ನವದೆಹಲಿ, 05 ಮಾರ್ಚ್ (ಹಿ.ಸ.):

ಆ್ಯಂಕರ್:

ರಾಷ್ಟ್ರಪತಿ ಭವನದಲ್ಲಿ ನಡೆಯುವ ‘ಗಾರ್ಡ್ ಬದಲಾವಣೆ’ ಸಮಾರಂಭದ ಸಮಯವನ್ನು ಪರಿಷ್ಕರಿಸಲಾಗಿದೆ. ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರ ಔಪಚಾರಿಕ ಕಾವಲುಗಾರರ ಬದಲಾವಣೆಯನ್ನು ಸೂಚಿಸುವ ಈ ಸಮಾರಂಭವು ಇನ್ನು ಮುಂದೆ ಬೇಸಿಗೆ ವೇಳಾಪಟ್ಟಿಯ ಪ್ರಕಾರ ಪ್ರತಿ ಶನಿವಾರ ಬೆಳಿಗ್ಗೆ 8ರಿಂದ 9ರ ನಡುವೆ ನಡೆಯಲಿದೆ, ಮಾರ್ಚ್ 7ರಿಂದ ಹೊಸ ಸಮಯ ಜಾರಿಯಾಗಲಿದೆ ಎಂದು ರಾಷ್ಟ್ರಪತಿ ಭವನ ಗುರುವಾರ ಪ್ರಕಟಣೆ ನೀಡಿದೆ.

ಪ್ರತಿ ಶನಿವಾರ ರಾಷ್ಟ್ರಪತಿ ಭವನದ ಮುಂಭಾಗದಲ್ಲಿ ನಡೆಯುವ ಈ ಸಮಾರಂಭವು, ಆ ದಿನ ರಜೆ ಇದ್ದಲ್ಲಿ ನಡೆಯುವುದಿಲ್ಲ ಎಂದು ತಿಳಿಸಲಾಗಿದೆ.

ಸಮಾರಂಭ ವೀಕ್ಷಿಸಲು ಇಚ್ಛಿಸುವವರು ಪ್ರತಿ ವ್ಯಕ್ತಿಗೆ ₹50 ಆನ್‌ಲೈನ್ ನೋಂದಣಿ ಶುಲ್ಕವನ್ನು ಪಾವತಿಸಬೇಕು. ಈ ಶುಲ್ಕ ಮರುಪಾವತಿಸಲಾಗದು ಹಾಗೂ ವರ್ಗಾಯಿಸಲಾಗದು.

ಸುಮಾರು 50 ನಿಮಿಷಗಳ ಕಾಲ ನಡೆಯುವ ಈ ಕಾರ್ಯಕ್ರಮವು ವಿಧ್ಯುಕ್ತ ಬ್ಯಾಂಡ್ ವಾದನದೊಂದಿಗೆ ಆರಂಭವಾಗುತ್ತದೆ. ಪೆರೇಡ್ ಕಮಾಂಡರ್ ಆಗಮನದ ಬಳಿಕ, ಪಿಬಿಜಿ ಅಶ್ವಸೈನ್ಯವು ದಕ್ಷಿಣ ಅಂಗಳದಿಂದ ಪ್ರವೇಶಿಸುತ್ತದೆ. ನಂತರ ಗೂರ್ಖಾ ರೈಫಲ್ಸ್ ಮೆರವಣಿಗೆಯ ತುಕಡಿ ಆಗಮಿಸುತ್ತದೆ.

ಹೊಸ ಮತ್ತು ಹಳೆಯ ಗಾರ್ಡ್‌ಗಳ ಪರಿಶೀಲನೆಯ ಬಳಿಕ, ಸೆಲ್ಯೂಟ್ ನೀಡಲಾಗುತ್ತದೆ ಮತ್ತು ಹೊಸ ಗಾರ್ಡ್‌ಗೆ ಔಪಚಾರಿಕವಾಗಿ ಅಧಿಕಾರ ಹಸ್ತಾಂತರಿಸಲಾಗುತ್ತದೆ. ಬಳಿಕ ರಾಷ್ಟ್ರೀಯ ಸೆಲ್ಯೂಟ್ ನೆರವೇರಿಸಲಾಗುತ್ತದೆ.

ಸಮಾರಂಭದ ಅತ್ಯಂತ ಆಕರ್ಷಕ ಭಾಗವೆಂದರೆ ಪಿಬಿಜಿ ಪ್ರಸ್ತುತಪಡಿಸುವ ಕುದುರೆ ಸವಾರಿ ಪ್ರದರ್ಶನ. ಕಾರ್ಯಕ್ರಮದ ಕೊನೆಯಲ್ಲಿ ರಾಷ್ಟ್ರಗೀತೆ ನುಡಿಸಲಾಗುತ್ತದೆ.

ರಾಷ್ಟ್ರಪತಿ ಭವನದ ಭವ್ಯ ಹಿನ್ನೆಲೆಯ ನಡುವೆ, ಸುಸಂಘಟಿತ ಪಡೆಗಳು ಮತ್ತು ಸುಂದರ ಉದ್ಯಾನವನಗಳ ಸಮ್ಮಿಲನದಲ್ಲಿ ನಡೆಯುವ ಈ ಸಮಾರಂಭವು ದೇಶದ ಸೈನಿಕ ಪರಂಪರೆ, ಶಿಸ್ತು ಮತ್ತು ಶೌರ್ಯದ ರೋಮಾಂಚಕ ಪ್ರತಿಬಿಂಬವೆಂದು ಪರಿಗಣಿಸಲಾಗಿದೆ.

---------------

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa