ಬೆಂಗಳೂರು, 08 ಜುಲೈ (ಹಿ.ಸ.)
ಆ್ಯಂಕರ್
ಬೆಂಗಳೂರು–ಮೈಸೂರು ಹೆದ್ದಾರಿಯ ಮದ್ದೂರು ಸಮೀಪ ರಸ್ತೆ ಕೋಪದ ಘಟನೆ ನಡೆದಿದ್ದು, 37 ವರ್ಷದ ವ್ಯಕ್ತಿಯ ತಲೆಗೆ ಜ್ಯಾಕ್ ರಾಡ್ನಿಂದ ಹಲ್ಲೆ ನಡೆಸಿದ ಆರೋಪದಲ್ಲಿ ಬೆಂಗಳೂರಿನ ಮೂವರು ಕ್ಯಾಬ್ ಚಾಲಕರನ್ನು ಪೊಲೀಸರು ಬಂಧಿಸಿದ್ದಾರೆ.
ಪೊಲೀಸರ ಮಾಹಿತಿಯ ಪ್ರಕಾರ, ವಿಜಯನಗರ ಸಮೀಪದ ಅತ್ತಿಗುಪ್ಪೆಯ ನಿವಾಸಿ ಎಂ. ಸಾಗರ್ ಕುಮಾರ್ ಅವರು ಜುಲೈ 5ರ ರಾತ್ರಿ ಮೈಸೂರಿನಿಂದ ಕುಟುಂಬದೊಂದಿಗೆ ಬೆಂಗಳೂರಿಗೆ ಮರಳುತ್ತಿದ್ದರು. ಮಂಡ್ಯ ಜಿಲ್ಲೆಯ ಪಾಂಡವಪುರ ಜಂಕ್ಷನ್ ಸಮೀಪದ ಗಣಂಗೂರು ಟೋಲ್ ಪ್ಲಾಜಾ ಬಳಿ ಆರೋಪಿಗಳು ಪ್ರಯಾಣಿಸುತ್ತಿದ್ದ ಕಾರು, ಸಾಗರ್ ಕುಮಾರ್ ಅವರ ಕಾರಿಗೆ ಸ್ಪರ್ಶಿಸಿತ್ತು. ಈ ವಿಚಾರವಾಗಿ ಎರಡೂ ಪಕ್ಷಗಳ ನಡುವೆ ಮಾತಿನ ಚಕಮಕಿ ನಡೆದರೂ ಬಳಿಕ ರಾಜಿ ಮಾಡಿಕೊಂಡು ತಮ್ಮ ತಮ್ಮ ಪ್ರಯಾಣ ಮುಂದುವರಿಸಿದ್ದರು.ಆದರೆ, ಕೆಲವೇ ದೂರ ಸಾಗಿದ ಬಳಿಕ ಆರೋಪಿಗಳು ಸಾಗರ್ ಕುಮಾರ್ ಅವರ ಕಾರನ್ನು ಹಿಂಬಾಲಿಸಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ರಾತ್ರಿ ಸುಮಾರು 10 ಗಂಟೆಗೆ ಮದ್ದೂರು ಮೇಲ್ಸೇತುವೆ ಬಳಿ ಎರಡು ಕಾರುಗಳಲ್ಲಿ ಬಂದ ಆರೋಪಿಗಳು ಅವರ ವಾಹನವನ್ನು ತಡೆದು, ದಾರಿ ನಿರ್ಬಂಧಿಸಿದ್ದಾರೆ. ಬಳಿಕ ವಾಹನಕ್ಕೆ ಹಾನಿ ಮಾಡಿ, ಸಾಗರ್ ಕುಮಾರ್ ಅವರ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಾಗರ್ ಕುಮಾರ್ ನೀಡಿದ ದೂರಿನ ಪ್ರಕಾರ, ಕನಿಷ್ಠ ಐವರು ಕಾರಿನಿಂದ ಇಳಿದು ವಾಹನಕ್ಕೆ ಹಾನಿ ಮಾಡಿದ್ದು, ತಡೆಯಲು ಮುಂದಾದಾಗ ಅವರ ತಲೆಗೆ ಜ್ಯಾಕ್ ರಾಡ್ನಿಂದ ಹೊಡೆದಿದ್ದಾರೆ. ಘಟನೆಯ ವೇಳೆ ಕಾರಿನಲ್ಲಿದ್ದ ಅವರ ಪತ್ನಿ, ಅತ್ತೆ ಹಾಗೂ ಅಜ್ಜಿ ಹಲ್ಲೆ ನಿಲ್ಲಿಸುವಂತೆ ಮನವಿ ಮಾಡಿದ್ದರೂ, ಆರೋಪಿಗಳು ಬೆದರಿಕೆ ಹಾಕಿ ಸ್ಥಳದಿಂದ ಪರಾರಿಯಾಗಿದ್ದಾರೆ.ಗಾಯಗೊಂಡ ಸಾಗರ್ ಕುಮಾರ್ ಅವರಿಗೆ ಮದ್ದೂರು ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಯಿತು. ನಂತರ ಅವರು ನೀಡಿದ ದೂರಿನಲ್ಲಿ ಉಲ್ಲೇಖಿಸಿದ್ದ ವಾಹನದ ನೋಂದಣಿ ಸಂಖ್ಯೆಯ ಆಧಾರದ ಮೇಲೆ ಪೊಲೀಸರು ತನಿಖೆ ನಡೆಸಿ, ಬೆಂಗಳೂರಿನ ಎಜಿಎಸ್ ಲೇಔಟ್ನಲ್ಲಿ ಮೂವರನ್ನು ಬಂಧಿಸಿದರು.
ಸಂತೋಷ್ ಕುಮಾರ್ (36), ಅರುಣ್ ಕುಮಾರ್ (28) ಮತ್ತು ಡಿ. ಅಭಿಷೇಕ್ (27) ಬಂಧಿತರನ್ನು ಎಂದು ಗುರುತಿಸಲಾಗಿದೆ. ಪ್ರಕರಣದಲ್ಲಿ ಭಾಗಿಯಾಗಿರುವ ಇನ್ನಿಬ್ಬರು ಆರೋಪಿಗಳಿಗಾಗಿ ಪೊಲೀಸರುಕಾರ್ಯಾಚರಣೆ ಮುಂದುವರೆಸಿದ್ದಾರೆ.
---------------
ಹಿಂದೂಸ್ತಾನ್ ಸಮಾಚಾರ್ / SNEHA K
