ಕ್ವೆಟ್ಟಾ (ಬಲೂಚಿಸ್ತಾನ), ಪಾಕಿಸ್ತಾನ, ಸೆಪ್ಟೆಂಬರ್ 30 (ಹಿ.ಸ.):

ಪಾಕಿಸ್ತಾನದ ಬಲೂಚಿಸ್ತಾನದ ನಸೀರಾಬಾದ್ ಜಿಲ್ಲೆಯಲ್ಲಿ ಶೈಕ್ಷಣಿಕ ಸಂಸ್ಥೆಯೊಂದರ ನಿರ್ಮಾಣ ಹಂತದ ಕಟ್ಟಡವನ್ನು ಬಾಂಬ್ ಸ್ಫೋಟಿಸಿ ಧ್ವಂಸಗೊಳಿಸಲಾಗಿದೆ. ಇದೇ ವೇಳೆ ಕಚ್ಚಿ ಪ್ರದೇಶದಲ್ಲಿ ಸೇನೆಯ ಎರಡು ವಾಹನಗಳ ಮೇಲೆ ನಡೆದ ದಾಳಿಯಲ್ಲಿ ಐವರು ಯೋಧರು ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ.

‘ದಿ ಬಲೂಚಿಸ್ತಾನ್ ಪೋಸ್ಟ್’ ವರದಿ ಪ್ರಕಾರ, ನುಟಲ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಅಪರಿಚಿತ ಶಸ್ತ್ರಸಜ್ಜಿತರು ಬಲೂಚಿಸ್ತಾನ್ ರೆಸಿಡೆನ್ಷಿಯಲ್ ಕಾಲೇಜಿನ ನಿರ್ಮಾಣ ಹಂತದ ಕಟ್ಟಡವನ್ನು ಬಾಂಬ್ ಸ್ಫೋಟಿಸಿ ಧ್ವಂಸಗೊಳಿಸಿದ್ದಾರೆ. ಸ್ಫೋಟ ಸಂಭವಿಸಿದ ಸಂದರ್ಭದಲ್ಲಿ ಕಟ್ಟಡದೊಳಗೆ ಯಾರೂ ಇರಲಿಲ್ಲ. 2018ರಿಂದ ಕಟ್ಟಡ ನಿರ್ಮಾಣ ಹಂತದಲ್ಲಿತ್ತು. ಸ್ಫೋಟದ ಬಳಿಕ ಪಾಕಿಸ್ತಾನ ಸೇನೆ ಮತ್ತು ಪೊಲೀಸರು ಸ್ಥಳಕ್ಕೆ ಧಾವಿಸಿ ಪ್ರದೇಶವನ್ನು ಸುತ್ತುವರಿದರು.

ಇದೇ ವೇಳೆ, ಬಲೂಚ್ ರಿಪಬ್ಲಿಕನ್ ಗಾರ್ಡ್ಸ್‌ನ ವಕ್ತಾರ ಡಸ್ಟಿನ್ ಬಲೂಚ್ ಮಾಧ್ಯಮಕ್ಕೆ ನೀಡಿದ ಹೇಳಿಕೆಯಲ್ಲಿ, ಮಂಗಳವಾರ ಬೆಳಗ್ಗೆ ಕಚ್ಚಿ ಜಿಲ್ಲೆಯ ಛೆತ್ರಿ ಪ್ರದೇಶದ ಧಾದರ್ ಮತ್ತು ಸನ್ನಿ ರಸ್ತೆಯಲ್ಲಿ ಸೇನೆಯ ಎರಡು ವಾಹನಗಳ ಮೇಲೆ ಉಗ್ರರು ಹೊಂಚು ದಾಳಿ ನಡೆಸಿದ್ದಾರೆ ಎಂದು ತಿಳಿಸಿದ್ದಾರೆ. ದಾಳಿಯಲ್ಲಿ ಐವರು ಯೋಧರು ಸ್ಥಳದಲ್ಲೇ ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ ಎಂದು ಅವರು ಹೇಳಿದ್ದಾರೆ.

ಬಲೂಚಿಸ್ತಾನ್ ಲಿಬರೇಷನ್ ಫ್ರಂಟ್‌ನ ವಕ್ತಾರ ಮೇಜರ್ ಘೋರಂ ಬಲೂಚ್ ಹೇಳಿಕೆಯ ಪ್ರಕಾರ, ಸೆಪ್ಟೆಂಬರ್ 28-29ರ ರಾತ್ರಿ ಕ್ವೆಟ್ಟಾ-ಕರಾಚಿ ಹೆದ್ದಾರಿಯ ಕಲಾತ್‌ನ ದಶ್ತ್ ಗೋರಾನ್ ಪ್ರದೇಶದಲ್ಲಿ ಸಂಘಟನೆಯ ಮಹಿಳಾ ಕಮಾಂಡರ್‌ಗಳು ಮಧ್ಯರಾತ್ರಿ 12 ಗಂಟೆಗೆ ರಸ್ತೆ ತಡೆ ನಿರ್ಮಿಸಿ ಸಂಚರಿಸುತ್ತಿದ್ದ ವಾಹನಗಳನ್ನು ತಪಾಸಣೆ ನಡೆಸಿದ್ದಾರೆ. ಸಂಜೆ 5 ಗಂಟೆಗೆ ರಸ್ತೆ ತಡೆ ತೆರವುಗೊಳಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಕಲಾತ್ ಮತ್ತು ಖುಜ್ದಾರ್‌ನ ಮುಖ್ಯ ಹೆದ್ದಾರಿಯಲ್ಲಿ ತಮ್ಮ ಸಂಘಟನೆಯ ಹೋರಾಟಗಾರರ ನಿಯಂತ್ರಣ ಮುಂದುವರಿದಿದೆ ಎಂದು ಬಲೂಚಿಸ್ತಾನ್ ಲಿಬರೇಷನ್ ಫ್ರಂಟ್ ಹೇಳಿಕೊಂಡಿದೆ. ಈ ಕುರಿತು ಪಾಕಿಸ್ತಾನ ಸೇನೆಯಿಂದ ಯಾವುದೇ ಪ್ರತಿಕ್ರಿಯೆ ಲಭ್ಯವಾಗಿಲ್ಲ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.