ಜಮ್ಮು, 16 ಜುಲೈ (ಹಿ.ಸ.):

ಆ್ಯಂಕರ್:

ಕಟ್ಟುನಿಟ್ಟಿನ ಭದ್ರತೆಯ ನಡುವೆ ಅಮರನಾಥ ಯಾತ್ರೆಯ 15ನೇ ತಂಡದ 5,201 ಭಕ್ತರು ಗುರುವಾರ ಜಮ್ಮುವಿನಿಂದ ಕಾಶ್ಮೀರದ ಬಾಲ್ತಾಲ್ ಹಾಗೂ ಪಹಲ್ಗಾಮ್ ಮೂಲ ಶಿಬಿರಗಳಿಂದ ಪ್ರಯಾಣ ಬೆಳೆಸಿದರು.

ಅಧಿಕಾರಿಗಳ ಮಾಹಿತಿ ಪ್ರಕಾರ, ಈ ತಂಡದಲ್ಲಿ 92 ಸಾಧುಗಳು, 9 ಸಾಧ್ವಿಯರು, 3,970 ಪುರುಷರು, 1,124 ಮಹಿಳೆಯರು, 5 ಮಕ್ಕಳು ಹಾಗೂ ಒಬ್ಬ ತೃತೀಯಲಿಂಗಿ ಸೇರಿದ್ದಾರೆ. ಸಿಆರ್‌ಪಿಎಫ್ ಮತ್ತು ಪೊಲೀಸ್ ಭದ್ರತೆಯಲ್ಲಿ 251 ವಾಹನಗಳ ಬೆಂಗಾವಲಿನಲ್ಲಿ ಭಕ್ತರನ್ನು ಎರಡು ಪ್ರತ್ಯೇಕ ತಂಡಗಳಾಗಿ ಕಳುಹಿಸಲಾಯಿತು.

ಬಾಲ್ತಾಲ್ ಮಾರ್ಗಕ್ಕೆ 74 ವಾಹನಗಳಲ್ಲಿ 1,745 ಭಕ್ತರು ಬೆಳಿಗ್ಗೆ 3 ಗಂಟೆಗೆ ಹಾಗೂ ಪಹಲ್ಗಾಮ್ ಮಾರ್ಗಕ್ಕೆ 177 ವಾಹನಗಳಲ್ಲಿ 3,456 ಭಕ್ತರು ಬೆಳಿಗ್ಗೆ 3.30ಕ್ಕೆ ಹೊರಟರು.

ಜುಲೈ 2ರಂದು ಯಾತ್ರೆ ಆರಂಭವಾದ ಬಳಿಕ ಇದುವರೆಗೆ ಜಮ್ಮು ಮೂಲ ಶಿಬಿರದಿಂದ ಒಟ್ಟು 1,04,488 ಯಾತ್ರಿಕರು ಕಾಶ್ಮೀರಕ್ಕೆ ತೆರಳಿದ್ದಾರೆ. ಸಮುದ್ರಮಟ್ಟದಿಂದ 3,880 ಮೀಟರ್ ಎತ್ತರದಲ್ಲಿರುವ ಪವಿತ್ರ ಅಮರನಾಥ ಗುಹೆಯಲ್ಲಿ ಈಗಾಗಲೇ 3.25 ಲಕ್ಷಕ್ಕೂ ಹೆಚ್ಚು ಭಕ್ತರು ದರ್ಶನ ಪಡೆದಿದ್ದಾರೆ.

'ಬಮ್ ಬಮ್ ಭೋಲೆ', 'ಹರ ಹರ ಮಹಾದೇವ' ಹಾಗೂ 'ಜೈ ಬರ್ಫಾನಿ ಬಾಬಾ ಕಿ' ಎಂಬ ಘೋಷಣೆಗಳ ನಡುವೆ ಭಕ್ತರು ಉತ್ಸಾಹದಿಂದ ಪ್ರಯಾಣ ಆರಂಭಿಸಿದರು. ಯಾತ್ರೆಗೆ ಕಲ್ಪಿಸಿರುವ ವ್ಯವಸ್ಥೆಗಳ ಬಗ್ಗೆ ಭಕ್ತರು ತೃಪ್ತಿ ವ್ಯಕ್ತಪಡಿಸಿದ್ದಾರೆ. 57 ದಿನಗಳ ಅಮರನಾಥ ಯಾತ್ರೆ ಆಗಸ್ಟ್ 28ರಂದು ಸಮಾಪ್ತಿಯಾಗಲಿದೆ.

---------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.