ಭೋಪಾಲ್, 13 ಜುಲೈ (ಹಿ.ಸ.):
ಆ್ಯಂಕರ್:
ಮಧ್ಯಪ್ರದೇಶದ ರಾಜಧಾನಿ ಭೋಪಾಲ್ನಲ್ಲಿ ಇಂದು ಎಂಪಿ ಟೆಕ್ ಗ್ರೋತ್ ಕಾನ್ಕ್ಲೇವ್ 3.0 ನಡೆಯಲಿದ್ದು, ಸೆಮಿಕಂಡಕ್ಟರ್, ಡೇಟಾ ಸೆಂಟರ್ ಹಾಗೂ ಜಾಗತಿಕ ಸಾಮರ್ಥ್ಯ ಕೇಂದ್ರಗಳ (ಜಿಸಿಸಿ) ಕ್ಷೇತ್ರಗಳಲ್ಲಿ ಹೂಡಿಕೆ ಆಕರ್ಷಿಸುವ ಕುರಿತು ಮಹತ್ವದ ಚರ್ಚೆಗಳು ನಡೆಯಲಿವೆ. ದೇಶ-ವಿದೇಶದ ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳು, ಹೂಡಿಕೆದಾರರು ಹಾಗೂ ನೀತಿ ತಜ್ಞರು ಕಾನ್ಕ್ಲೇವ್ನಲ್ಲಿ ಭಾಗವಹಿಸಲಿದ್ದಾರೆ.
ಮುಖ್ಯಮಂತ್ರಿ ಡಾ. ಮೋಹನ್ ಯಾದವ್ ಕಾನ್ಕ್ಲೇವ್ಗೆ ಚಾಲನೆ ನೀಡಿ, ತಂತ್ರಜ್ಞಾನ ಆಧಾರಿತ ಕೈಗಾರಿಕಾ ಅಭಿವೃದ್ಧಿಗೆ ರಾಜ್ಯ ಸರ್ಕಾರದ ದೂರದೃಷ್ಟಿಯನ್ನು ಮಂಡಿಸಲಿದ್ದಾರೆ. ಕೈಗಾರಿಕಾ ಪ್ರತಿನಿಧಿಗಳೊಂದಿಗೆ ಪ್ರತ್ಯೇಕ ಸಭೆ ನಡೆಸಿ ಹೂಡಿಕೆ, ಯೋಜನೆಗಳ ಅನುಷ್ಠಾನ ಹಾಗೂ ಭವಿಷ್ಯದ ಸಹಕಾರದ ಅವಕಾಶಗಳ ಕುರಿತು ಚರ್ಚಿಸಲಿದ್ದಾರೆ. ಪ್ರದರ್ಶನ ಮಳಿಗೆಯನ್ನೂ ವೀಕ್ಷಿಸಲಿದ್ದಾರೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಆಯೋಜಿಸಿರುವ ಈ ಕಾನ್ಕ್ಲೇವ್ನ ಮುಖ್ಯ ಉದ್ದೇಶ, ಜಿಸಿಸಿ, ಡೇಟಾ ಸೆಂಟರ್ ಹಾಗೂ ಸೆಮಿಕಂಡಕ್ಟರ್ ಕ್ಷೇತ್ರಗಳಲ್ಲಿ ಮಧ್ಯಪ್ರದೇಶವನ್ನು ದೇಶದ ಪ್ರಮುಖ ಹೂಡಿಕೆ ತಾಣವನ್ನಾಗಿ ರೂಪಿಸುವುದಾಗಿದೆ. ರಾಜ್ಯದ ತಂತ್ರಜ್ಞಾನ ಅಭಿವೃದ್ಧಿ ಪಯಣದ ವಿಶೇಷ ಪ್ರಸ್ತುತಿ ನಡೆಯಲಿದ್ದು, ವಿವಿಧ ಪ್ರಮುಖ ಸಂಸ್ಥೆಗಳ ತಜ್ಞರು ಈ ಕ್ಷೇತ್ರಗಳಲ್ಲಿನ ಅವಕಾಶಗಳ ಕುರಿತು ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳಲಿದ್ದಾರೆ. ವಿವಿಧ ಕಾರ್ಯತಂತ್ರದ ಸಹಭಾಗಿತ್ವ ಒಪ್ಪಂದಗಳ ವಿನಿಮಯವೂ ನಡೆಯಲಿದೆ.
ಕಾನ್ಕ್ಲೇವ್ನಲ್ಲಿ ಸೆಮಿಕಂಡಕ್ಟರ್, ಜಿಸಿಸಿ ಮತ್ತು ಡೇಟಾ ಸೆಂಟರ್ ವಿಷಯಗಳ ಕುರಿತು ವಿಶೇಷ ಗೋಲ್ಮೇಜು ಸಭೆಗಳು ನಡೆಯಲಿದ್ದು, ಕೈಗಾರಿಕಾ ಪ್ರತಿನಿಧಿಗಳು, ನೀತಿ ರೂಪಿಸುವವರು ಹಾಗೂ ಶಿಕ್ಷಣ ತಜ್ಞರು ಹೂಡಿಕೆ, ಕೌಶಲ್ಯಯುತ ಮಾನವ ಸಂಪನ್ಮೂಲ, ಕೈಗಾರಿಕಾ ಮೂಲಸೌಕರ್ಯ ಹಾಗೂ ಭವಿಷ್ಯದ ಅಗತ್ಯಗಳ ಕುರಿತು ಚರ್ಚಿಸಲಿದ್ದಾರೆ.
ಈ ಕಾನ್ಕ್ಲೇವ್ನಲ್ಲಿ ದೇಶ-ವಿದೇಶದ ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳು, ಕೈಗಾರಿಕಾ ಸಂಘಟನೆಗಳು, ಹೂಡಿಕೆದಾರರು, ನವೋದ್ಯಮಗಳು, ಸಂಶೋಧನಾ ಮತ್ತು ಶೈಕ್ಷಣಿಕ ಸಂಸ್ಥೆಗಳ ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ. ಡೇಟಾ ಸೆಂಟರ್, ಸೆಮಿಕಂಡಕ್ಟರ್ ಹಾಗೂ ಇತರ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಹೂಡಿಕೆ ಮತ್ತು ಸಹಕಾರದ ಅವಕಾಶಗಳ ಕುರಿತು ವಿವಿಧ ಸಂಸ್ಥೆಗಳ ಪ್ರತಿನಿಧಿಗಳು ತಮ್ಮ ಅಭಿಪ್ರಾಯಗಳನ್ನು ಮಂಡಿಸಲಿದ್ದಾರೆ.
ಈ ಹಿಂದೆ ನಡೆದ ಎರಡು ಆವೃತ್ತಿಗಳಲ್ಲಿ ರಾಜ್ಯಕ್ಕೆ ಗಣನೀಯ ಹೂಡಿಕೆ ಪ್ರಸ್ತಾವಗಳು ಲಭಿಸಿದ್ದವು. ಮೊದಲ ಕಾನ್ಕ್ಲೇವ್ನಲ್ಲಿ 20 ಸಾವಿರ ಕೋಟಿ ರೂಪಾಯಿಗೂ ಅಧಿಕ ಹೂಡಿಕೆ ಪ್ರಸ್ತಾವಗಳು ದೊರೆತು ಸುಮಾರು 75 ಸಾವಿರ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿದ್ದವು. ಎರಡನೇ ಕಾನ್ಕ್ಲೇವ್ನಲ್ಲಿ 12 ಸಾವಿರ ಕೋಟಿ ರೂಪಾಯಿಗೂ ಅಧಿಕ ಹೂಡಿಕೆ ಪ್ರಸ್ತಾವಗಳು ಲಭಿಸಿ ಸುಮಾರು 48 ಸಾವಿರ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿದ್ದವು. ಮೂರನೇ ಆವೃತ್ತಿಯ ಮೂಲಕ ಈ ಹೂಡಿಕೆ ಪಯಣವನ್ನು ಮತ್ತಷ್ಟು ವಿಸ್ತರಿಸುವ ಗುರಿಯನ್ನು ರಾಜ್ಯ ಸರ್ಕಾರ ಹೊಂದಿದೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
