ನಿಯಾಮಿ (ನೈಜರ್), 19 ಜೂನ್ (ಹಿ.ಸ.) :

ಆ್ಯಂಕರ್ : ಪಶ್ಚಿಮ ಆಫ್ರಿಕಾದ ನೈಜರ್ ದೇಶದ ರಾಜಧಾನಿ ನಿಯಾಮಿಯಲ್ಲಿರುವ ಡಿಯೊರಿ ಹಮಾನಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಗುರುವಾರ ಮುಂಜಾನೆ ಉಗ್ರರು ಭೀಕರ ದಾಳಿ ನಡೆಸಿದ್ದಾರೆ. ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಸ್ಫೋಟಗಳು ಮತ್ತು ಗುಂಡಿನ ಚಕಮಕಿ ನಡೆದಿದ್ದು, ಈ ಘಟನೆಯಲ್ಲಿ 11 ಸೈನಿಕರು ಹಾಗೂ ಇಬ್ಬರು ನಾಗರಿಕರು ಮೃತಪಟ್ಟಿದ್ದಾರೆ. ಪ್ರತಿದಾಳಿಯಲ್ಲಿ 22 ಉಗ್ರರನ್ನು ಭದ್ರತಾ ಪಡೆಗಳು ಹೊಡೆದುರುಳಿಸಿವೆ ಎಂದು ನೈಜರ್ನ ಸೇನಾ ಆಡಳಿತ ತಿಳಿಸಿದೆ.

ಸ್ಥಳೀಯ ವರದಿಗಳ ಪ್ರಕಾರ, ಉಗ್ರರು ವಿಮಾನ ನಿಲ್ದಾಣದ ಮುಖ್ಯ ಪ್ರವೇಶ ದ್ವಾರದ ಸಮೀಪದಿಂದಲೇ ದಾಳಿ ಆರಂಭಿಸಿದರು. ದಾಳಿ ಆರಂಭವಾದ ತಕ್ಷಣ ಭದ್ರತಾ ಪಡೆಗಳು ವಿಮಾನ ನಿಲ್ದಾಣದ ಸಂಪೂರ್ಣ ಪ್ರದೇಶವನ್ನು ಸುತ್ತುವರಿದು ಕಾರ್ಯಾಚರಣೆ ನಡೆಸಿದವು.

ಸೇನೆಯ ಕಟ್ಟುನಿಟ್ಟಿನ ಕ್ರಮದಿಂದ ಉಗ್ರರು ವಿವಿಧ ದಿಕ್ಕುಗಳಿಗೆ ಪರಾರಿಯಾಗಲು ಯತ್ನಿಸಿದರೂ, ಭದ್ರತಾ ಪಡೆಗಳು ಅವರನ್ನು ಬೆನ್ನಟ್ಟಿ ಹಲವರನ್ನು ಹತ್ಯೆಗೈದವು. ಪರಾರಿಯಾಗುವ ವೇಳೆ ಉಗ್ರರು ತಮ್ಮ ಶಸ್ತ್ರಾಸ್ತ್ರಗಳ ದೊಡ್ಡ ಸಂಗ್ರಹವನ್ನು ಸ್ಥಳದಲ್ಲೇ ಬಿಟ್ಟು ಹೋಗಿರುವುದಾಗಿ ತಿಳಿದುಬಂದಿದೆ.

ಈ ದಾಳಿಯ ಹೊಣೆಯನ್ನು ಇದುವರೆಗೆ ಯಾವುದೇ ಉಗ್ರ ಸಂಘಟನೆ ಹೊತ್ತುಕೊಂಡಿಲ್ಲ. ಆದರೆ ಇದೇ ವರ್ಷದ ಜನವರಿಯಲ್ಲಿ ಇದೇ ವಿಮಾನ ನಿಲ್ದಾಣದ ಮೇಲೆ ಇದೇ ರೀತಿಯ ದಾಳಿ ನಡೆದಿತ್ತು. ಆ ವೇಳೆ ಸಾಹೆಲ್ ಪ್ರದೇಶದಲ್ಲಿ ಸಕ್ರಿಯವಾಗಿರುವ ಇಸ್ಲಾಮಿಕ್ ಉಗ್ರ ಸಂಘಟನೆಗೆ ಸೇರಿದ ಉಗ್ರರು ಮಾರ್ಟರ್ಗಳು ಮತ್ತು ಮಾನವರಹಿತ ವಿಮಾನಗಳನ್ನು ಬಳಸಿಕೊಂಡು ಬಹುಮುಖ ದಾಳಿ ನಡೆಸಿದ್ದರು.

ಅಂದು ನಾಗರಿಕ ವಿಮಾನ ನಿಲ್ದಾಣದ ಟರ್ಮಿನಲ್ ಹಾಗೂ ಅದರ ಪಕ್ಕದಲ್ಲಿರುವ ಪ್ರಮುಖ ಸೇನಾ ವಾಯುನೆಲೆಯನ್ನು ಗುರಿಯಾಗಿಸಲಾಗಿತ್ತು. ಈ ವಾಯುನೆಲೆ ನೈಜರ್ ಸೇನೆಯ ಪ್ರಮುಖ ಕಾರ್ಯಾಚರಣೆಗಳ ಕೇಂದ್ರವಾಗಿದ್ದು, ದಾಳಿಯಲ್ಲಿ ಓಡುದಾರಿ, ಸೇನಾ ವಾಹನಗಳು ಮತ್ತು ವಾಣಿಜ್ಯ ವಿಮಾನಗಳಿಗೆ ಭಾರೀ ಹಾನಿಯಾಗಿತ್ತು. ಆ ಸಂದರ್ಭದಲ್ಲಿ ಸೇನೆಯೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದ ರಷ್ಯಾದ ಯೋಧರು ಸಹ ಪ್ರತಿದಾಳಿಯಲ್ಲಿ ಭಾಗವಹಿಸಿ ಹಲವು ಉಗ್ರರನ್ನು ಹತ್ಯೆಗೈದು, ಕೆಲವರನ್ನು ಜೀವಂತವಾಗಿ ಬಂಧಿಸಿದ್ದರು.

ಉಗ್ರಗಾಮಿತ್ವದ ವಿರುದ್ಧ ನೈಜರ್ನ ನಿರಂತರ ಹೋರಾಟ

ಕಳೆದ ಒಂದು ದಶಕಕ್ಕೂ ಹೆಚ್ಚು ಕಾಲ ನೈಜರ್ ದೇಶ ಸಂಘಟಿತ ಇಸ್ಲಾಮಿಕ್ ಉಗ್ರಗಾಮಿ ಬಂಡಾಯವನ್ನು ಎದುರಿಸುತ್ತಿದೆ. ನೆರೆಯ ಮಾಲಿ ಮತ್ತು ಬುರ್ಕಿನಾ ಫಾಸೊ ದೇಶಗಳಂತೆ ನೈಜರ್ನಲ್ಲೂ ಸೇನಾ ಆಡಳಿತ ಅಧಿಕಾರದಲ್ಲಿದೆ. ದೇಶದಲ್ಲಿನ ಹಿಂಸಾಚಾರವನ್ನು ನಿಯಂತ್ರಿಸುವ ಭರವಸೆಯೊಂದಿಗೆ ಸೇನೆಯು ಅಧಿಕಾರ ವಹಿಸಿಕೊಂಡಿದ್ದರೂ, ಸಾಹೆಲ್ ಪ್ರದೇಶದಲ್ಲಿ ಉಗ್ರ ಚಟುವಟಿಕೆಗಳು ಮುಂದುವರಿದಿವೆ.

ಪ್ರಸ್ತುತ ನೈಜರ್ ಪಶ್ಚಿಮ ಭಾಗದಲ್ಲಿ ಇಸ್ಲಾಮಿಕ್ ಸ್ಟೇಟ್ಗೆ ಸಂಬಂಧಿಸಿದ ಉಗ್ರ ಗುಂಪುಗಳು ಹಾಗೂ ಅಲ್-ಖೈದಾ ಬೆಂಬಲಿತ ಸಂಘಟನೆಗಳ ವಿರುದ್ಧ ಹೋರಾಟ ನಡೆಸುತ್ತಿದೆ. ಇದೇ ವೇಳೆ ದಕ್ಷಿಣ-ಪೂರ್ವ ಭಾಗದಲ್ಲಿ ಬೋಕೊ ಹರಾಮ್ ಮತ್ತು ಇತರ ಉಗ್ರ ಸಂಘಟನೆಗಳಿಂದಲೂ ಭದ್ರತಾ ಸವಾಲು ಎದುರಿಸುತ್ತಿದೆ.

ಸಾಹೆಲ್ ಪ್ರದೇಶದಲ್ಲಿ 2010ರ ದಶಕದ ಮಧ್ಯಭಾಗದಿಂದ ಉಗ್ರಗಾಮಿ ಹಿಂಸಾಚಾರ ತೀವ್ರಗೊಂಡಿದ್ದು, ನೈಜರ್ ಸೇರಿದಂತೆ ಹಲವಾರು ಆಫ್ರಿಕನ್ ರಾಷ್ಟ್ರಗಳ ಸ್ಥಿರತೆ ಮತ್ತು ಭದ್ರತೆಗೆ ಗಂಭೀರ ಸವಾಲಾಗಿ ಪರಿಣಮಿಸಿದೆ. ಇತ್ತೀಚಿನ ವಿಮಾನ ನಿಲ್ದಾಣದ ಮೇಲಿನ ದಾಳಿ ದೇಶದ ಭದ್ರತಾ ಪರಿಸ್ಥಿತಿ ಇನ್ನೂ ಆತಂಕಕಾರಿಯಾಗಿದೆ ಎಂಬುದನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.