
ಕೋಲಾರ,20 ನವೆಂಬರ್ (ಹಿ.ಸ.)
ರೈತರು ತಾವು ಇರುವ ಸ್ಥಳದಿಂದಲೇ ಮೊಬೈಲ್ ಆ್ಯಪ್ ಮೂಲಕ ರಸಗೊಬ್ಬರ ಕಾಯ್ದಿರಿಸಿ ಖರೀದಿಸುವ ವಿನೂತನ ವ್ಯವಸ್ಥೆಯನ್ನು ಡಿಸೆಂಬರ್ 1ರಿಂದ ಕೋಲಾರ ಜಿಲ್ಲೆಯಲ್ಲಿ ಜಾರಿಗೆ ತರಲಾಗುತ್ತಿದೆ ಎಂದು ಜಂಟಿ ಕೃಷಿ ನಿರ್ದೇಶಕರು ತಿಳಿಸಿದ್ದಾರೆ.
ಕೇಂದ್ರ ಸರ್ಕಾರ ರಸಗೊಬ್ಬರ ಖರೀದಿ ಪ್ರಕ್ರಿಯೆಯನ್ನು ಸರಳಗೊಳಿಸುವ ಉದ್ದೇಶದಿಂದ 'ರಸಗೊಬ್ಬರ ಮಾರಾಟ ಅರ್ಜಿ ವ್ಯವಸ್ಥೆ'ಯನ್ನು ಜಾರಿಗೆ ತಂದಿದ್ದು, ಇದರ ಭಾಗವಾಗಿ 'ರಸಗೊಬ್ಬರ ಮಾರಾಟ ಚೌಕಟ್ಟು' ಎಂಬ ಆಂಡ್ರಾಯ್ಡ್ ಮೊಬೈಲ್ ಆ್ಯಪ್ ಬಿಡುಗಡೆ ಮಾಡಿದೆ. ಕರ್ನಾಟಕದಲ್ಲಿ ಪ್ರಾಯೋಗಿಕವಾಗಿ ತುಮಕೂರು ಮತ್ತು ಚಿತ್ರದುರ್ಗ ಜಿಲ್ಲೆಗಳಲ್ಲಿ ಈ ವ್ಯವಸ್ಥೆಯನ್ನು ಈಗಾಗಲೇ ಅನುಷ್ಠಾನಗೊಳಿಸಲಾಗಿದೆ.
ಈ ವ್ಯವಸ್ಥೆಯಿಂದ ರೈತರು ರಸಗೊಬ್ಬರ ಖರೀದಿಗಾಗಿ ತಮ್ಮ ಕೆಲಸಗಳನ್ನು ಬಿಟ್ಟು ಅಂಗಡಿಗಳ ಮುಂದೆ ಗಂಟೆಗಟ್ಟಲೆ ಸರತಿ ಸಾಲಿನಲ್ಲಿ ಕಾಯುವ ಅಗತ್ಯವಿರುವುದಿಲ್ಲ. ಮೊಬೈಲ್ ಆ್ಯಪ್ ಮೂಲಕ ಹತ್ತಿರದ ರಸಗೊಬ್ಬರ ಮಾರಾಟ ಮಳಿಗೆಯನ್ನು ಆಯ್ಕೆ ಮಾಡಿಕೊಂಡು ಬೇಕಾದ ಗೊಬ್ಬರವನ್ನು ಕಾಯ್ದಿರಿಸಬಹುದು. ಕಾಯ್ದಿರಿಸಿದ ತಕ್ಷಣ ಆ್ಯಪ್ನಲ್ಲಿ ವಿಶೇಷ ಸಂಕೇತ ಸಂಖ್ಯೆ ಸೃಷ್ಟಿಯಾಗಲಿದ್ದು, ಅದನ್ನು ಬಳಸಿ ಮೂರು ದಿನಗಳೊಳಗೆ ರಸಗೊಬ್ಬರ ಖರೀದಿಸಬಹುದು.
ಇದರಿಂದ ರೈತರಿಗೆ ಮೀಸಲಾದ ರಸಗೊಬ್ಬರವನ್ನು ಬೇರೆಯವರು ಖರೀದಿಸುವುದನ್ನು ತಡೆಯಬಹುದು. ಯೂರಿಯಾ ಸೇರಿದಂತೆ ವಿವಿಧ ರಸಗೊಬ್ಬರಗಳ ಕೈಗಾರಿಕಾ ಉದ್ದೇಶದ ದುರ್ಬಳಕೆ ಹಾಗೂ ಕಾಳಸಂತೆ ಮಾರಾಟಕ್ಕೂ ಕಡಿವಾಣ ಹಾಕಲು ಸಾಧ್ಯವಾಗಲಿದೆ.
ರೈತರು ಸಾಮಾನ್ಯ ಸೇವಾ ಕೇಂದ್ರಗಳ ಮೂಲಕವೂ ರಸಗೊಬ್ಬರ ಕಾಯ್ದಿರಿಸಬಹುದು. ರಸಗೊಬ್ಬರ ಮಾರಾಟ ಮಳಿಗೆಗಳ ಮಾಲೀಕರು ಸಹ ಸ್ವಯಂಪ್ರೇರಿತವಾಗಿ ಮೊಬೈಲ್ ಆ್ಯಪ್ ಮೂಲಕ ಗೊಬ್ಬರ ಕಾಯ್ದಿರಿಸುವ ವ್ಯವಸ್ಥೆ ಕಲ್ಪಿಸಲಾಗಿದೆ.
ಗ್ರಾಮ ಮಟ್ಟದಿಂದ ರಾಷ್ಟ್ರಮಟ್ಟದವರೆಗೆ ರಸಗೊಬ್ಬರದ ಬೇಡಿಕೆಯ ನಿಖರ ಮಾಹಿತಿ ಸರ್ಕಾರಕ್ಕೆ ಲಭ್ಯವಾಗಲು ಈ ವ್ಯವಸ್ಥೆ ಸಹಕಾರಿಯಾಗಲಿದೆ. ಬೇಡಿಕೆಗೆ ಅನುಗುಣವಾಗಿ ದಾಸ್ತಾನು ಮತ್ತು ಪೂರೈಕೆ ವ್ಯವಸ್ಥೆ ರೂಪಿಸಲು ಅನುಕೂಲವಾಗುವುದರ ಜತೆಗೆ ಆಹಾರ ಭದ್ರತೆಗೂ ನೆರವಾಗಲಿದೆ. ಪ್ರತಿಯೊಂದು ವಹಿವಾಟು ಡಿಜಿಟಲ್ ರೂಪದಲ್ಲಿ ದಾಖಲಾಗುವುದರಿಂದ ಮಾರಾಟದಲ್ಲಿ ಪಾರದರ್ಶಕತೆ ಹೆಚ್ಚಲಿದೆ. ಅರ್ಹ ರೈತರ ಮಾಹಿತಿಯೂ ಲಭ್ಯವಾಗುವುದರಿಂದ ಅನಗತ್ಯ ವಿವಾದಗಳನ್ನು ತಪ್ಪಿಸಬಹುದು.
ಆ್ಯಪ್ ಮೂಲಕ ಕಾಯ್ದಿರಿಸುವ ವಿಧಾನ
ರೈತರು ತಮ್ಮ ಆಂಡ್ರಾಯ್ಡ್ ಮೊಬೈಲ್ನಲ್ಲಿ ಆ್ಯಪ್ ಡೌನ್ಲೋಡ್ ಮಾಡಿಕೊಳ್ಳಬೇಕು. ಬಳಿಕ ಆಧಾರ್ ಸಂಖ್ಯೆ ಅಥವಾ ರೈತ ಗುರುತಿನ ಸಂಖ್ಯೆಯನ್ನು ನಮೂದಿಸಿದಾಗ ಆಧಾರ್ಗೆ ಜೋಡಣೆಯಾಗಿರುವ ಮೊಬೈಲ್ ಸಂಖ್ಯೆಗೆ ಒಂದು ಬಾರಿಯ ಗುಪ್ತಸಂಖ್ಯೆ ಬರಲಿದೆ. ಅದನ್ನು ನಮೂದಿಸಿದ ನಂತರ ರೈತರ ಹಿಡುವಳಿ ವಿಸ್ತೀರ್ಣದ ಮಾಹಿತಿ ಆ್ಯಪ್ನಲ್ಲಿ ಲಭ್ಯವಾಗುತ್ತದೆ.
'ನನ್ನ ಹೊಲ' ವಿಭಾಗವನ್ನು ಆಯ್ಕೆ ಮಾಡಿದಾಗ ಬೆಳೆಗಳ ವಿವರ ಕಾಣಿಸಿಕೊಳ್ಳುತ್ತವೆ. ಬೆಳೆ ವಿವರಗಳನ್ನು ದಾಖಲಿಸಿದ ಬಳಿಕ ರಸಗೊಬ್ಬರಕ್ಕಾಗಿ ಅರ್ಜಿ ಸಲ್ಲಿಸುವ ಆಯ್ಕೆಯನ್ನು ಒತ್ತಿದರೆ ವಿವಿಧ ಶ್ರೇಣಿಗಳ ರಸಗೊಬ್ಬರದ ಮಾಹಿತಿ ಲಭ್ಯವಾಗುತ್ತದೆ. ಅಗತ್ಯವಿರುವ ಗೊಬ್ಬರದ ಪ್ರಮಾಣ ಮತ್ತು ವಿವರಗಳನ್ನು ದಾಖಲಿಸಿ ಹತ್ತಿರದ ಚಿಲ್ಲರೆ ರಸಗೊಬ್ಬರ ಮಾರಾಟ ಮಳಿಗೆಯನ್ನು ಆಯ್ಕೆ ಮಾಡಬೇಕು.
ನಂತರ ಅರ್ಜಿಯನ್ನು ಸಲ್ಲಿಸಿದಾಗ ವಿಶೇಷ ಸಂಕೇತ ಸಂಖ್ಯೆ ಸೃಷ್ಟಿಯಾಗುತ್ತದೆ. ಈ ಸಂಕೇತವನ್ನು ಮಾರಾಟ ಮಳಿಗೆಯವರು ಪರಿಶೀಲಿಸಿ ರೈತರಿಗೆ ರಸಗೊಬ್ಬರ ವಿತರಿಸುತ್ತಾರೆ.
ರೈತರು ಖುದ್ದಾಗಿ ಅಂಗಡಿಗೆ ತೆರಳಲು ಸಾಧ್ಯವಾಗದಿದ್ದರೆ ಅವರ ಪರವಾಗಿ ಬೇರೊಬ್ಬರು ಹೋಗಿ ರಸಗೊಬ್ಬರ ಪಡೆಯಬಹುದು. ಆದರೆ, ಅಂತಹ ಸಂದರ್ಭದಲ್ಲಿ ರೈತರ ಒಂದು ಬಾರಿಯ ಗುಪ್ತಸಂಖ್ಯೆ, ಕಾಯ್ದಿರಿಸುವ ಸಂಕೇತ ಹಾಗೂ ರಸಗೊಬ್ಬರ ಪಡೆಯಲು ತೆರಳುವ ವ್ಯಕ್ತಿಯ ಆಧಾರ್ ಕಾರ್ಡ್ ಸಲ್ಲಿಸುವುದು ಕಡ್ಡಾಯವಾಗಿದೆ. ಹಣವನ್ನು ಏಕೀಕೃತ ಪಾವತಿ ವ್ಯವಸ್ಥೆಯ ಮೂಲಕ ಮಾರಾಟಗಾರರಿಗೆ ಪಾವತಿಸಿ ರಸಗೊಬ್ಬರ ಪಡೆಯಬಹುದು.
ರೈತ ಗುರುತಿನ ಚೀಟಿ ಹೊಂದಿಲ್ಲದವರೂ ರಸಗೊಬ್ಬರ ಖರೀದಿಸಬಹುದು ಎಂದು ಜಂಟಿ ಕೃಷಿ ನಿರ್ದೇಶಕರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಹಿಂದೂಸ್ತಾನ್ ಸಮಾಚಾರ್ / ಎಸ್.ಚಂದ್ರಶೇಖರ್