ಬಾಂಗ್ಲಾದೇಶದಲ್ಲಿ ವ್ಯಾಪಾರಿಗಳಿಗೆ ಸುಲಿಗೆಕೋರರ ಕಾಟ: ಹಣ ನೀಡದಿದ್ದರೆ ಗುಂಡಿನ ದಾಳಿ, ಬಾಂಬ್ ಸ್ಫೋಟಿಸಿ ಭೀತಿ
ಢಾಕಾ (ಬಾಂಗ್ಲಾದೇಶ), 17 ನವೆಂಬರ್(ಹಿ.ಸ.): ಬಾಂಗ್ಲಾದೇಶದಲ್ಲಿ ವ್ಯಾಪಾರಿಗಳು ಸುಲಿಗೆಕೋರರ ಬೆದರಿಕೆಯಿಂದ ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಸುಲಿಗೆ ಹಣ ನೀಡದ ವ್ಯಾಪಾರಿಗಳ ಮೇಲೆ ಅಪರಾಧಿಗಳು ಗುಂಡಿನ ದಾಳಿ, ಬಾಂಬ್ ಸ್ಫೋಟ, ಹಲ್ಲೆ ಹಾಗೂ ಬೆಂಕಿ ಹಚ್ಚುವ ಮೂಲಕ ಭೀತಿ ಸೃಷ್ಟಿಸುತ್ತಿದ್ದಾರೆ. ರಾಜಧಾ
ढाका में शुक्रवार रात करीब 11 बजे  नेशनल इंस्टीट्यूट ऑफ कार्डियोवैस्कुलर डिसीजेज के सामने की गई गोलीबारी में अनुराग फार्मेसी के शीशे चकनाचूर हो गए। फोटो - ढाका ट्रिब्यून


ಢಾಕಾ (ಬಾಂಗ್ಲಾದೇಶ), 17 ನವೆಂಬರ್(ಹಿ.ಸ.):

ಬಾಂಗ್ಲಾದೇಶದಲ್ಲಿ ವ್ಯಾಪಾರಿಗಳು ಸುಲಿಗೆಕೋರರ ಬೆದರಿಕೆಯಿಂದ ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಸುಲಿಗೆ ಹಣ ನೀಡದ ವ್ಯಾಪಾರಿಗಳ ಮೇಲೆ ಅಪರಾಧಿಗಳು ಗುಂಡಿನ ದಾಳಿ, ಬಾಂಬ್ ಸ್ಫೋಟ, ಹಲ್ಲೆ ಹಾಗೂ ಬೆಂಕಿ ಹಚ್ಚುವ ಮೂಲಕ ಭೀತಿ ಸೃಷ್ಟಿಸುತ್ತಿದ್ದಾರೆ. ರಾಜಧಾನಿ ಢಾಕಾದಲ್ಲಿ ಇಂತಹ ಘಟನೆಗಳು ಸರಣಿಯಾಗಿ ನಡೆಯುತ್ತಿದ್ದು, ಭಾನುವಾರವೂ ಹಲವು ವ್ಯಾಪಾರಿಕ ಸಂಸ್ಥೆಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಲಾಗಿದೆ.

ಢಾಕಾದ ಮೊಹಮ್ಮದ್‌ಪುರ ಮತ್ತು ಹಜಾರಿಬಾಗ್ ಪ್ರದೇಶಗಳಲ್ಲಿ 'ಎಜೆಆರ್ ಕೊರಿಯರ್ ಸರ್ವಿಸ್' ವಾಹನಗಳು ಹಾಗೂ ಗೋದಾಮಿನ ಮೇಲೆ ದಾಳಿ ನಡೆಸಲಾಗಿದೆ. ಅದೇ ದಿನ ಸಂಜೆ ರಾಮ್‌ಪುರ ಪ್ರದೇಶದಲ್ಲಿರುವ ಅಂತರ್ಜಾಲ ಸೇವಾ ಸಂಸ್ಥೆಯ ಕಚೇರಿಗೆ ನುಗ್ಗಿದ ದುಷ್ಕರ್ಮಿಗಳು ಇಬ್ಬರ ಮೇಲೆ ಗುಂಡು ಹಾರಿಸಿದ್ದಾರೆ. ನಿರಂತರ ದಾಳಿಗಳಿಂದ ವ್ಯಾಪಾರಿಗಳು ಜೀವಭಯದಲ್ಲಿ ದಿನ ಕಳೆಯುವಂತಾಗಿದೆ.

ಢಾಕಾ ಟ್ರಿಬ್ಯೂನ್ ವರದಿಯ ಪ್ರಕಾರ, ಶುಕ್ರವಾರ ರಾತ್ರಿ ಸುಮಾರು 11 ಗಂಟೆಗೆ ರಾಷ್ಟ್ರೀಯ ಹೃದಯರಕ್ತನಾಳ ರೋಗಗಳ ಸಂಸ್ಥೆಯ ಎದುರು, ಶ್ಯಾಮೋಲಿಗೆ ತೆರಳುವ ಮುಖ್ಯ ರಸ್ತೆಯಲ್ಲಿರುವ ಅನುರಾಗ್ ಔಷಧ ಮಳಿಗೆಯಲ್ಲಿ ಗುಂಡಿನ ದಾಳಿ ನಡೆದಿದೆ. ಉದ್ಯೋಗಿ ಮೊಯಿನುದ್ದೀನ್ ಗ್ರಾಹಕರಿಗೆ ಸೇವೆ ಸಲ್ಲಿಸುತ್ತಿದ್ದ ಸಂದರ್ಭದಲ್ಲಿ ಏಕಾಏಕಿ ಗುಂಡಿನ ಸದ್ದು ಕೇಳಿಸಿದೆ. ಕೆಲವೇ ಕ್ಷಣಗಳಲ್ಲಿ ಮತ್ತೊಂದು ಸುತ್ತಿನ ಗುಂಡಿನ ದಾಳಿ ನಡೆದಿದ್ದು, ಗುಂಡುಗಳು ಔಷಧ ಮಳಿಗೆಯ ಗಾಜುಗಳನ್ನು ಒಡೆದು ಮೊಯಿನುದ್ದೀನ್ ಅವರ ತಲೆಯ ಮೇಲಿನಿಂದ ಹಾದುಹೋಗಿವೆ. ಅವರು ಕೂದಲೆಳೆ ಅಂತರದಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಮಳಿಗೆಯ ಮಾಲೀಕರ ಬಳಿ 50 ಲಕ್ಷ ಟಾಕಾ ಸುಲಿಗೆ ಹಣಕ್ಕೆ ಬೇಡಿಕೆ ಇಡಲಾಗಿತ್ತು. ಹಣ ನೀಡದ ಹಿನ್ನೆಲೆಯಲ್ಲಿ ಬಾದಲ್ ಮತ್ತು ಪಪ್ಪು ಎಂಬ ಇಬ್ಬರು ಅಪರಾಧಿಗಳು ಮೊದಲು ಎರಡು ಸ್ಥಳೀಯ ಬಾಂಬ್‌ಗಳನ್ನು ಎಸೆದು, ಬಳಿಕ ಗುಂಡಿನ ದಾಳಿ ನಡೆಸಿದ್ದಾರೆ ಎಂದು ಆರೋಪಿಸಲಾಗಿದೆ.

ಅನುರಾಗ್ ಔಷಧ ಮಳಿಗೆಯ ಮಾಲೀಕ ಸೈಯದ್ ಹಸನ್ ನೂರ್ ಇಸ್ಲಾಂ ಅವರಿಗೆ ಸೇರಿದ ಮತ್ತೊಂದು ಊಟದ ಮಳಿಗೆ ಮತ್ತು ದೊಡ್ಡ ಚಿಲ್ಲರೆ ಅಂಗಡಿಯನ್ನೂ ಗುರಿಯಾಗಿಸಿಕೊಂಡು ದಾಳಿ ನಡೆಸಲಾಗಿದೆ. ಅವರು ಮಾಜಿ ನಗರಸಭಾ ಸದಸ್ಯ ಹಾಗೂ ಅವಾಮಿ ಲೀಗ್ ನಾಯಕರೆಂದು ಗುರುತಿಸಿಕೊಂಡಿದ್ದಾರೆ. 2024ರ ಆಗಸ್ಟ್ 5ರಂದು ನಡೆದ ರಾಜಕೀಯ ಬದಲಾವಣೆಯ ಬಳಿಕ ಅವರು ದೇಶದಿಂದ ಹೊರಗಿದ್ದಾರೆ ಎನ್ನಲಾಗಿದೆ.

ಮೊಹಮ್ಮದ್‌ಪುರ ಪ್ರದೇಶದ ಬಾದಲ್ ಮತ್ತು ಪಪ್ಪು ಎಂಬ ಇಬ್ಬರು ಇತ್ತೀಚೆಗೆ ಅವರ ಬಳಿ 50 ಲಕ್ಷ ಟಾಕಾ ಸುಲಿಗೆಗೆ ಬೇಡಿಕೆ ಇಟ್ಟಿದ್ದರು. ಹಣ ನೀಡದ ಕಾರಣ ಬಾಂಬ್ ಎಸೆದು, ಗುಂಡು ಹಾರಿಸಿ ಭೀತಿ ಸೃಷ್ಟಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಔಷಧ ಮಳಿಗೆಯ ಮೇಲಿನ ಗುಂಡಿನ ದಾಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರನ್ನು ಬಂಧಿಸಲಾಗಿದ್ದು, ಇತರ ಆರೋಪಿಗಳ ಬಂಧನಕ್ಕೆ ಪೊಲೀಸರು ಕ್ರಮ ಕೈಗೊಂಡಿದ್ದಾರೆ.

ಇದೇ ವೇಳೆ ರಾಮ್‌ಪುರ ಮತ್ತು ಹಾತಿರ್‌ಝೀಲ್ ಪ್ರದೇಶಗಳಲ್ಲಿ ಸುಲಿಗೆ ದಂಧೆ ನಡೆಸುತ್ತಿರುವ ಗುಜಾ ಬಾದಶಾ ಎಂಬ ಅಪರಾಧಿಯ ಹೆಸರು ಮುನ್ನೆಲೆಗೆ ಬಂದಿದೆ. ಈತ ಈ ಹಿಂದೆ ಗುಂಡಿನ ದಾಳಿಯಲ್ಲಿ ಹತನಾಗಿದ್ದ ಕೈಲ್ಲಾ ಪಲಾಶ್ ಎಂಬ ಅಪರಾಧಿಯ ನಿಕಟ ಸಹಚರ ಎಂದು ಹೇಳಲಾಗಿದೆ. ಈ ವರ್ಷದ ಜೂನ್‌ನಲ್ಲಿ ಕೈಲ್ಲಾ ಪಲಾಶ್ ಹತ್ಯೆಯಾದ ಬಳಿಕ ಪ್ರದೇಶದಲ್ಲಿ ಗುಜಾ ಬಾದಶಾ ಪ್ರಭಾವ ಹೆಚ್ಚಾಗಿದೆ ಎನ್ನಲಾಗಿದೆ.

ಏಪ್ರಿಲ್‌ನಲ್ಲಿ ಮಾಜಿ ಪೊಲೀಸ್ ಹೆಚ್ಚುವರಿ ಅಧೀಕ್ಷಕ ಫಜ್ಲುಲ್ ಹಕ್ ಹತ್ಯೆ ಪ್ರಕರಣದಲ್ಲಿ ಗುಜಾ ಬಾದಶಾನನ್ನು ಬಂಧಿಸಲಾಗಿತ್ತು. ಬಳಿಕ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದಾನೆ. ಆತನ ಸಹಚರರು ರಾಮ್‌ಪುರ ಮತ್ತು ಹಾತಿರ್‌ಝೀಲ್ ಪ್ರದೇಶಗಳಲ್ಲಿ ದೂರದರ್ಶನ ಸಂಪರ್ಕ, ಅಂತರ್ಜಾಲ ಸೇವೆ, ವಸತಿ ಯೋಜನೆಗಳು, ಉಡುಪು ಕಾರ್ಖಾನೆಗಳು ಹಾಗೂ ಹೋಟೆಲ್‌ಗಳಿಂದ ಸುಲಿಗೆ ವಸೂಲಿ ಮಾಡುತ್ತಿದ್ದಾರೆ ಎಂಬ ಆರೋಪಗಳಿವೆ.

ಭಾನುವಾರ ಸಂಜೆ ನಾಲ್ಕೈದು ಮಂದಿ ಯುವಕರು ರಾಮ್‌ಪುರದ ವಾಪ್ಡಾ ರಸ್ತೆಯಲ್ಲಿರುವ ಸ್ಪೀಡ್ ಟಚ್ ನೆಟ್‌ವರ್ಕ್ ಆ್ಯಂಡ್ ಟೆಕ್ನಾಲಜಿ ಕಚೇರಿಗೆ ನುಗ್ಗಿ ಗುಂಡಿನ ದಾಳಿ ನಡೆಸಿದ್ದಾರೆ. ಘಟನೆಯಲ್ಲಿ ಇಬ್ಬರು ಗಾಯಗೊಂಡಿದ್ದಾರೆ. ದಾಳಿಕೋರರಲ್ಲಿ ಇಬ್ಬರು ಮುಖಕ್ಕೆ ಮುಖಗವಸು ಧರಿಸಿ, ತಲೆಗೆ ಟೋಪಿ ಹಾಕಿಕೊಂಡಿದ್ದರು ಎಂದು ತಿಳಿದುಬಂದಿದೆ. ಸಂಸ್ಥೆಯ ಜಾಲ ಕಾರ್ಯಾಚರಣೆ ವಿಭಾಗದ ಮುಖ್ಯಸ್ಥ ಬಂದನ್ ಕುಮಾರ್ ಸಾಹಾ ಗಾಯಗೊಂಡಿದ್ದಾರೆ.

ಈ ಕುರಿತು ಮಾತನಾಡಿದ ಅವರು, 15ರಿಂದ 20 ದಿನಗಳ ಹಿಂದೆ ಗುಜಾ ಬಾದಶಾ ಮತ್ತು ಜಾನಿ ಎಂದು ಪರಿಚಯಿಸಿಕೊಂಡ ಕೆಲವರು ದೂರವಾಣಿ ಮೂಲಕ 10 ಲಕ್ಷ ಟಾಕಾ ಸುಲಿಗೆಗೆ ಬೇಡಿಕೆ ಇಟ್ಟಿದ್ದರು. ಹಣ ನೀಡದಿದ್ದರೆ ಈ ಪ್ರದೇಶದಲ್ಲಿ ವ್ಯಾಪಾರ ನಡೆಸಲು ಬಿಡುವುದಿಲ್ಲ ಎಂದು ಬೆದರಿಕೆ ಹಾಕಿದ್ದರು. ಇದರ ಬೆನ್ನಲ್ಲೇ ಗುಂಡಿನ ದಾಳಿ ನಡೆದಿದೆ. ನಾವು ತೀವ್ರ ಭಯದಲ್ಲಿದ್ದೇವೆ ಎಂದು ತಿಳಿಸಿದ್ದಾರೆ.

ಈ ನಡುವೆ ಢಾಕಾ ರಾಜಧಾನಿಯಲ್ಲಿ ಸುಲಿಗೆಕೋರರು ಮತ್ತು ಅಪರಾಧಿಗಳ ವಿರುದ್ಧ ಪೊಲೀಸರು ಹಾಗೂ ಇತರ ಕಾನೂನು ಜಾರಿ ಸಂಸ್ಥೆಗಳು ಕಾರ್ಯಾಚರಣೆ ತೀವ್ರಗೊಳಿಸಿವೆ. 545 ಸುಲಿಗೆಕೋರರು ಮತ್ತು ಅಪರಾಧಿಗಳ ಪಟ್ಟಿಯನ್ನು ಸಿದ್ಧಪಡಿಸಿ ಬಂಧನ ಕಾರ್ಯಾಚರಣೆ ನಡೆಸಲಾಗುತ್ತಿದೆ. ಆದರೂ ಬಂಧನಗಳ ನಡುವೆಯೂ ಶಸ್ತ್ರಸಜ್ಜಿತ ಅಪರಾಧಿಗಳ ಪ್ರಭಾವ ಕಡಿಮೆಯಾಗದಿರುವುದು ವ್ಯಾಪಾರ ವಲಯದಲ್ಲಿ ಆತಂಕ ಮೂಡಿಸಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.


 rajesh pande