ಕ್ವೆಟ್ಟಾ, 01 ಡಿಸೆಂಬರ್ (ಹಿ.ಸ.) :
ಆ್ಯಂಕರ್ : ಪಾಕಿಸ್ತಾನದ ಬಲೂಚಿಸ್ತಾನದ ಚಾಗೈ ಜಿಲ್ಲೆಯ ನೋಕ್ ಕುಂಡಿಯಲ್ಲಿರುವ ಫ್ರಂಟಿಯರ್ ಕಾರ್ಪ್ಸ್ ಪ್ರಧಾನ ಕಚೇರಿಯ ಮೇಲೆ ಭಾನುವಾರ ತಡರಾತ್ರಿ ಬಲೂಚಿಸ್ತಾನ್ ಲಿಬರೇಶನ್ ಫ್ರಂಟ್ ಭಾರೀ ದಾಳಿ ನಡೆಸಿ, ಭದ್ರತಾ ವಲಯದಲ್ಲಿ ತೀವ್ರ ಆತಂಕ ಉಂಟುಮಾಡಿದೆ.
ಬಿಎಲ್ ಎಫ್ ನ ಮಹಿಳಾ ಸದಸ್ಯೆ ಜರೀನಾ ರಫೀಕ್ ಅಲಿಯಾಸ್ ‘ತರಂಗ್ ಮಹು’ ತನ್ನ ಮೇಲೆ ಕಟ್ಟಿಕೊಂಡಿದ್ದ ಸ್ಫೋಟಕಗಳನ್ನು ದ್ವಾರದಲ್ಲಿ ಸ್ಫೋಟಿಸಿಕೊಂಡು ಶಿಬಿರದ ಪ್ರವೇಶದ್ವಾರವನ್ನು ಭೇದಿಸಿದ್ದಾಳೆ. ನಂತರ ಮೂವರು ಸಶಸ್ತ್ರ ದಾಳಿಕೋರರು ಆವರಣಕ್ಕೆ ನುಗ್ಗಿದ್ದು, ಇವರನ್ನು ಎಫ್ಸಿ ಪಡೆಗಳು ಹತ್ಯೆ ಮಾಡಿದ್ದಾಗಿ ಅಧಿಕೃತ ಮೂಲಗಳು ತಿಳಿಸಿವೆ.
ಟಿಟಿಪಿ ಈ ದಾಳಿಯ ಜವಾಬ್ದಾರಿಯನ್ನು ಹೊತ್ತರೂ, BLF ತನ್ನ ‘ಸೋಬ್’ ಘಟಕದಿಂದ ದಾಳಿ ನಡೆಸಲಾಗಿದೆ ಎಂದು ಹೇಳಿಕೊಂಡು, ಆತ್ಮಹತ್ಯಾ ಬಾಂಬರ್ನ ಫೋಟೋವನ್ನೂ ಬಿಡುಗಡೆ ಮಾಡಿದೆ.
ಈ ದಾಳಿಯ ಸಮಯದಲ್ಲೇ ಪಂಜ್ಗುರ್ ಜಿಲ್ಲೆಯ ಗುರ್ಮಕನ್ ಪ್ರದೇಶದ ಚೆಕ್ಪೋಸ್ಟ್ ಮೇಲೆಯೂ ಶಸ್ತ್ರಧಾರಿಗಳ ದಾಳಿ ನಡೆದಿದೆ. ಬಲೂಚಿಸ್ತಾನದ ಹಲವು ಜಿಲ್ಲೆಗಳಲ್ಲಿ ಕಳೆದ 24 ಗಂಟೆಗಳಲ್ಲಿ 23 ಕ್ಕಿಂತ ಹೆಚ್ಚು ದಾಳಿ ನಡೆದಿದ್ದು, ರೈಲ್ವೆ ಹಳಿಗಳು, ಸರ್ಕಾರಿ ಕಚೇರಿಗಳು ಹಾಗೂ ಸೇನಾ ಶಿಬಿರಗಳು ಗುರಿಯಾಗಿವೆ.
ಕ್ವೆಟ್ಟಾ, ಡೇರಾ ಮುರಾದ್ ಜಮಾಲಿ ಮತ್ತು ಇತರ ಪ್ರದೇಶಗಳಲ್ಲಿ ನಡೆದ ಸ್ಫೋಟಗಳಿಂದ ರೈಲು ಸಂಚಾರ ಅಸ್ತವ್ಯಸ್ತಗೊಂಡಿದೆ. ಪೇಶಾವರದ ಫೆಡರಲ್ ಕಾನ್ಸ್ಟಾಬ್ಯುಲರಿ ಪ್ರಧಾನ ಕಚೇರಿಯಲ್ಲೂ ಆತ್ಮಹತ್ಯಾ ದಾಳಿ ನಡೆದಿದ್ದು ಮೂರು ಸೈನಿಕರು ಸಾವನ್ನಪ್ಪಿದ್ದಾರೆ.
ಪಾಕಿಸ್ತಾನ ಸೇನೆ ಚಾಗೈ—ಪಂಜ್ಗುರ್ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ನಡೆದ ದಾಳಿಗಳನ್ನು ದೃಢಪಡಿಸಿದೆ. ಮಗ್ರಿಬ್ ಪ್ರದೇಶದಲ್ಲಿ ದಾಳಿಕೋರರು ಹಾಗೂ ಭದ್ರತಾ ಪಡೆಗಳ ಮಧ್ಯೆ ಹಲವಾರು ಗಂಟೆಗಳ ಕಾಲ ನಡೆದ ಚಕಮಕಿಯಲ್ಲಿ ಸೇನೆಗೆ ಹೆಚ್ಚಿನ ನಷ್ಟವಾಗಿದೆ ಎಂದು ಸ್ಥಳೀಯ ಮೂಲಗಳು ತಿಳಿಸಿವೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
