ನವದೆಹಲಿ, 06 ಡಿಸೆಂಬರ್ (ಹಿ.ಸ.) :
ಆ್ಯಂಕರ್ : ದೇಶದ ಅತಿದೊಡ್ಡ ವಿಮಾನಯಾನ ಸಂಸ್ಥೆ ಇಂಡಿಗೋ ಎದುರಿಸುತ್ತಿರುವ ಕಾರ್ಯಾಚರಣಾ ಅಸ್ತವ್ಯಸ್ತತೆ ನಿಧಾನವಾಗಿ ಸರಾಗವಾಗುತ್ತಿರುವ ಸೂಚನೆಗಳು ಕಂಡು ಬಂದಿವೆ. ದೆಹಲಿ ವಿಮಾನ ನಿಲ್ದಾಣ ಪ್ರಾಧಿಕಾರ ತಡರಾತ್ರಿ ನೀಡಿದ ಪ್ರಕಟಣೆಯಲ್ಲಿ, ಇಂಡಿಗೋ ಸೇವೆಗಳು “ಮತ್ತೆ ಹಳಿಗೆ ಮರಳಲು ಆರಂಭವಾಗಿವೆ” ಎಂದು ತಿಳಿಸಿತು.
ಕಳೆದ ನಾಲ್ಕು ದಿನಗಳಿಂದ ದೆಹಲಿ, ಮುಂಬೈ, ಅಹಮದಾಬಾದ್, ಜೈಪುರ, ಇಂದೋರ್ ಮತ್ತು ತಿರುವನಂತಪುರಂ ಸೇರಿದಂತೆ ದೇಶದ ಅನೇಕ ವಿಮಾನ ನಿಲ್ದಾಣಗಳಲ್ಲಿ ವಿಮಾನ ರದ್ದತಿ–ವಿಳಂಬದಿಂದ ಸಾವಿರಾರು ಪ್ರಯಾಣಿಕರು ಸಂಕಷ್ಟಕ್ಕೆ ಸಿಲುಕಿದ್ದರು.
ಶುಕ್ರವಾರ ಮಾತ್ರ ಇಂಡಿಗೋ 1,000 ಕ್ಕೂ ಹೆಚ್ಚು ವಿಮಾನಗಳನ್ನು ರದ್ದುಗೊಳಿಸಿತ್ತು ಇದು ಅದರ ದೈನಂದಿನ ಸೇವೆಗಳ ಅರ್ಧದಷ್ಟಾಗಿದೆ. ಸಿಬ್ಬಂದಿ ಕೊರತೆ ಈ ಅಸ್ತವ್ಯಸ್ತತೆಗೆ ಪ್ರಮುಖ ಕಾರಣವಾಗಿದೆ.
ತುರ್ತು ಪರಿಸ್ಥಿತಿಯನ್ನು ಗಮನಿಸಿ, ವಿಮಾನಯಾನ ನಿಯಂತ್ರಕ ಡಿಜಿಸಿಎ ಇಂಡಿಗೋಗೆ ಪೈಲಟ್ ಕರ್ತವ್ಯದ ಸಮಯ ಮತ್ತು ಇತರ ನಿಯಮಗಳಲ್ಲಿ ಸಡಿಲಿಕೆಗಳನ್ನು ನೀಡಿದೆ. ಇದರಿಂದ ಹೆಚ್ಚುವರಿ ಸಿಬ್ಬಂದಿ ನಿಯೋಜನೆ ಸಾಧ್ಯವಾಗಿ, ಕಾರ್ಯಾಚರಣೆ ಸಾಮಾನ್ಯಗೊಳ್ಳಲು ನೆರವಾಗುತ್ತಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್ ತಡರಾತ್ರಿ ನೀಡಿದ ಹೇಳಿಕೆಯಲ್ಲಿ ಪ್ರಯಾಣಿಕರಿಗೆ ಕ್ಷಮೆಯಾಚಿಸಿ, ಡಿಸೆಂಬರ್ 10–15ರೊಳಗೆ ಕಾರ್ಯಾಚರಣೆ ಸಂಪೂರ್ಣ ಸಾಮಾನ್ಯಗೊಳ್ಳುತ್ತದೆ ಎಂದು ಭರವಸೆ ನೀಡಿದ್ದಾರೆ. “ಇಂದು (ಶನಿವಾರ) ರದ್ದಾಗುವ ವಿಮಾನಗಳ ಸಂಖ್ಯೆ 1,000 ಕ್ಕಿಂತ ಕಡಿಮೆ ಇರುತ್ತದೆ” ಎಂದಿದ್ದಾರೆ.
ಇದೀಗ ಸೇವೆಗಳು ಸರಾಗಗೊಳ್ಳಲು ಪ್ರಾರಂಭಿಸಿದ್ದರೂ, ಚೆನ್ನೈ, ಅಹಮದಾಬಾದ್, ಲಕ್ನೋ, ಭೋಪಾಲ್ ಸೇರಿದಂತೆ ಹಲವಾರು ನಗರಗಳಲ್ಲಿ ಇನ್ನೂ ವಿಳಂಬಗಳು ಮುಂದುವರಿದಿವೆ.
ಈ ನಡುವೆ, ಇಂಡಿಗೋ ಬಿಕ್ಕಟ್ಟಿನ ಪರಿಣಾಮವಾಗಿ ವಿಮಾನ ದರಗಳು ಗಗನಕ್ಕೇರಿವೆ. ಕೋಲ್ಕತ್ತಾ–ಮುಂಬೈ ಸ್ಪೈಸ್ಜೆಟ್ ಏಕಮುಖ ಟಿಕೆಟ್ 90,000 ರೂ. ತಲುಪಿದ್ದು, ಏರ್ ಇಂಡಿಯಾದ ಮುಂಬೈ–ಭುವನೇಶ್ವರ ದರ 84,485 ರೂ.ಗಳಿಗೆ ಏರಿದೆ. ಸಾಮಾನ್ಯಕ್ಕಿಂತ ಮೂರು–ನಾಲ್ಕು ಪಟ್ಟು ಹೆಚ್ಚಿನ ದರಗಳು ಪ್ರಯಾಣಿಕರನ್ನು ಮತ್ತಷ್ಟು ಸಂಕಷ್ಟಕ್ಕೆ ತಳ್ಳಿವೆ.
ದೇಶೀಯ ವಿಮಾನ ಸಂಚಾರದ ಎರಡು–ಮೂರನೇ ಭಾಗವನ್ನು ಹೊತ್ತು ಸಾಗುವ ಇಂಡಿಗೋ, ಸಾಮಾನ್ಯವಾಗಿ ದಿನಕ್ಕೆ 2,300 ವಿಮಾನಗಳನ್ನು ನಡೆಸುತ್ತದೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
