ಬೆಂಗಳೂರು, 29 ಸೆಪ್ಟೆಂಬರ್ (ಹಿ.ಸ.):

ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಅಧೀನದ ಇ-ಆಡಳಿತ ವಿಭಾಗದಲ್ಲಿ ಕೆಎಸ್ವಿಎಎನ್–3.0 ಹಾಗೂ ಕರ್ನಾಟಕ ರಾಜ್ಯ ದತ್ತಾಂಶ ಕೇಂದ್ರಕ್ಕೆ ಸಂಬಂಧಿಸಿದ ಟೆಂಡರ್ಗಳಲ್ಲಿ ನೂರಾರು ಕೋಟಿ ರೂಪಾಯಿ ಅಕ್ರಮ ನಡೆದಿದೆ ಎಂದು ಬಿಜೆಪಿ ಮುಖಂಡ ಎನ್.ಆರ್. ರಮೇಶ್ ಆರೋಪಿಸಿದ್ದಾರೆ.

ಈ ಸಂಬಂಧ ಜಾರಿ ನಿರ್ದೇಶನಾಲಯ, ಲೋಕಾಯುಕ್ತ ಹಾಗೂ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯದಲ್ಲಿ ದೂರುಗಳನ್ನು ದಾಖಲಿಸಿರುವುದಾಗಿ ಅವರು ತಿಳಿಸಿದ್ದಾರೆ.

ಕೆಎಸ್ವಿಎಎನ್–3.0 ಯೋಜನೆಯ ₹444.44 ಕೋಟಿ ಮೊತ್ತದ ಟೆಂಡರ್ ಪ್ರಕ್ರಿಯೆಯಲ್ಲಿ ನಿಯಮಗಳನ್ನು ಉಲ್ಲಂಘಿಸಿ ನಿರ್ದಿಷ್ಟ ಸಂಸ್ಥೆಗೆ ಅನುಕೂಲ ಮಾಡಿಕೊಡಲಾಗಿದೆ ಎಂಬುದು ಅವರ ಪ್ರಮುಖ ಆರೋಪವಾಗಿದೆ. ಈ ಯೋಜನೆಗೆ ರೈಲ್ಟೆಲ್ ಸಂಸ್ಥೆಗೆ ₹444 ಕೋಟಿಗೂ ಅಧಿಕ ಮೌಲ್ಯದ ಉದ್ದೇಶಪತ್ರ ದೊರೆತಿರುವುದು ಸಾರ್ವಜನಿಕವಾಗಿ ಲಭ್ಯವಿರುವ ದಾಖಲೆಗಳಿಂದ ತಿಳಿದುಬರುತ್ತದೆ.

ರಮೇಶ್ ಅವರ ಹೇಳಿಕೆಯ ಪ್ರಕಾರ, 2025ರ ಜುಲೈನಲ್ಲಿ ಕೆಎಸ್ವಿಎಎನ್–3.0 ಯೋಜನೆಗೆ ಟೆಂಡರ್ ಕರೆಯಲಾಗಿತ್ತು. ಎರಡು ಸಂಸ್ಥೆಗಳು ಭಾಗವಹಿಸಿದ್ದರೂ ನಂತರ ಟೆಂಡರ್ ರದ್ದುಪಡಿಸಿ, 2025ರ ಡಿಸೆಂಬರ್ನಲ್ಲಿ ₹444 ಕೋಟಿ ಮೊತ್ತದ ಹೊಸ ಟೆಂಡರ್ ಕರೆಯಲಾಯಿತು. ಈ ವೇಳೆ ಸಿಸ್ಕೋ ಸಂಸ್ಥೆಗೆ ಅನುಕೂಲವಾಗುವ ರೀತಿಯಲ್ಲಿ ಷರತ್ತುಗಳನ್ನು ರೂಪಿಸಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ.

ಸಿಸ್ಕೋ ಸಂಸ್ಥೆಯು ರೈಲ್ಟೆಲ್ ಜತೆ ಒಕ್ಕೂಟ ಮಾಡಿಕೊಂಡಿದ್ದು, ತಂತ್ರಾಂಶ ನಿರ್ವಹಣೆಗೆ ಹೈದರಾಬಾದ್ ಮೂಲದ ಆಲ್ವಿ ಸಾಫ್ಟ್ವೇರ್ ಸೊಲ್ಯೂಷನ್ಸ್ ಜತೆ ಒಪ್ಪಂದ ಮಾಡಿಕೊಂಡಿದೆ ಎಂದು ರಮೇಶ್ ತಿಳಿಸಿದ್ದಾರೆ.

ತಂತ್ರಾಂಶ ನಿರ್ವಹಣೆಗೆ ಅರ್ಹವಾಗಿದ್ದ ಟೆಲಿಕಮ್ಯುನಿಕೇಷನ್ಸ್ ಕನ್ಸಲ್ಟೆಂಟ್ಸ್ ಇಂಡಿಯಾ ಲಿಮಿಟೆಡ್ಗೆ ಅಗತ್ಯ ದಾಖಲೆಗಳನ್ನು ಒದಗಿಸದೆ ಟೆಂಡರ್ ಪ್ರಕ್ರಿಯೆಯಿಂದ ಹೊರಗುಳಿಯುವಂತೆ ಮಾಡಲಾಗಿದೆ ಎಂಬ ಆರೋಪವನ್ನೂ ಅವರು ಮಾಡಿದ್ದಾರೆ. ಈ ಕುರಿತು ಸಂಸ್ಥೆಯು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಹಾಗೂ ಇ-ಆಡಳಿತ ವಿಭಾಗದ ಅಧಿಕಾರಿಗಳಿಗೆ ದೂರು ನೀಡಿದ್ದರೂ ಕ್ರಮ ಕೈಗೊಂಡಿಲ್ಲ ಎಂದು ಅವರು ಹೇಳಿದ್ದಾರೆ.

ಕೆಎಸ್ಡಿಸಿ ಟೆಂಡರ್ಗಳಲ್ಲೂ ಅಕ್ರಮ ಆರೋಪ

ಕರ್ನಾಟಕ ರಾಜ್ಯ ದತ್ತಾಂಶ ಕೇಂದ್ರದ ಟೆಂಡರ್ ಪ್ರಕ್ರಿಯೆಗಳಲ್ಲೂ ಅಕ್ರಮ ನಡೆದಿದೆ ಎಂದು ರಮೇಶ್ ಆರೋಪಿಸಿದ್ದಾರೆ. ಹಲವು ಟೆಂಡರ್ಗಳನ್ನು ಸಣ್ಣ ಸಣ್ಣ ಭಾಗಗಳಾಗಿ ವಿಂಗಡಿಸಿ, ನಿರ್ದಿಷ್ಟ ಸಂಸ್ಥೆಗಳಿಗೆ ಅನುಕೂಲವಾಗುವಂತೆ ಷರತ್ತುಗಳನ್ನು ರೂಪಿಸಲಾಗಿದೆ. ಬಿಡ್ದಾರರಿಂದ ಕಮಿಷನ್ಗಾಗಿ ಬೇಡಿಕೆ ಇಡಲಾಗಿತ್ತು ಹಾಗೂ ಅದಕ್ಕೆ ಒಪ್ಪದ ಸಂಸ್ಥೆಗಳಿಗೆ ವಿವಿಧ ರೀತಿಯಲ್ಲಿ ತೊಂದರೆ ನೀಡಲಾಗಿದೆ ಎಂಬ ಆರೋಪಗಳನ್ನು ಅವರು ಮಾಡಿದ್ದಾರೆ.

ಪೆಟಾಬೈಟ್ ಸ್ಯಾನ್ ಸಂಗ್ರಹಣಾ ಉಪಕರಣಗಳ ಖರೀದಿ ವಿಚಾರವನ್ನು ಉದಾಹರಣೆಯಾಗಿ ನೀಡಿದ ಅವರು, 2024ರ ಜುಲೈನಲ್ಲಿ ₹2.48 ಕೋಟಿ, 2025ರ ಮೇನಲ್ಲಿ ₹3.36 ಕೋಟಿ ಹಾಗೂ 2026ರ ಜನವರಿಯಲ್ಲಿ ₹2.92 ಕೋಟಿ ಮೊತ್ತದ ಖರೀದಿ ಅಥವಾ ಉದ್ದೇಶಪತ್ರ ಪ್ರಕ್ರಿಯೆಗಳು ನಡೆದಿವೆ ಎಂದು ಹೇಳಿದ್ದಾರೆ. ಬಳಿಕ ಇದೇ ತಂತ್ರಜ್ಞಾನಕ್ಕೆ ಮತ್ತೊಬ್ಬ ಬಿಡ್ದಾರರಿಗೆ ₹14.96 ಕೋಟಿ ಮೊತ್ತದ ಉದ್ದೇಶಪತ್ರ ನೀಡಲಾಗಿದೆ ಎಂದು ಆರೋಪಿಸಿದ್ದಾರೆ.

2026ರ ಜನವರಿಯಲ್ಲಿ ಉದ್ದೇಶಪತ್ರ ಪಡೆದ ಇನ್ಸ್ಪಿರಿಸಿಸ್ ಸಂಸ್ಥೆ ಇದುವರೆಗೆ ಉಪಕರಣಗಳನ್ನು ಪೂರೈಸಿಲ್ಲ. ಆದರೂ ಸಂಸ್ಥೆಯನ್ನು ಕಪ್ಪುಪಟ್ಟಿಗೆ ಸೇರಿಸುವುದು, ದಂಡ ವಿಧಿಸುವುದು ಅಥವಾ ಕಾರ್ಯನಿರ್ವಹಣಾ ಬ್ಯಾಂಕ್ ಖಾತರಿ ಮುಟ್ಟುಗೋಲು ಹಾಕಿಕೊಳ್ಳುವ ಕ್ರಮ ಕೈಗೊಂಡಿಲ್ಲ ಎಂದು ರಮೇಶ್ ಆರೋಪಿಸಿದ್ದಾರೆ.

ಈ ಪ್ರಕರಣಗಳಲ್ಲಿ ಇ-ಆಡಳಿತ ವಿಭಾಗದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಭೂಬಾಲನ್, ಐಎಎಸ್, ಕೆಎಸ್ಡಿಸಿ ಯೋಜನಾ ನಿರ್ದೇಶಕಿ ಸೀಮಾ ಕೆ.ಪಿ. ಹಾಗೂ ಕಾರ್ಯಾಚರಣೆ ನಿರ್ದೇಶಕ ಕರ್ನಲ್ ರಂಗನಾಥನ್ ಸತೀಶ್ ಅವರ ಪಾತ್ರವಿದೆ ಎಂದು ಅವರು ಆರೋಪಿಸಿದ್ದಾರೆ.

ಯತೀಂದ್ರ ವಿರುದ್ಧವೂ ಆರೋಪ

2023ರಿಂದ 2026ರವರೆಗೆ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯ ಹೊಣೆಗಾರಿಕೆಯನ್ನು ಅಂದಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೊಂದಿದ್ದ ಅವಧಿಯಲ್ಲಿ, ಅವರ ಪುತ್ರ ಡಾ. ಯತೀಂದ್ರ ಸಿದ್ದರಾಮಯ್ಯ ಅವರು ಇಲಾಖೆಯ ಕಾರ್ಯಗಳಲ್ಲಿ ಅನಧಿಕೃತವಾಗಿ ಹಸ್ತಕ್ಷೇಪ ಮಾಡುತ್ತಿದ್ದರು ಎಂದು ರಮೇಶ್ ಆರೋಪಿಸಿದ್ದಾರೆ. ಕೆಎಸ್ವಿಎಎನ್–3.0 ಹಾಗೂ ಕೆಎಸ್ಡಿಸಿಗೆ ಸಂಬಂಧಿಸಿದ ಅಕ್ರಮಗಳು ಅವರ ಸೂಚನೆಯಂತೆ ನಡೆದಿವೆ ಎಂಬುದು ತಮ್ಮ ದೂರಿನಲ್ಲಿನ ಆರೋಪವಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಸಿಬಿಐ ಅಥವಾ ಸಿಐಡಿ ತನಿಖೆಗೆ ಆಗ್ರಹ

ಕೆಎಸ್ವಿಎಎನ್–3.0 ಮತ್ತು ಕೆಎಸ್ಡಿಸಿಗೆ ಸಂಬಂಧಿಸಿದ ಆರೋಪಗಳ ಕುರಿತು ಸಿಬಿಐ ಅಥವಾ ಸಿಐಡಿ ತನಿಖೆ ನಡೆಸಬೇಕು, ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸಬೇಕು ಹಾಗೂ ಕೆಎಸ್ವಿಎಎನ್–3.0ರ ₹444 ಕೋಟಿ ಟೆಂಡರ್ ಸೇರಿದಂತೆ ಇತ್ತೀಚಿನ ಕೆಎಸ್ಡಿಸಿ ಟೆಂಡರ್ಗಳನ್ನು ರದ್ದುಪಡಿಸಿ ಮರು ಟೆಂಡರ್ ಕರೆಯಬೇಕು ಎಂದು ಎನ್.ಆರ್. ರಮೇಶ್ ರಾಜ್ಯ ಸರ್ಕಾರವನ್ನು ಆಗ್ರಹಿಸಿದ್ದಾರೆ.

ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಸಚಿವ ಡಾ. ಯತೀಂದ್ರ ಸಿದ್ದರಾಮಯ್ಯ ಹಾಗೂ ಸಂಬಂಧಪಟ್ಟ ಹಿರಿಯ ಅಧಿಕಾರಿಗಳ ವಿರುದ್ಧ ತನಿಖೆಗೆ ಅನುಮತಿ ನೀಡುವಂತೆ ರಾಜ್ಯಪಾಲರಿಗೂ ದಾಖಲೆಗಳೊಂದಿಗೆ ದೂರು ಸಲ್ಲಿಸಿರುವುದಾಗಿ ರಮೇಶ್ ತಿಳಿಸಿದ್ದಾರೆ.

---------------

ಹಿಂದೂಸ್ತಾನ್ ಸಮಾಚಾರ್ / BHARGAVI G R