ನವದೆಹಲಿ, 20 ಸೆಪ್ಟೆಂಬರ್ (ಹಿ.ಸ.):

ಆ್ಯಂಕರ್:ಜೋಧಪುರದಲ್ಲಿ ನಡೆಯುತ್ತಿರುವ ‘ವೀರ್ ಗಾರ್ಡಿಯನ್’ ಜಂಟಿ ವಾಯುಪಡೆ ಕಸರತ್ತಿನ ವೇಳೆ ಭಾನುವಾರ ಭಾರತೀಯ ವಾಯುಪಡೆ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಅಮರ್ ಪ್ರೀತ್ ಸಿಂಗ್ ಹಾಗೂ ಜಪಾನ್ ವಾಯು ಸ್ವಯಂರಕ್ಷಣಾ ಪಡೆ ಮುಖ್ಯಸ್ಥ ಜನರಲ್ ತಕೇಹಿರೊ ಮೊರಿತಾ ಅವರು ತೇಜಸ್ ಯುದ್ಧವಿಮಾನದಲ್ಲಿ ಪ್ರತ್ಯೇಕವಾಗಿ ಹಾರಾಟ ನಡೆಸಿದರು. ಇದೇ ವೇಳೆ ಸುಖೋಯ್-30 ಎಂಕೆಐ ಯುದ್ಧವಿಮಾನವೂ ಆಕಾಶದಲ್ಲಿ ಹಾರಾಟ ನಡೆಸಿತು.

ಭಾರತೀಯ ವಾಯುಪಡೆ ನಿಲ್ದಾಣ, ಜೋಧಪುರದಲ್ಲಿ ನಡೆದ ಕಸರತ್ತಿನ ಭಾಗವಾಗಿ ಇಬ್ಬರು ವಾಯುಪಡೆ ಮುಖ್ಯಸ್ಥರು ಎಲ್‌ಸಿಎ ತೇಜಸ್ ಮಾರ್ಕ್-1 ಯುದ್ಧವಿಮಾನದಲ್ಲಿ ಹಾರಾಟ ನಡೆಸಿದರು. ಈ ಹಾರಾಟವು ಭಾರತ ಮತ್ತು ಜಪಾನ್ ನಡುವಿನ ಹೆಚ್ಚುತ್ತಿರುವ ರಕ್ಷಣಾ ಸಹಕಾರ ಹಾಗೂ ಕಾರ್ಯಾಚರಣಾ ಸಮನ್ವಯವನ್ನು ಪ್ರತಿಬಿಂಬಿಸಿತು.

ಸೆ. 9ರಂದು ಆರಂಭಗೊಂಡಿರುವ ‘ವೀರ್ ಗಾರ್ಡಿಯನ್’ ಕಸರತ್ತು ಸೆ. 22ರವರೆಗೆ ನಡೆಯಲಿದೆ. ದ್ವಿಪಕ್ಷೀಯ ವಾಯು ಕಸರತ್ತಿನಲ್ಲಿ ಎರಡೂ ದೇಶಗಳ ಮುಂಚೂಣಿ ಯುದ್ಧವಿಮಾನಗಳು ಭಾಗವಹಿಸಿವೆ. ಭಾರತದ ತೇಜಸ್, ಸುಖೋಯ್-30 ಎಂಕೆಐ ಮತ್ತು ರಫೇಲ್ ಯುದ್ಧವಿಮಾನಗಳೊಂದಿಗೆ ಜಪಾನ್‌ನ ಎಫ್-2ಎ ಯುದ್ಧವಿಮಾನಗಳು ಕಸರತ್ತಿನಲ್ಲಿ ಪಾಲ್ಗೊಂಡಿವೆ. ಎರಡೂ ವಾಯುಪಡೆಗಳ ನಡುವಿನ ಕಾರ್ಯಾಚರಣಾ ಪರಸ್ಪರ ಸಾಮರ್ಥ್ಯ ಮತ್ತು ರಕ್ಷಣಾ ಸಹಕಾರವನ್ನು ಬಲಪಡಿಸುವುದು ಕಸರತ್ತಿನ ಪ್ರಮುಖ ಉದ್ದೇಶವಾಗಿದೆ.

ಸೆ. 10ರಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ‘ವೀರ್ ಗಾರ್ಡಿಯನ್’ ಕಸರತ್ತಿನಲ್ಲಿ ಭಾಗವಹಿಸಲು ಜಪಾನ್ ತನ್ನ ಯುದ್ಧವಿಮಾನಗಳನ್ನು ಭಾರತಕ್ಕೆ ಕಳುಹಿಸಿರುವುದನ್ನು ಭಾರತ-ಜಪಾನ್ ರಕ್ಷಣಾ ಸಹಭಾಗಿತ್ವದ ‘ವಿಶೇಷ ಮೈಲಿಗಲ್ಲು’ ಎಂದು ಬಣ್ಣಿಸಿದ್ದರು. ಜಪಾನ್ ವಾಯು ಸ್ವಯಂರಕ್ಷಣಾ ಪಡೆಯ ಯುದ್ಧವಿಮಾನಗಳು ಮೊದಲ ಬಾರಿಗೆ ಭಾರತಕ್ಕೆ ಭೇಟಿ ನೀಡಿರುವುದು ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಶಾಂತಿ ಮತ್ತು ಸ್ಥಿರತೆಗಾಗಿ ಎರಡೂ ದೇಶಗಳ ನಡುವಿನ ಹೆಚ್ಚುತ್ತಿರುವ ವಿಶ್ವಾಸ ಹಾಗೂ ಹಂಚಿಕೊಂಡ ಬದ್ಧತೆಯನ್ನು ತೋರಿಸುತ್ತದೆ ಎಂದು ಅವರು ಹೇಳಿದ್ದರು.

ಕಳೆದ ತಿಂಗಳು ನವದೆಹಲಿಯಲ್ಲಿ ತಮ್ಮ ಜಪಾನ್ ಸಹವರ್ತಿಯೊಂದಿಗೆ ನಡೆದ ಮಾತುಕತೆಯನ್ನು ಉಲ್ಲೇಖಿಸಿದ್ದ ರಾಜನಾಥ್ ಸಿಂಗ್, ‘ವೀರ್ ಗಾರ್ಡಿಯನ್’ನಂತಹ ಕಸರತ್ತುಗಳ ಮೂಲಕ ಎರಡೂ ದೇಶಗಳ ನಡುವೆ ಪರಸ್ಪರ ಭೇಟಿ ಹಾಗೂ ಸಹಕಾರದ ವಿನಿಮಯವು ಈ ಸಮನ್ವಯವನ್ನು ಮತ್ತಷ್ಟು ಬಲಪಡಿಸಲಿದೆ ಎಂದು ತಿಳಿಸಿದ್ದರು.

ದ್ವಿಪಕ್ಷೀಯ ಯುದ್ಧ ಕಸರತ್ತಿಗಾಗಿ ಜೋಧಪುರಕ್ಕೆ ಆಗಮಿಸಿದ ಜಪಾನ್ ವಾಯು ಸ್ವಯಂರಕ್ಷಣಾ ಪಡೆಯ ಎಫ್-2 ಯುದ್ಧವಿಮಾನಗಳನ್ನು ಭಾರತೀಯ ವಾಯುಪಡೆ ಸ್ವಾಗತಿಸಿತ್ತು. 14 ದಿನಗಳ ಕಸರತ್ತಿನ ವೇಳೆ ಎರಡೂ ದೇಶಗಳ ವಾಯುಯೋಧರು ಸುಧಾರಿತ ಕಾರ್ಯಾಚರಣಾ ತರಬೇತಿ ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳುವುದರ ಜತೆಗೆ ವೃತ್ತಿಪರ ಅನುಭವ ವಿನಿಮಯ ನಡೆಸಲಿದ್ದಾರೆ.

ಜಪಾನ್ ವಾಯುಪಡೆಯ ಯುದ್ಧವಿಮಾನಗಳೊಂದಿಗೆ ಭಾರತ ನಡೆಸುತ್ತಿರುವ ಎರಡನೇ ವಾಯು ಕಸರತ್ತು ಇದಾಗಿದೆ. 2023ರಲ್ಲಿ ಭಾರತೀಯ ಯುದ್ಧವಿಮಾನಗಳು ಮೊದಲ ಬಾರಿಗೆ ಜಪಾನ್‌ಗೆ ತೆರಳಿ ಕಸರತ್ತಿನಲ್ಲಿ ಭಾಗವಹಿಸಿದ್ದವು. ಆಗ ನಾಲ್ಕು ಸುಖೋಯ್-30 ಎಂಕೆಐ ಯುದ್ಧವಿಮಾನಗಳೊಂದಿಗೆ ಭಾರತೀಯ ತುಕಡಿ ಪಾಲ್ಗೊಂಡಿತ್ತು. ಮೊದಲ ಆವೃತ್ತಿಯ ‘ವೀರ್ ಗಾರ್ಡಿಯನ್’ ಕಸರತ್ತಿನಲ್ಲಿ ಭಾರತ ಮತ್ತು ಜಪಾನ್ ವಾಯುಪಡೆಗಳು 16 ದಿನಗಳ ಕಾಲ ಪರಸ್ಪರರ ಕಾರ್ಯಾಚರಣಾ ಸಾಮರ್ಥ್ಯ ಹಾಗೂ ವಿಶಿಷ್ಟ ಕೌಶಲ್ಯಗಳನ್ನು ಅರಿತುಕೊಂಡಿದ್ದವು.

-------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.