ಟೋಕೈ, 26 ಸೆಪ್ಟೆಂಬರ್ (ಹಿ.ಸ.):

ಆ್ಯಂಕರ್:ಭಾರತ ಮಹಿಳಾ ಕಬಡ್ಡಿ ತಂಡವು ಏಷ್ಯನ್ ಕ್ರೀಡಾಕೂಟ-2026ರಲ್ಲಿ ಅಮೋಘ ಪ್ರದರ್ಶನ ನೀಡಿ ಸತತ ಎರಡನೇ ಬಾರಿಗೆ ಚಿನ್ನದ ಪದಕ ಗೆದ್ದುಕೊಂಡಿದೆ. ಶನಿವಾರ ತೋಕೈ ಸಿಟಿಜನ್ ಜಿಮ್ನಾಷಿಯಂನಲ್ಲಿ ನಡೆದ ರೋಚಕ ಫೈನಲ್‌ನಲ್ಲಿ ಭಾರತ 2018ರ ಚಾಂಪಿಯನ್ ಇರಾನ್ ತಂಡವನ್ನು 37-34 ಅಂಕಗಳಿಂದ ಮಣಿಸಿ ಚಿನ್ನ ತನ್ನದಾಗಿಸಿಕೊಂಡಿತು.

ಈ ಗೆಲುವಿನೊಂದಿಗೆ ಏಷ್ಯನ್ ಕ್ರೀಡಾಕೂಟದ ಇತಿಹಾಸದಲ್ಲಿ ಮಹಿಳಾ ಕಬಡ್ಡಿಯಲ್ಲಿ ಭಾರತ ನಾಲ್ಕನೇ ಚಿನ್ನದ ಪದಕ ಗೆದ್ದಂತಾಗಿದೆ.

ಫೈನಲ್‌ನಲ್ಲಿ ಆರಂಭದಿಂದಲೇ ಭಾರತ ಪಂದ್ಯದಲ್ಲಿ ಹಿಡಿತ ಸಾಧಿಸಿತ್ತು. ಇರಾನ್ ತಂಡ ತೀವ್ರ ಪೈಪೋಟಿ ನೀಡಿದರೂ ಒತ್ತಡದ ನಡುವೆಯೂ ಭಾರತೀಯ ಆಟಗಾರ್ತಿಯರು ಸಂಯಮ ಕಾಪಾಡಿಕೊಂಡರು. ಮೊದಲಾರ್ಧದ ಅಂತ್ಯಕ್ಕೆ ಭಾರತ 22-16 ಅಂಕಗಳ ಮುನ್ನಡೆ ಸಾಧಿಸಿತ್ತು.

ಪಂದ್ಯದ ಆರಂಭದಲ್ಲಿ ಎರಡೂ ತಂಡಗಳ ನಡುವೆ ತೀವ್ರ ಪೈಪೋಟಿ ಕಂಡುಬಂದಿದ್ದು, ನಾಲ್ಕು ನಿಮಿಷಗಳ ಬಳಿಕ 5-5 ಅಂಕಗಳಿಂದ ಸಮಬಲದಲ್ಲಿದ್ದವು. ಬಳಿಕ ಇರಾನ್ ತಂಡ ಸಂಜು ಅವರ ಮೇಲೆ ಯಶಸ್ವಿ ಹಿಡಿತ ಸಾಧಿಸಿ 6-5ರ ಮುನ್ನಡೆ ಪಡೆಯಿತು. ಭಾರತ ತಕ್ಷಣವೇ ತಿರುಗೇಟು ನೀಡಿ ಸತತ ಅಂಕಗಳನ್ನು ಕಲೆಹಾಕಿತು.

ಭಾವನಾ ದೇವಿ ಅವರ ಉತ್ತಮ ಹಿಡಿತದ ಬಳಿಕ ಭಾರತ ಮೊದಲ ಬಾರಿಗೆ ಎದುರಾಳಿ ತಂಡವನ್ನು ಆಲ್‌ಔಟ್ ಮಾಡಿ 13-10ರ ಮುನ್ನಡೆ ಸಾಧಿಸಿತು. ಬಳಿಕ ನಿಖಿತಾ ಬಹುಅಂಕಗಳ ದಾಳಿ ನಡೆಸಿ ಭಾರತದ ಮುನ್ನಡೆಯನ್ನು 15-10ಕ್ಕೆ ವಿಸ್ತರಿಸಿದರು. ಸಂಜು ದೇವಿ ಬೋನಸ್ ಸೇರಿದಂತೆ ಮೂರು ಅಂಕಗಳನ್ನು ಗಳಿಸಿ ತಂಡದ ಸ್ಥಿತಿಯನ್ನು ಮತ್ತಷ್ಟು ಬಲಪಡಿಸಿದರು.

ದ್ವಿತೀಯಾರ್ಧದಲ್ಲಿ ಇರಾನ್ ತಿರುಗೇಟು ನೀಡಲು ಪ್ರಯತ್ನಿಸಿ ಭಾರತದ ಮುನ್ನಡೆಯನ್ನು ಕಡಿಮೆ ಮಾಡಿತು. ಪಂದ್ಯದ ಕೊನೆಯ 10 ನಿಮಿಷಗಳಲ್ಲಿ ಭಾರತ 25-20ರಿಂದ ಮುಂದಿತ್ತು. ಬಳಿಕ ಇರಾನ್ ಸತತ ಅಂಕಗಳನ್ನು ಗಳಿಸಿ ಅಂತರವನ್ನು 27-26ಕ್ಕೆ ಇಳಿಸಿತು. ಆದರೆ ಭಾರತೀಯ ಆಟಗಾರ್ತಿಯರು ಒತ್ತಡದಲ್ಲೂ ಉತ್ತಮ ಪ್ರದರ್ಶನ ಮುಂದುವರಿಸಿದರು.

ಸಂಜು ದೇವಿ ಎರಡು ಅಂಕಗಳ ದಾಳಿ ನಡೆಸಿ ಭಾರತಕ್ಕೆ ಮತ್ತೆ ಮುನ್ನಡೆ ತಂದುಕೊಟ್ಟರು. ಇದರಿಂದ ಭಾರತ 34-28ರ ಮುನ್ನಡೆ ಸಾಧಿಸಿತು. ಬಳಿಕ ಪೂಜಾ ಮತ್ತೊಂದು ಅಂಕ ಗಳಿಸಿದರು. ಅಂತಿಮ ಕ್ಷಣಗಳಲ್ಲಿ ರಕ್ಷಣಾ ವಿಭಾಗವನ್ನು ಬಲಪಡಿಸಿದ ಭಾರತ, ಪಂದ್ಯವನ್ನು 37-34ರಿಂದ ಗೆದ್ದು ಚಿನ್ನದ ಪದಕಕ್ಕೆ ಮುತ್ತಿಕ್ಕಿತು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.