ನವದೆಹಲಿ, 04 ನವೆಂಬರ್ (ಹಿ.ಸ.):

ಶತ್ರುಗಳ ಬಲಿಷ್ಠ ಟ್ಯಾಂಕ್‌ಗಳನ್ನು ನಾಶಪಡಿಸುವ ಸಾಮರ್ಥ್ಯ ಹೊಂದಿರುವ ಸ್ವದೇಶಿ ನಾಗಾಸ್ತ್ರ-1 ಟ್ಯಾಂಕ್ ವಿರೋಧಿ ಲೋಯಿಟರಿಂಗ್ ಯುದ್ಧಸಾಮಗ್ರಿ ವ್ಯವಸ್ಥೆಯ 450 ಘಟಕಗಳನ್ನು ಭಾರತೀಯ ಸೇನೆಗೆ ಹಸ್ತಾಂತರಿಸಲಾಗಿದೆ.

ನಾಗಪುರ ಮೂಲದ ಸೋಲಾರ್ ಡಿಫೆನ್ಸ್ ಆ್ಯಂಡ್ ಏರೋಸ್ಪೇಸ್ ಲಿಮಿಟೆಡ್ ಎರಡನೇ ಹಂತದಲ್ಲಿ 450 ಘಟಕಗಳನ್ನು ಸೇನೆಗೆ ಒದಗಿಸಿದೆ. ಜಿಪಿಎಸ್ ಆಧಾರಿತ ಈ ಆತ್ಮಹತ್ಯಾ ಡ್ರೋನ್ ಶತ್ರು ಪ್ರದೇಶವನ್ನು ಪ್ರವೇಶಿಸಿ ಗುರಿಯ ಮೇಲೆ ನಿಖರ ದಾಳಿ ನಡೆಸುವ ಸಾಮರ್ಥ್ಯ ಹೊಂದಿದೆ. ಆಪರೇಷನ್ ಸಿಂಧೂರ ಕಾರ್ಯಾಚರಣೆಯ ಸಂದರ್ಭದಲ್ಲಿಯೂ ಭಾರತೀಯ ಸೇನೆ ಪಾಕಿಸ್ತಾನದ ಉಗ್ರರ ಅಡಗುತಾಣಗಳನ್ನು ಗುರಿಯಾಗಿಸಲು ನಾಗಾಸ್ತ್ರ-1 ಬಳಸಿತ್ತು.

ಸೇನೆಯ ನಿಖರ ದಾಳಿ ಸಾಮರ್ಥ್ಯ ಹೆಚ್ಚಿಸುವ ಉದ್ದೇಶದಿಂದ 450 ನಾಗಾಸ್ತ್ರ-1ಆರ್ ವ್ಯವಸ್ಥೆಗಳಿಗೆ ಆದೇಶ ನೀಡಲಾಗಿತ್ತು. ತುರ್ತು ಖರೀದಿ ಅಧಿಕಾರದಡಿ ಈ ಖರೀದಿ ಪ್ರಕ್ರಿಯೆ ಕೈಗೊಳ್ಳಲಾಗಿದ್ದು, ಕಳೆದ ತಿಂಗಳು ಪೂರೈಕೆ ಮಾಡಲಾಗಿದೆ. ಹೆಚ್ಚಿನ ಎತ್ತರದ ಪ್ರದೇಶಗಳಲ್ಲಿಯೂ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿರುವ ಈ ಡ್ರೋನ್‌ಗಳು ಹಗಲು ಮತ್ತು ರಾತ್ರಿ ವೇಳೆ ಕಣ್ಗಾವಲು ನಡೆಸಬಲ್ಲವು.

ನಾಗಪುರದ ಸೋಲಾರ್ ಡಿಫೆನ್ಸ್ ಆ್ಯಂಡ್ ಏರೋಸ್ಪೇಸ್ ಲಿಮಿಟೆಡ್‌ನಲ್ಲಿ ತಯಾರಾದ ನಾಗಾಸ್ತ್ರ-1ಆರ್ ವ್ಯವಸ್ಥೆಯ ಮೊದಲ ಹಂತದ 120 ಘಟಕಗಳನ್ನು 2024ರ ಜೂನ್‌ನಲ್ಲಿ ಭಾರತೀಯ ಸೇನೆಗೆ ಹಸ್ತಾಂತರಿಸಲಾಗಿತ್ತು. ಆಪರೇಷನ್ ಸಿಂಧೂರದ ಸಂದರ್ಭದಲ್ಲಿ ಈ ಶಸ್ತ್ರಾಸ್ತ್ರಗಳನ್ನು ಪಾಕಿಸ್ತಾನದ ಉಗ್ರರ ನೆಲೆಗಳ ವಿರುದ್ಧ ಬಳಸಲಾಗಿತ್ತು. ಸೇನೆಯ ದಾಳಿ ಸಾಮರ್ಥ್ಯ ಹೆಚ್ಚಿಸುವುದು ಮತ್ತು ಪದಾತಿ ಪಡೆಗಳನ್ನು ಆಧುನೀಕರಿಸುವ ಉದ್ದೇಶದಿಂದ ಹೆಚ್ಚುವರಿ ಘಟಕಗಳಿಗೆ ಬೇಡಿಕೆ ಸಲ್ಲಿಸಲಾಗಿತ್ತು.

ಈ ಯುದ್ಧಸಾಮಗ್ರಿ ವ್ಯವಸ್ಥೆಯಲ್ಲಿ ಶೇ.80ಕ್ಕಿಂತ ಹೆಚ್ಚು ಸ್ವದೇಶಿ ವಸ್ತುಗಳನ್ನು ಬಳಸಲಾಗಿದೆ. ಶತ್ರು ಪ್ರದೇಶಕ್ಕೆ ಹಾರಿಹೋಗಿ ಗುರಿಯ ಮೇಲೆ ಸುತ್ತಾಡುತ್ತಾ ಸೂಕ್ತ ಸಮಯದಲ್ಲಿ ದಾಳಿ ನಡೆಸುವ ಸಾಮರ್ಥ್ಯ ಇದಕ್ಕಿದೆ. ದಾಳಿ ನಡೆಸುವ ನಿರ್ಧಾರವನ್ನು ರದ್ದುಗೊಳಿಸಿದರೆ ಡ್ರೋನ್‌ ಅನ್ನು ಹಿಂದಕ್ಕೆ ಕರೆಸಿಕೊಳ್ಳಬಹುದು. ಇದರಿಂದ ಮರುಬಳಕೆಗೂ ಅವಕಾಶವಿದೆ.

ಕಂಪನಿಯ ಮಾಹಿತಿಯ ಪ್ರಕಾರ, ನಾಗಾಸ್ತ್ರ-1 ಶತ್ರುಗಳ ರೇಡಾರ್‌ಗಳಿಗೆ ಸಿಗದಂತೆ ವಿನ್ಯಾಸಗೊಳಿಸಲಾಗಿದೆ. ಇದು 4,500 ಮೀಟರ್‌ಗಿಂತಲೂ ಹೆಚ್ಚಿನ ಎತ್ತರದಿಂದ ಶತ್ರುಗಳ ಚಲನವಲನಗಳನ್ನು ಗಮನಿಸಬಲ್ಲದು. ಸುಮಾರು 60 ನಿಮಿಷಗಳ ಕಾಲ ನಿರಂತರವಾಗಿ ಗಾಳಿಯಲ್ಲಿ ಹಾರಾಟ ನಡೆಸುವ ಸಾಮರ್ಥ್ಯ ಹೊಂದಿದೆ. ಇದರಿಂದ ಶತ್ರು ಪ್ರದೇಶದಲ್ಲಿ ಕಣ್ಗಾವಲು ನಡೆಸಿ ಸೂಕ್ತ ಸಂದರ್ಭಕ್ಕಾಗಿ ಕಾಯಬಹುದು.

ಈ ವ್ಯವಸ್ಥೆಯಲ್ಲಿ 360 ಡಿಗ್ರಿ ಚಲನೆಯ ಸಾಮರ್ಥ್ಯವಿರುವ ಕ್ಯಾಮೆರಾ ಅಳವಡಿಸಲಾಗಿದೆ. ರಾತ್ರಿ ಕಾರ್ಯಾಚರಣೆಗಳಿಗಾಗಿ ಉಷ್ಣ ಸಂವೇದಿ ಕ್ಯಾಮೆರಾ ಅಳವಡಿಸುವ ಆಯ್ಕೆಯೂ ಇದೆ. ನೆಲದಿಂದ ಸುಲಭವಾಗಿ ಉಡಾವಣೆ ಮಾಡಬಹುದಾದ ಈ ಡ್ರೋನ್ 1.5 ಕೆ.ಜಿ. ಸ್ಫೋಟಕ ಸಿಡಿತಲೆಯನ್ನು ಹೊತ್ತೊಯ್ಯಬಲ್ಲದು. ಸುಮಾರು 15 ಕಿ.ಮೀ. ವ್ಯಾಪ್ತಿಯಲ್ಲಿ ಗುರಿಗಳನ್ನು ಗುರುತಿಸಿ ದಾಳಿ ನಡೆಸುವ ಸಾಮರ್ಥ್ಯ ಹೊಂದಿದೆ.

ಲಡಾಖ್ ಮತ್ತು ಉತ್ತರ ಪ್ರದೇಶದ ಝಾನ್ಸಿ ಸಮೀಪದ ಬಬಿನಾ ಸೇರಿದಂತೆ ವಿವಿಧ ಸ್ಥಳಗಳಲ್ಲಿ ಈ ವ್ಯವಸ್ಥೆಯನ್ನು ಪರೀಕ್ಷಿಸಲಾಗಿದೆ. ಉಗ್ರರ ಉಡಾವಣಾ ನೆಲೆಗಳು, ಒಳನುಸುಳುವಿಕೆ ನಡೆಸುವವರು ಹಾಗೂ ಶತ್ರುಗಳ ತರಬೇತಿ ಶಿಬಿರಗಳನ್ನು ಗುರಿಯಾಗಿಸಿ ನಿಖರ ದಾಳಿ ನಡೆಸಲು ಈ ಸ್ವದೇಶಿ ಶಸ್ತ್ರಾಸ್ತ್ರ ವ್ಯವಸ್ಥೆ ಸೇನೆಗೆ ನೆರವಾಗಲಿದೆ. ಮುಂದಿನ ದಿನಗಳಲ್ಲಿ ಇಂತಹ ಇನ್ನಷ್ಟು ಅತ್ಯಾಧುನಿಕ ಸ್ವದೇಶಿ ಶಸ್ತ್ರಾಸ್ತ್ರಗಳನ್ನು ಸೇನೆಗೆ ಒದಗಿಸುವ ನಿರೀಕ್ಷೆಯಿದೆ.

-------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.