ಬೆಂಗಳೂರು, 09 ನವೆಂಬರ್ (ಹಿ.ಸ.) :
ಆ್ಯಂಕರ್ : 11ನೇ ಭಾರತೀಯ ತೋಟಗಾರಿಕಾ ಕಾಂಗ್ರೆಸ್ ಹಾಗೂ ಅಂತರಾಷ್ಟ್ರೀಯ ಸಭೆಯು ಬೆಂಗಳೂರಿನ ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯ, ಜಿಕೆವಿಕೆ ಆವರಣದಲ್ಲಿ ಇಂದು ಯಶಸ್ವಿಯಾಗಿ ಸಂಪನ್ನಗೊಂಡಿತು. ಇಂಡಿಯನ್ ಅಕಾಡೆಮಿ ಆಫ್ ಹಾರ್ಟಿಕಲ್ಚರಲ್ ಸೈನ್ಸಸ್ ಆಶ್ರಯದಲ್ಲಿ ನವೆಂಬರ್ 6 ರಿಂದ 9ರವರೆಗೆ ನಡೆದ ಈ ನಾಲ್ಕು ದಿನಗಳ ಕಾಂಗ್ರೆಸ್ “ಸಮಗ್ರ, ಸಮಾನ ಮತ್ತು ಸುಸ್ಥಿರ ಬೆಳವಣಿಗೆಗಾಗಿ ತೋಟಗಾರಿಕೆ” ಎಂಬ ವಿಷಯದ ಸುತ್ತ ಕೇಂದ್ರೀಕೃತವಾಗಿತ್ತು.
ಕಾರ್ಯಕ್ರಮದಲ್ಲಿ ದೇಶದ ವಿವಿಧ ರಾಜ್ಯಗಳಿಂದ 1,225ಕ್ಕೂ ಹೆಚ್ಚು ಪ್ರತಿನಿಧಿಗಳು ಹಾಗೂ 20 ವಿದೇಶಿ ರಾಷ್ಟ್ರಗಳಿಂದ 30 ಸಂಶೋಧಕರು ಭಾಗವಹಿಸಿದ್ದರು. ವಿಜ್ಞಾನಿಗಳು, ಉದ್ಯಮಿಗಳು, ನೀತಿ ನಿರೂಪಕರು, ವಿದ್ಯಾರ್ಥಿಗಳು ಮತ್ತು ಪ್ರಗತಿಪರ ರೈತರು ಒಂದೇ ವೇದಿಕೆಯಲ್ಲಿ ತೋಟಗಾರಿಕಾ ಕ್ಷೇತ್ರದ ಸವಾಲು ಹಾಗೂ ಅವಕಾಶಗಳ ಕುರಿತು ಚರ್ಚೆ ನಡೆಸಿದರು.
ಸಭೆಯ ಸಹಾಧ್ಯಕ್ಷರು ಹಾಗೂ ಐಸಿಎಆರ್‌ನ ಉಪ ಮಹಾನಿರ್ದೇಶಕರು (ಕೃಷಿ ವಿಸ್ತರಣೆ) ಡಾ. ರಾಜ್‌ಬೀರ್ ಸಿಂಗ್ ಅವರು ಭಾರತ ಸರ್ಕಾರದ “ಕ್ಲೀನ್ ಪ್ಲಾಂಟ್ ಕಾರ್ಯಕ್ರಮ” ತೋಟಗಾರಿಕೆಗೆ ಹೊಸ ಆಯಾಮ ನೀಡಲಿದೆ ಎಂದು ತಿಳಿಸಿದರು. “ಮೌಲ್ಯವರ್ಧನೆ, ಕೌಶಲ್ಯ ಅಭಿವೃದ್ಧಿ ಮತ್ತು ಖಾಸಗಿ ವಲಯದ ಪಾಲ್ಗೊಳ್ಳುವಿಕೆಗಳು ರೈತರ ಆದಾಯ ಹೆಚ್ಚಿಸಲು ಪ್ರಮುಖ ಅಂಶಗಳು,” ಎಂದು ಅವರು ಹೇಳಿದರು. ಜೊತೆಗೆ, ದೇಶದಾದ್ಯಂತ ಜೈವಿಕ ನಿಯಂತ್ರಣ ವ್ಯವಸ್ಥೆಗಳನ್ನು ಪುನರಾವರ್ತಿಸುವ ಅಗತ್ಯವಿದೆ ಎಂದರು.
ಐಸಿಎಆರ್‌ನ ಉಪ ಮಹಾನಿರ್ದೇಶಕರು (ತೋಟಗಾರಿಕಾ ವಿಜ್ಞಾನ) ಡಾ. ಎಸ್.ಕೆ. ಸಿಂಗ್ ಅವರು ಈ ಕಾಂಗ್ರೆಸ್ ಸಹಯೋಗದ ತೋಟಗಾರಿಕಾ ಸಂಶೋಧನೆ “ಮೈಲಿಗಲ್ಲು” ಎಂದು ವಿಶ್ಲೇಷಿಸಿದರು. “ಭೂತಕಾಲದಿಂದ ಕಲಿಯುವುದು, ವರ್ತಮಾನಕ್ಕೆ ಹೊಸತನ ತರುವುದು ಮತ್ತು ಭವಿಷ್ಯಕ್ಕೆ ಸ್ಫೂರ್ತಿ ನೀಡುವುದು — ಇದೇ IHC–2025 ರ ಆತ್ಮ,” ಎಂದರು.
ವಿಯೆಟ್ನಾಂನ ಸದರ್ನ್ ಹಾರ್ಟಿಕಲ್ಚರಲ್ ರಿಸರ್ಚ್ ಇನ್‌ಸ್ಟಿಟ್ಯೂಟ್‌ನ ಮಹಾನಿರ್ದೇಶಕ ಡಾ. ನ್ಗುಯೆನ್ ವ್ಯಾನ್ ಹೋವಾ ಅವರು ಭಾರತದಲ್ಲಿ ನಡೆದ ಈ ಸಮ್ಮೇಳನವನ್ನು “ಅಂತಾರಾಷ್ಟ್ರೀಯ ಕಲಿಕೆಯ ವೇದಿಕೆ” ಎಂದು ಕೊಂಡಾಡಿದರು.
ಕಾರ್ಯಕ್ರಮದ ಅಂತ್ಯದಲ್ಲಿ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಡಾ. ವಿ.ಬಿ. ಪಟೇಲ್ ಅವರು ಅತ್ಯುತ್ತಮ ಮೌಖಿಕ, ಪೋಸ್ಟರ್ ಮತ್ತು ಪ್ರದರ್ಶನ ಸ್ಟಾಲ್ ಪ್ರಶಸ್ತಿಗಳನ್ನು ವಿತರಿಸಿದರು.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
