ಬ್ಯಾಟನ್ ರೂಜ್, 20 ಏಪ್ರಿಲ್ (ಹಿ.ಸ.):
ಆ್ಯಂಕರ್ : ಅಮೆರಿಕದ ಲೂಯಿಸಿಯಾನ ರಾಜ್ಯದ ಶ್ರೆವೆಪೋರ್ಟ್ ನಗರದಲ್ಲಿ ಭಾನುವಾರ ಮುಂಜಾನೆ ನಡೆದ ಭೀಕರ ಗುಂಡಿನ ದಾಳಿಯಲ್ಲಿ ಎಂಟು ಮಕ್ಕಳು ಸಾವನ್ನಪ್ಪಿದ್ದು, ಇಬ್ಬರು ಮಹಿಳೆಯರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಈ ಘಟನೆ ಇಡೀ ಪ್ರದೇಶವನ್ನು ಬೆಚ್ಚಿಬೀಳಿಸಿದ್ದು, 2024ರ ಜನವರಿಯ ನಂತರ ಅಮೆರಿಕದಲ್ಲಿ ನಡೆದ ಅತ್ಯಂತ ಮಾರಕ ಸಾಮೂಹಿಕ ಗುಂಡಿನ ದಾಳಿಯಾಗಿದೆ.
ಪೊಲೀಸರ ಪ್ರಕಾರ, ಶಂಕಿತನಾಗಿ ಗುರುತಿಸಲ್ಪಟ್ಟಿರುವ ಶಾಮರ್ ಎಲ್ಕಿನ್ಸ್ ಮೊದಲು ಬೀದಿಯಲ್ಲಿ ಮಹಿಳೆಯೊಬ್ಬಳ ಮೇಲೆ ಗುಂಡು ಹಾರಿಸಿ ಕೊಂದಿದ್ದಾನೆ. ಬಳಿಕ ಆತ ಹತ್ತಿರದ ಮನೆಯೊಂದಕ್ಕೆ ನುಗ್ಗಿ, ಅಲ್ಲಿ ಇದ್ದ ಎಂಟು ಮಕ್ಕಳನ್ನು ಗುಂಡಿಕ್ಕಿ ಹತ್ಯೆಗೈದಿದ್ದಾನೆ. ಈ ವೇಳೆ ಇನ್ನಿಬ್ಬರು ಮಹಿಳೆಯರು ಹಾಗೂ ಯುವಕನೊಬ್ಬ ಗಾಯಗೊಂಡಿದ್ದಾರೆ.
ಗುಂಡಿನ ದಾಳಿಯಲ್ಲಿ ಮೃತಪಟ್ಟ ಮಕ್ಕಳನ್ನು ಜಯ್ಲಾ ಎಲ್ಕಿನ್ಸ್ (3), ಶೈಲಾ ಎಲ್ಕಿನ್ಸ್ (5), ಕಾಯ್ಲಾ ಪ್ಯೂ (6), ಲೈಲಾ ಪ್ಯೂ (7), ಮಾರ್ಕೆಡಾನ್ ಪ್ಯೂ (10), ಸರಿಯಾ ಸ್ನೋ (11), ಖೇಡರಿಯನ್ ಸ್ನೋ (6) ಮತ್ತು ಬ್ರೇಲೋನ್ ಸ್ನೋ (5) ಎಂದು ಗುರುತಿಸಲಾಗಿದೆ. ಮೃತಪಟ್ಟವರಲ್ಲಿ ಮೂವರು ಹುಡುಗರು ಮತ್ತು ಐವರು ಹುಡುಗಿಯರು ಸೇರಿದ್ದಾರೆ. ಈ ಮಕ್ಕಳಲ್ಲಿ ಕೆಲವರು ಒಡಹುಟ್ಟಿದವರಾಗಿದ್ದು, ಕುಟುಂಬದ ಹಲವರು ಈ ದಾಳಿಗೆ ಬಲಿಯಾಗಿದ್ದಾರೆ.
ಘಟನೆಯ ಸಮಯದಲ್ಲಿ ಮನೆಯ ಮೇಲ್ಛಾವಣಿಯಿಂದ ಹಾರಿ ತಪ್ಪಿಸಿಕೊಳ್ಳಲು ಯತ್ನಿಸಿದ 13 ವರ್ಷದ ಬಾಲಕನೊಬ್ಬ ಗಾಯಗೊಂಡಿದ್ದಾನೆ. ಆತನಿಗೆ ಹಲವು ಮೂಳೆಗಳು ಮುರಿದಿವೆ ಎಂದು ಕ್ಯಾಡೋ ಪ್ಯಾರಿಷ್ ಕರೋನರ್ ಕಚೇರಿ ತಿಳಿಸಿದೆ.
ಪೊಲೀಸರ ಗುಂಡಿನ ದಾಳಿಯಲ್ಲಿ ಶಂಕಿತ ಶಾಮರ್ ಎಲ್ಕಿನ್ಸ್ ಸಾವನ್ನಪ್ಪಿದ್ದಾನೆ. ಆತ 2019ರಲ್ಲಿ ಶಸ್ತ್ರಾಸ್ತ್ರ ಸಂಬಂಧಿತ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿದ್ದನೆಂಬ ಮಾಹಿತಿ ಹೊರಬಂದಿದೆ. ಅಲ್ಲದೆ, ಆತ ಏಳು ವರ್ಷಗಳ ಕಾಲ ಲೂಯಿಸಿಯಾನ ಆರ್ಮಿ ನ್ಯಾಷನಲ್ ಗಾರ್ಡ್ನಲ್ಲೂ ಸೇವೆ ಸಲ್ಲಿಸಿದ್ದಾನೆ ಎಂದು ತಿಳಿದುಬಂದಿದೆ.
ಗುಂಡಿನ ದಾಳಿಯ ವೇಳೆ ಕೆಲವು ಮಕ್ಕಳು ಹಿಂಬಾಗಿಲ ಮೂಲಕ ತಪ್ಪಿಸಿಕೊಳ್ಳಲು ಯತ್ನಿಸಿದ್ದರು ಎಂದು ರಾಜ್ಯ ಪ್ರತಿನಿಧಿ ಟಮ್ಮಿ ಫೆಲ್ಪ್ಸ್ ತಿಳಿಸಿದ್ದಾರೆ. ಅನೇಕ ಕಾನೂನು ಜಾರಿ ಸಂಸ್ಥೆಗಳು ಈ ಪ್ರಕರಣದ ತನಿಖೆ ನಡೆಸುತ್ತಿವೆ ಎಂದು ಲೂಯಿಸಿಯಾನ ಅಟಾರ್ನಿ ಜನರಲ್ ಲಿಜ್ ಮುರ್ರಿಲ್ ತಿಳಿಸಿದ್ದಾರೆ.
ಈ ಘಟನೆಯಿಂದ ಇಡೀ ಶ್ರೆವೆಪೋರ್ಟ್ ನಗರವೇ ದುಃಖದ ಮಡುವಿನಲ್ಲಿ ಮುಳುಗಿದೆ. “ಈ ಘಟನೆ ಇಡೀ ನಗರವನ್ನು ಬೆಚ್ಚಿಬೀಳಿಸಿದೆ” ಎಂದು ಶ್ರೆವೆಪೋರ್ಟ್ ಮೇಯರ್ ಟಾಮ್ ಆರ್ಸೆನ್ಯೂ ಹೇಳಿದ್ದಾರೆ. “ನನ್ನ ಹೃದಯ ಮುರಿದಿದೆ. ಇದು ಶ್ರೆವೆಪೋರ್ಟ್ ಇತಿಹಾಸದಲ್ಲೇ ಅತ್ಯಂತ ಕೆಟ್ಟ ಘಟನೆ” ಎಂದು ನಗರ ಮಂಡಳಿಯ ಸದಸ್ಯೆ ಟಬಾಥಾ ಎಚ್. ಟೇಲರ್ ಕಣ್ಣೀರಿಟ್ಟಿದ್ದಾರೆ.
“ಇಂತಹ ಘಟನೆ ಹೇಗೆ ಸಂಭವಿಸಬಹುದು ಎಂಬುದನ್ನು ಊಹಿಸಲೂ ಸಾಧ್ಯವಾಗುತ್ತಿಲ್ಲ” ಎಂದು ಶ್ರೆವೆಪೋರ್ಟ್ ಪೊಲೀಸ್ ಮುಖ್ಯಸ್ಥ ವೇಯ್ನ್ ಸ್ಮಿತ್ ತಿಳಿಸಿದ್ದಾರೆ.
ಅಮೆರಿಕದಲ್ಲಿ ಈ ವರ್ಷ ಮಾತ್ರ ಕನಿಷ್ಠ 114 ಸಾಮೂಹಿಕ ಗುಂಡಿನ ದಾಳಿಗಳು ನಡೆದಿವೆ ಎಂದು ಗನ್ ವಯೊಲೆನ್ಸ್ ಆರ್ಕೈವ್ ವರದಿ ಮಾಡಿದೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
