ನವದೆಹಲಿ, 19 ಫೆಬ್ರವರಿ (ಹಿ.ಸ.) :

ಆ್ಯಂಕರ್ : ಪ್ರಧಾನಿ ನರೇಂದ್ರ ಮೋದಿ ಅವರು ಎಐ ಇಂಪ್ಯಾಕ್ಟ್ ಶೃಂಗಸಭೆಯಲ್ಲಿ ಜಾಗತಿಕ ನಾಯಕರಿಗೆ ಕೃತಕ ಬುದ್ಧಿಮತ್ತೆಯ ನೈತಿಕ ಬಳಕೆಗೆ ಮೂರು ಪ್ರಮುಖ ಸಲಹೆಗಳನ್ನು ನೀಡಿದರು — ದತ್ತಾಂಶ ಸ್ವಾಯತ್ತತೆ, ಪಾರದರ್ಶಕ ನಿಯಮಗಳು ಮತ್ತು ಮಾನವೀಯ ಮೌಲ್ಯಗಳ ಆಧಾರಿತ ಮಾರ್ಗದರ್ಶನ.

ದತ್ತಾಂಶ ಮಾಲೀಕತ್ವವನ್ನು ಗೌರವಿಸುವ ಜಾಗತಿಕ ವಿಶ್ವಾಸಾರ್ಹ ಚೌಕಟ್ಟು ಅಗತ್ಯವಿದೆ ಎಂದು ಪ್ರಧಾನಿ ಹೇಳಿದರು. ಎಐ ವೇದಿಕೆಗಳು “ಕಪ್ಪು ಪೆಟ್ಟಿಗೆ” ವಿಧಾನ ಬಿಟ್ಟು “ಗಾಜಿನ ಪೆಟ್ಟಿಗೆ” ವಿಧಾನವನ್ನು ಅಳವಡಿಸಬೇಕು; ಸುರಕ್ಷತಾ ನಿಯಮಗಳು ವೀಕ್ಷಿಸಬಹುದಾದ ಮತ್ತು ಪರಿಶೀಲಿಸಬಹುದಾದಂತಿರಬೇಕು ಎಂದು ಒತ್ತಿ ಹೇಳಿದರು.

ಎಐಗೆ ಸ್ಪಷ್ಟ ಮಾನವೀಯ ಮೌಲ್ಯಗಳ ಮಾರ್ಗದರ್ಶನ ಅಗತ್ಯವಿದೆ ಎಂದು ಅವರು ಹೇಳಿದರು. ಲಾಭದ ಜೊತೆಗೆ ಉದ್ದೇಶಕ್ಕೂ ಆದ್ಯತೆ ನೀಡಬೇಕು. “ಅಧಿಕಾರವಲ್ಲ, ಸಬಲೀಕರಣ” ಎಂಬುದು ಭಾರತದ ದೃಷ್ಟಿಕೋನ ಎಂದು ತಿಳಿಸಿದರು. ಜಾಗತಿಕ ದಕ್ಷಿಣದ ಆದ್ಯತೆಗಳನ್ನು ಎಐ ಆಡಳಿತದ ಕೇಂದ್ರದಲ್ಲಿ ಇರಿಸುವಂತೆ ಕರೆ ನೀಡಿದರು.

ಭಾರತದ ಎಐ ಮಿಷನ್ ಅಡಿಯಲ್ಲಿ 38,000 ಜಿಪಿಯುಗಳು ಈಗಾಗಲೇ ಲಭ್ಯವಿದ್ದು, ಮುಂದಿನ ಆರು ತಿಂಗಳಲ್ಲಿ 24,000 ಹೆಚ್ಚುವರಿ ಜಿಪಿಯುಗಳನ್ನು ಸ್ಥಾಪಿಸಲಾಗುತ್ತದೆ. 7,500ಕ್ಕೂ ಹೆಚ್ಚು ಡೇಟಾ ಸೆಟ್‌ಗಳು ಮತ್ತು 270 ಎಐ ಮಾದರಿಗಳನ್ನು ರಾಷ್ಟ್ರೀಯ ಸಂಪನ್ಮೂಲಗಳಾಗಿ ಹಂಚಿಕೊಳ್ಳಲಾಗಿದೆ ಎಂದು ಪ್ರಧಾನಿ ಮಾಹಿತಿ ನೀಡಿದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa