ನಾಗ್ಪುರ, 25 ಸೆಪ್ಟೆಂಬರ್ (ಹಿ.ಸ.):

ಆ್ಯಂಕರ್:ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಪವಿತ್ರ ವಿಜಯದಶಮಿ ಉತ್ಸವವನ್ನು ಅಕ್ಟೋಬರ್ 20ರಂದು ನಾಗಪುರದ ರೇಶಿಂಬಾಗ್‌ನಲ್ಲಿ ಆಯೋಜಿಸಲಾಗಿದೆ. ಈ ಸಂದರ್ಭದಲ್ಲಿ ಆರ್‌.ಎಸ್‌.ಎಸ್‌ ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಅವರು ವಾರ್ಷಿಕ ಭಾಷಣ ಮಾಡಲಿದ್ದು, ಅವರ ಭಾಷಣದತ್ತ ಗಮನ ನೆಟ್ಟಿದೆ.

ಆರ್‌.ಎಸ್‌.ಎಸ್‌ ತನ್ನ ‘ಎಕ್ಸ್‌’ ಖಾತೆಯಲ್ಲಿ ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಅಕ್ಟೋಬರ್ 20ರಂದು ಬೆಳಗ್ಗೆ 7.40ಕ್ಕೆ ರೇಶಿಂಬಾಗ್‌ನಲ್ಲಿ ವಿಜಯದಶಮಿ ಉತ್ಸವ ನಡೆಯಲಿದೆ. ದೈನಿಕ ಜಾಗರಣ್‌ನ ಮುಖ್ಯ ಸಂಪಾದಕ ಸಂಜಯ್ ಗುಪ್ತಾ ಅವರು ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ.

ಹಿಂದೂ ಪಂಚಾಂಗದಲ್ಲಿ ವಿಜಯದಶಮಿಯನ್ನು ಅಸತ್ಯದ ವಿರುದ್ಧ ಸತ್ಯದ ವಿಜಯದ ದಿನವೆಂದು ಪರಿಗಣಿಸಲಾಗುತ್ತದೆ. ದಸರಾ ಎಂದೂ ಕರೆಯಲಾಗುವ ಈ ದಿನವು ರಾವಣನ ಸೋಲಿನ ಸ್ಮರಣೆ ಹಾಗೂ ಶರದೃತುವಿನ ಆರಂಭದೊಂದಿಗೆ ವಿಶೇಷ ಮಹತ್ವ ಹೊಂದಿದೆ. ಆರ್‌.ಎಸ್‌.ಎಸ್‌ ಪರಂಪರೆಯಲ್ಲಿ ವಿಜಯದಶಮಿಯಂದು ಶಸ್ತ್ರಪೂಜೆ ನಡೆಸಲಾಗುತ್ತದೆ. ಶಕ್ತಿಯ ಬಗೆಗಿನ ಗೌರವ ಹಾಗೂ ಅನ್ಯಾಯದ ವಿರುದ್ಧ ನಿಲ್ಲುವ ಸಂಕಲ್ಪದ ಸಂಕೇತವಾಗಿ ಇದನ್ನು ಪರಿಗಣಿಸಲಾಗುತ್ತದೆ.

ವಿಜಯದಶಮಿ ಸಂದರ್ಭದಲ್ಲಿ ಸಂಘದ ಸ್ವಯಂಸೇವಕರಿಗೆ ಮುಂದಿನ ವರ್ಷದ ಕಾರ್ಯಚಟುವಟಿಕೆಗಳು ಮತ್ತು ಕರ್ತವ್ಯಗಳ ಕುರಿತ ಮಾರ್ಗದರ್ಶನ ನೀಡುವ ಪರಂಪರೆಯೂ ಇದೆ. ದೇಶಾದ್ಯಂತದ ಸಂಘದ ಪ್ರಮುಖರು ಹಾಗೂ ಸ್ವಯಂಸೇವಕರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಾರೆ.

ಆರ್‌.ಎಸ್‌.ಎಸ್‌ ಇತಿಹಾಸದಲ್ಲಿ ವಿಜಯದಶಮಿ ಭಾಷಣಕ್ಕೆ ದೀರ್ಘ ಪರಂಪರೆ ಇದೆ. ಸಂಘದ ಸಂಸ್ಥಾಪಕ ಡಾ. ಕೇಶವ ಬಲಿರಾಮ ಹೆಡ್ಗೆವಾರ್‌ ಅವರ ಕಾಲದಿಂದಲೂ ಸರಸಂಘಚಾಲಕರು ವಿಜಯದಶಮಿ ದಿನದಂದು ರಾಷ್ಟ್ರೀಯ ಜೀವನಕ್ಕೆ ಸಂಬಂಧಿಸಿದ ವಿವಿಧ ವಿಷಯಗಳ ಕುರಿತು ತಮ್ಮ ಅಭಿಪ್ರಾಯಗಳನ್ನು ಮಂಡಿಸುತ್ತ ಬಂದಿದ್ದಾರೆ. ಡಾ. ಮೋಹನ್ ಭಾಗವತ್ ಅವರ ಈ ವರ್ಷದ ಭಾಷಣವೂ ಇದೇ ಪರಂಪರೆಯ ಮುಂದುವರಿಕೆಯಾಗಲಿದೆ.

ನಾಗಪುರದ ರೇಶಿಂಬಾಗ್‌ನಲ್ಲಿ ನಡೆಯುವ ವಿಜಯದಶಮಿ ಉತ್ಸವವನ್ನು ಸಂಘದ ಪ್ರಮುಖ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಒಂದಾಗಿ ಪರಿಗಣಿಸಲಾಗುತ್ತದೆ. ಶಸ್ತ್ರಪೂಜೆ ಸೇರಿದಂತೆ ವಿವಿಧ ಕಾರ್ಯಕ್ರಮಗಳು ನಡೆಯಲಿದ್ದು, ದೇಶದ ವಿವಿಧ ಭಾಗಗಳ ಪ್ರಮುಖ ಪದಾಧಿಕಾರಿಗಳು ಹಾಗೂ ಗಣ್ಯ ಸ್ವಯಂಸೇವಕರು ಭಾಗವಹಿಸಲಿದ್ದಾರೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.