ತೈಪೆ (ತೈವಾನ್), 15 ಜುಲೈ (ಹಿ.ಸ.) :
ಆ್ಯಂಕರ್ : ಚೀನಾ ತನ್ನ ವಿಸ್ತರಣಾ ನೀತಿಯನ್ನು ನಿರಂತರವಾಗಿ ಮುಂದುವರೆಸುತ್ತಿದ್ದು, ಇದೀಗ ತೈವಾನ್‌ನ ಭದ್ರತೆ ಮತ್ತೊಮ್ಮೆ ಸವಾಲಿಗೆ ಒಳಗಾಗಿದೆ. ಮಂಗಳವಾರ ಬೆಳಿಗ್ಗೆ 6 ಗಂಟೆಗೆ (ತೈವಾನ್ ಸ್ಥಳೀಯ ಸಮಯ), ತೈವಾನ್‌ನ ರಾಷ್ಟ್ರೀಯ ರಕ್ಷಣಾ ಸಚಿವಾಲಯದ ಮಾಹಿತಿಯ ಪ್ರಕಾರ 26 ಚೀನೀ ಮಿಲಿಟರಿ ವಿಮಾನಗಳು, 7 ನೌಕಾ ಹಡಗುಗಳು, ಮತ್ತು 1 ಅಧಿಕೃತ ಹಡಗು ತೈವಾನ್ ಸುತ್ತಲಿನ ವಾಯು ಮತ್ತು ಸಮುದ್ರ ಪ್ರದೇಶಗಳಲ್ಲಿ ಚಟುವಟಿಕೆ ನಡೆಸಿದವು.
ಈ 26 ಮಿಲಿಟರಿ ವಿಮಾನಗಳಲ್ಲಿ 21 ವಿಮಾನಗಳು ತೈವಾನ್ ನಾರ್ತ್, ಸೌತ್‌ವೆಸ್ಟ್ ಹಾಗೂ ಈಸ್ಟ್ ಏಡಿಜ್ ಪ್ರದೇಶವನ್ನು ದಾಟಿವೆ. ವಿಮಾನಗಳು ಮಧ್ಯರೇಖೆಯನ್ನು ಮೀರಿ ತೈವಾನ್‌ನ ಹತ್ತಿರ ನುಸುಳಿದ ಕಾರಣ, ತೈವಾನ್ ತನ್ನ ವಿಮಾನ, ನೌಕಾ ಹಡಗು ಹಾಗೂ ಕರಾವಳಿ ಕ್ಷಿಪಣಿ ವ್ಯವಸ್ಥೆಗಳನ್ನು ತಕ್ಷಣ ನಿಯೋಜಿಸಿದೆ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
ತೈವಾನ್ ಸಶಸ್ತ್ರ ಪಡೆಗಳು ರಾತ್ರಿಯಲ್ಲಿ ರನ್‌ವೇ ದುರಸ್ತಿ ವ್ಯಾಯಾಮ ಹಾಗೂ ದೂರದ ದ್ವೀಪಗಳಲ್ಲಿ ತುರ್ತು ಲೈವ್ ಫೈರ್ ವ್ಯಾಯಾಮಗಳನ್ನು ನಡೆಸಿದವು ಎಂದು ತಿಳಿಸಲಾಗಿದೆ. ಈ ಕಾರ್ಯಾಚರಣೆಗಳು ತೈವಾನ್‌ನ ತುರ್ತು ಪ್ರತಿಕ್ರಿಯೆ ಸಾಮರ್ಥ್ಯ ಹೆಚ್ಚಿಸುವ ಉದ್ದೇಶ ಹೊಂದಿವೆ.
ಜುಲೈ 12 ರಂದು ಸಹ ಇದೇ ರೀತಿಯ ಅತಿಕ್ರಮಣವನ್ನು ಚೀನಾ ನಡೆಸಿತ್ತು. ಆ ದಿನ 14 ಮಿಲಿಟರಿ ವಿಮಾನಗಳು, 9 ನೌಕಾ ಹಡಗುಗಳು ಹಾಗೂ 1 ಅಧಿಕೃತ ಹಡಗು ತೈವಾನ್ ಸುತ್ತಲಿನ ಪ್ರದೇಶಗಳಲ್ಲಿ ಕಂಡುಬಂದಿದ್ದವು.
ಇದಕ್ಕೆ ಅನುರೂಪವಾಗಿ ತೈಪೆ ಟೈಮ್ಸ್ ಪತ್ರಿಕೆಯ ವರದಿ ಪ್ರಕಾರ, ಚೀನಾದ ನೌಕೆಗಳು ತೈವಾನ್ ಸುತ್ತಲಿನ ಸಮುದ್ರ ತಳಭಾಗವನ್ನು ಮ್ಯಾಪಿಂಗ್ ಮಾಡುತ್ತಿರುವ ಶಂಕೆ ಇದೆ. ಇದು ಮುಂದಿನ ದಿನಗಳಲ್ಲಿ ಸಮುದ್ರ ತಳದ ಕೇಬಲ್‌ಗಳನ್ನು ಇಡಲು ಮತ್ತು ಮಿಲಿಟರಿ ಉದ್ದೇಶಗಳಿಗಾಗಿ ಬಳಸಲು ಸಾಧ್ಯವಾಗುತ್ತದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
