ಐಚಿ-ನಾಗೋಯಾ, 25 ಸೆಪ್ಟೆಂಬರ್ (ಹಿ.ಸ):
ಆ್ಯಂಕರ್:ಏಷ್ಯನ್ ಗೇಮ್ಸ್ 2026ರಲ್ಲಿ ಭಾರತಕ್ಕೆ ಮತ್ತೊಂದು ಚಿನ್ನದ ಪದಕ ಲಭಿಸಿದೆ. 10 ಮೀಟರ್ ಏರ್ ಪಿಸ್ತೂಲ್ ಮಿಶ್ರ ತಂಡ ಸ್ಪರ್ಧೆಯಲ್ಲಿ ಭಾರತದ ಸುರೂಚಿ ಸಿಂಗ್ ಮತ್ತು ಕಮಲ್ಜೀತ್ ಜೋಡಿ ಶುಕ್ರವಾರ ಅದ್ಭುತ ಪ್ರದರ್ಶನ ನೀಡಿ ಚಿನ್ನದ ಪದಕ ಗೆದ್ದಿದೆ. ಈ ಮೂಲಕ ಭಾರತೀಯ ಜೋಡಿ ಹೊಸ ಏಷ್ಯಾ ದಾಖಲೆಯನ್ನೂ ನಿರ್ಮಿಸಿದೆ.
ಫೈನಲ್ನಲ್ಲಿ ಸುರೂಚಿ–ಕಮಲ್ಜೀತ್ ಜೋಡಿ ಒಟ್ಟು 484.6 ಅಂಕ ಗಳಿಸಿ ಅಗ್ರಸ್ಥಾನ ಪಡೆದುಕೊಂಡಿತು. ದಕ್ಷಿಣ ಕೊರಿಯಾ 478.0 ಅಂಕಗಳೊಂದಿಗೆ ಬೆಳ್ಳಿ ಪದಕ ಹಾಗೂ ಇರಾನ್ 415.8 ಅಂಕಗಳೊಂದಿಗೆ ಕಂಚಿನ ಪದಕ ಗೆದ್ದವು. ಇಂಡೋನೇಷ್ಯಾ 349.4 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು.
ಭಾರತೀಯ ಜೋಡಿ ಫೈನಲ್ನ ಮೊದಲ ಹಂತದಲ್ಲೇ ಪ್ರಾಬಲ್ಯ ಸಾಧಿಸಿತು. ಮೊದಲ ಸರಣಿಯಲ್ಲಿ 103 ಅಂಕ ಗಳಿಸಿದ ಬಳಿಕ, ಎರಡನೇ ಸರಣಿಯಲ್ಲಿ 99.4 ಹಾಗೂ ಮೂರನೇ ಸರಣಿಯಲ್ಲಿ 101.1 ಅಂಕ ಕಲೆಹಾಕಿತು. ಇದರಿಂದ ಮೂರು ಸರಣಿಗಳ ಬಳಿಕ ಭಾರತದ ಒಟ್ಟು ಮೊತ್ತ 303.5 ಅಂಕಗಳಿಗೆ ತಲುಪಿತ್ತು.
ಫೈನಲ್ನ ಎರಡನೇ ಹಂತದಲ್ಲೂ ಭಾರತದ ಮುನ್ನಡೆ ಮುಂದುವರಿಯಿತು. ಮೊದಲ ಸರಣಿಯಲ್ಲಿ 61.2 ಅಂಕ ಗಳಿಸಿ ಒಟ್ಟು ಮೊತ್ತವನ್ನು 364.7ಕ್ಕೆ ಹೆಚ್ಚಿಸಿಕೊಂಡ ಭಾರತ, ನಂತರದ ಸರಣಿಯಲ್ಲಿ 60.2 ಅಂಕ ಸೇರಿಸಿ 424.9 ಅಂಕ ಗಳಿಸಿತು. ಈ ಹಂತದಲ್ಲಿ ದಕ್ಷಿಣ ಕೊರಿಯಾ ವಿರುದ್ಧ ಭಾರತ 8.4 ಅಂಕಗಳ ಮುನ್ನಡೆ ಸಾಧಿಸಿತ್ತು.
ಅಂತಿಮ ಸರಣಿಯಲ್ಲಿ ದಕ್ಷಿಣ ಕೊರಿಯಾ ತಿರುಗೇಟು ನೀಡಲು ಪ್ರಯತ್ನಿಸಿದರೂ, ಒತ್ತಡದ ನಡುವೆಯೂ ಸುರೂಚಿ ಮತ್ತು ಕಮಲ್ಜೀತ್ ಉತ್ತಮ ಪ್ರದರ್ಶನ ಮುಂದುವರಿಸಿ 484.6 ಅಂಕಗಳೊಂದಿಗೆ ಚಿನ್ನ ಖಚಿತಪಡಿಸಿಕೊಂಡರು. ಬೆಳ್ಳಿ ಗೆದ್ದ ದಕ್ಷಿಣ ಕೊರಿಯಾಗಿಂತ ಭಾರತ 6.6 ಅಂಕಗಳ ಮುನ್ನಡೆ ಸಾಧಿಸಿತು. ಭಾರತೀಯ ಜೋಡಿಯ ಮೊತ್ತ ವಿಶ್ವ ದಾಖಲೆಯ ಮೊತ್ತಕ್ಕಿಂತ ನಾಲ್ಕು ಅಂಕ ಕಡಿಮೆಯಾಗಿದೆ.
ಈ ಮೂಲಕ ಈ ಸ್ಪರ್ಧೆಯ ಏಷ್ಯಾ ದಾಖಲೆಯೂ ಭಾರತದ ಪಾಲಾಯಿತು. ಇದಕ್ಕೂ ಮುನ್ನ ಇದೇ ವರ್ಷ ನವದೆಹಲಿಯಲ್ಲಿ ನಡೆದ ಏಷ್ಯನ್ ಶೂಟಿಂಗ್ ಚಾಂಪಿಯನ್ಶಿಪ್ನಲ್ಲಿ ಉಜ್ಬೇಕಿಸ್ತಾನ 481.3 ಅಂಕಗಳೊಂದಿಗೆ ಏಷ್ಯಾ ದಾಖಲೆ ನಿರ್ಮಿಸಿತ್ತು.
ಸುರೂಚಿ ಸಿಂಗ್ ಸಾಧನೆ
ಹರಿಯಾಣದ ಝಜ್ಜರ್ನ ಸುರೂಚಿ ಸಿಂಗ್ 13ನೇ ವಯಸ್ಸಿನಲ್ಲಿ ಶೂಟಿಂಗ್ ಆರಂಭಿಸಿದ್ದರು. 2025ರಲ್ಲಿ ಬ್ಯುನಸ್ ಐರಿಸ್, ಲಿಮಾ ಮತ್ತು ಮ್ಯೂನಿಚ್ನಲ್ಲಿ ನಡೆದ ಸತತ ಮೂರು ವೈಯಕ್ತಿಕ ಅಂತಾರಾಷ್ಟ್ರೀಯ ಶೂಟಿಂಗ್ ಕ್ರೀಡಾ ಒಕ್ಕೂಟದ ವಿಶ್ವಕಪ್ಗಳಲ್ಲಿ ಚಿನ್ನದ ಪದಕ ಗೆದ್ದಿದ್ದರು. ಲಿಮಾದಲ್ಲಿ ಮಿಶ್ರ ತಂಡ ಸ್ಪರ್ಧೆಯಲ್ಲೂ ಚಿನ್ನ ಗೆದ್ದಿದ್ದರು.
2025ರ ದೋಹಾ ವಿಶ್ವಕಪ್ ಫೈನಲ್ನಲ್ಲಿ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ 245.1 ಅಂಕಗಳ ಜೂನಿಯರ್ ವಿಶ್ವ ದಾಖಲೆಯೊಂದಿಗೆ ಚಿನ್ನ ಗೆದ್ದಿದ್ದರು. 2026ರ ಮ್ಯೂನಿಚ್ ವಿಶ್ವಕಪ್ನಲ್ಲೂ ಚಿನ್ನದ ಪದಕ ಪಡೆದಿದ್ದರು. ನವದೆಹಲಿಯಲ್ಲಿ ನಡೆದ 2026ರ ಏಷ್ಯನ್ ಶೂಟಿಂಗ್ ಚಾಂಪಿಯನ್ಶಿಪ್ನಲ್ಲಿ 10 ಮೀಟರ್ ಏರ್ ಪಿಸ್ತೂಲ್ ಮಿಶ್ರ ತಂಡ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆದ್ದಿದ್ದರು.
ಕಮಲ್ಜೀತ್ಗೂ ಪದಕಗಳ ಸರಮಾಲೆ
ಹರಿಯಾಣದ ರೇವಾರಿ ಜಿಲ್ಲೆಯ ಸುಲ್ಖಾ ನಿವಾಸಿ ಕಮಲ್ಜೀತ್ 10 ಮೀಟರ್ ಏರ್ ಪಿಸ್ತೂಲ್ ಹಾಗೂ 50 ಮೀಟರ್ ಪಿಸ್ತೂಲ್ ಸ್ಪರ್ಧೆಗಳಲ್ಲಿ ಭಾಗವಹಿಸುತ್ತಾರೆ. ಅವರು 2019ರಲ್ಲಿ ಶೂಟಿಂಗ್ ಆರಂಭಿಸಿದ್ದರು.
2023ರಲ್ಲಿ ಚಾಂಗ್ವಾನ್ನಲ್ಲಿ ನಡೆದ ಅಂತಾರಾಷ್ಟ್ರೀಯ ಶೂಟಿಂಗ್ ಕ್ರೀಡಾ ಒಕ್ಕೂಟದ ಕಿರಿಯರ ವಿಶ್ವ ಚಾಂಪಿಯನ್ಶಿಪ್ನಲ್ಲಿ 50 ಮೀಟರ್ ಪಿಸ್ತೂಲ್ ವೈಯಕ್ತಿಕ ಹಾಗೂ ತಂಡ ಸ್ಪರ್ಧೆಗಳಲ್ಲಿ ಚಿನ್ನದ ಪದಕ ಗೆದ್ದಿದ್ದರು. 2025ರ ಅಂತಾರಾಷ್ಟ್ರೀಯ ಶೂಟಿಂಗ್ ಕ್ರೀಡಾ ಒಕ್ಕೂಟದ ವಿಶ್ವ ಚಾಂಪಿಯನ್ಶಿಪ್ನಲ್ಲಿ 50 ಮೀಟರ್ ಪಿಸ್ತೂಲ್ ತಂಡ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಪಡೆದಿದ್ದರು. 2026ರ ಏಷ್ಯನ್ ಚಾಂಪಿಯನ್ಶಿಪ್ನಲ್ಲಿ 50 ಮೀಟರ್ ಪಿಸ್ತೂಲ್ ವೈಯಕ್ತಿಕ ಸ್ಪರ್ಧೆಯಲ್ಲೂ ಬೆಳ್ಳಿ ಪದಕ ಗೆದ್ದಿದ್ದರು.
ಈ ಚಿನ್ನದೊಂದಿಗೆ 2026ರ ಏಷ್ಯನ್ ಗೇಮ್ಸ್ನಲ್ಲಿ ಭಾರತದ ಚಿನ್ನದ ಪದಕಗಳ ಸಂಖ್ಯೆ ಎರಡಕ್ಕೆ ಏರಿಕೆಯಾಗಿದೆ. ಇದಕ್ಕೂ ಮುನ್ನ ಭಾರತೀಯ ಮಹಿಳಾ ಕ್ರಿಕೆಟ್ ತಂಡ ಶ್ರೀಲಂಕಾವನ್ನು 147 ರನ್ಗಳಿಂದ ಮಣಿಸಿ ಚಿನ್ನದ ಪದಕ ಗೆದ್ದಿತ್ತು.
--------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
