ಮುಂಬಯಿ, 24 ನವೆಂಬರ್ (ಹಿ.ಸ.) :

ಆ್ಯಂಕರ್ : ಭಾರತೀಯ ಚಿತ್ರರಂಗದ ‘ಹೀ-ಮ್ಯಾನ್’ ಎಂದೇ ಖ್ಯಾತರಾಗಿದ್ದ ಹಿರಿಯ ನಟ ಧರ್ಮೇಂದ್ರ (89) ಇಂದು ನಿಧನರಾಗಿದ್ದಾರೆ. ಕೆಲಕಾಲದಿಂದ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದ ಅವರನ್ನು ಮೊದಲು ಮುಂಬೈನ ಬ್ರೀಚ್ ಕ್ಯಾಂಡಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಬಳಿಕ ಮನೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ನಡೆಯುತ್ತಿದ್ದರೂ ಇಂದು ಬೆಳಿಗ್ಗೆ ಅವರು ಕೊನೆಯುಸಿರೆಳೆದರು.

ಧರ್ಮೇಂದ್ರ ಅವರ ನಿಧನದಿಂದ ಭಾರತೀಯ ಚಿತ್ರರಂಗ ಶೋಕ ಸಾಗರದಲ್ಲಿ ಮುಳುಗಿದೆ. ನಟ–ನಟಿಯರು, ನಿರ್ದೇಶಕರು ಮತ್ತು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಆಳವಾದ ಸಂತಾಪ ವ್ಯಕ್ತಪಡಿಸಿದ್ದಾರೆ. “ಒಂದು ಯುಗದ ಅಂತ್ಯ” ಎಂದು ಕಾಜೋಲ್, ಕರಣ್ ಜೋಹರ್ ಸೇರಿದಂತೆ ಅನೇಕರು ಸಂತಾಪ ಸೂಚಿಸಿದ್ದು. ಧರ್ಮೇಂದ್ರ ಅವರ ಸರಳತೆ, ಆತ್ಮೀಯತೆ ಮತ್ತು ಪರದೆಯ ಮೇಲಿನ ಅದ್ಭುತ ಹಾಜರಾತಿ ಎಂದಿಗೂ ಮರೆಯಲಾಗದು ಎಂದು ಅವರು ಸ್ಮರಿಸಿದ್ದಾರೆ.

ಪಂಜಾಬಿನ ನಸರಾನಿ ಗ್ರಾಮದಲ್ಲಿ 1935ರಲ್ಲಿ ಜನಿಸಿದ ಧರ್ಮೇಂದ್ರ, 1960ರಲ್ಲಿ ದಿಲ್ ಭೀ ತೆರೆ ಹಮ್ ಭೀ ತೆರೆ ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿ, 65 ವರ್ಷಗಳ ವೃತ್ತಿಜೀವನದಲ್ಲಿ ರೋಮ್ಯಾನ್ಸ್, ಕಾಮಿಡಿ ಮತ್ತು ಆ್ಯಕ್ಷನ್ ಸೇರಿದಂತೆ ಎಲ್ಲಾ ಶೈಲಿಗಳಲ್ಲಿ ಅಳಿಸದ ಗುರುತು ಮೂಡಿಸಿದರು. ಶೋಲೆ, ಚುಪ್ಕೆ ಚುಪ್ಕೆ, ಸೀತಾ ಔರ್ ಗೀತಾ, ಧರ್ಮವೀರ್ ಸೇರಿ ಅನೇಕ ಚಿತ್ರಗಳು ಇಂದಿಗೂ ಹಿಟ್‌ಗಳ ಪಟ್ಟಿಯಲ್ಲಿವೆ.

ಅಭಿಮಾನಿಗಳಿಗೆ ಅವರ ಕೊನೆಯ ಕೃತಿಯಾಗಿ ಇಕ್ಕೀಸ್ ಚಿತ್ರದ ಧ್ವನಿ ಕೇಳಿಸಲಿದೆ. ಡಿಸೆಂಬರ್ 25ರಂದು ಬಿಡುಗಡೆಯಾಗುವ ಈ ಚಿತ್ರದಲ್ಲಿ ಅವರ ಅಂತಿಮ ರೆಕಾರ್ಡಿಂಗ್ ಧರ್ಮೇಂದ್ರ ಅಭಿಮಾನಿಗಳಿಗೆ ಮತ್ತೆ ಒಮ್ಮೆ ನೆನಪು ಮಾಡಲಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa