇದೆ. ಶ್ರೀಗಳಿಗೆ ನಾವು ಬೆನ್ನೆಲುಬಾಗಿ ನಿಲ್ಲುತ್ತೇವೆ, ಎಂಬ ಭರವಸೆಯನ್ನೂ ವ್ಯಕ್ತಪಡಿಸಿದರು.

ಆಕಸ್ಮಿಕವಾಗಿ ಶಾಸಕರಿಂದ ಕೊಟ್ಟ '24 ಗಂಟೆಗಳಲ್ಲಿ ಮೀಸಲಾತಿ' ಹೇಳಿಕೆಯನ್ನು ನುಡಿದ ಪಾಟೀಲ, “ಅವರು ಕೆಲಸದ ಒತ್ತಡದಲ್ಲಿ ಅದು ಮರೆಯಬಹುದು. ಆದರೆ ಅವರು ಈಗಲಾದರೂ ಮೀಸಲಾತಿ ಕೊಡಿಸಿದರೆ, ಸಮಾಜ ಅವರನ್ನು ಎಂದಿಗೂ ಮರೆತಿರದು,” ಎಂದು ವ್ಯಂಗ್ಯ ಭರಿತವಾಗಿ ಪ್ರತಿಕ್ರಿಯಿಸಿದರು.

---------------

ಹಿಂದೂಸ್ತಾನ್ ಸಮಾಚಾರ್ / Lalita Manjunath Pattar