ಬೆಂಗಳೂರು, 29 ಅಕ್ಟೋಬರ್ (ಹಿ.ಸ.):

ಪತ್ನಿಯ ನಡತೆಯ ಕುರಿತು ಆಧಾರರಹಿತ ಆರೋಪಗಳನ್ನು ಮಾಡುವುದು ಮತ್ತು ಜನ್ಮ ನೀಡಿದ ಮಗುವಿನ ಪಿತೃತ್ವವನ್ನು ಅನುಮಾನಿಸಿ ಡಿಎನ್ಎ ಪರೀಕ್ಷೆಗೆ ಒಳಪಡಲು ನಿರಾಕರಿಸುವುದು ಪತ್ನಿಗೆ ನೀಡುವ ಅತ್ಯಂತ ಭೀಕರ ಮಾನಸಿಕ ಕ್ರೌರ್ಯಕ್ಕೆ ಸಮನಾಗುತ್ತದೆ ಎಂದು ಕರ್ನಾಟಕ ಹೈಕೋರ್ಟ್ ಮಹತ್ವದ ತೀರ್ಪು ನೀಡಿದೆ.

ಯಾವುದೇ ಗಟ್ಟಿ ಹಾಗೂ ಬಲವಾದ ಸಾಕ್ಷ್ಯಾಧಾರಗಳಿಲ್ಲದೆ ಪತ್ನಿಗೆ ವಿಚ್ಛೇದನ ಮಂಜೂರು ಮಾಡಿದ್ದ ಕೌಟುಂಬಿಕ ನ್ಯಾಯಾಲಯದ ಆದೇಶವನ್ನು ಹೈಕೋರ್ಟ್ ವಿಭಾಗೀಯ ಪೀಠ ಸಂಪೂರ್ಣವಾಗಿ ರದ್ದುಪಡಿಸಿ ಆದೇಶಿಸಿದೆ.

ಪಿತೃತ್ವ ನಿರಾಕರಿಸಿ ಡಿಎನ್ಎ ಪರೀಕ್ಷೆಗೆ ಹಿಂದೇಟು ಹಾಕಿರುವುದು ಗಂಭೀರ ಕ್ರೌರ್ಯ

ಕೌಟುಂಬಿಕ ನ್ಯಾಯಾಲಯದಲ್ಲಿ ವಿಚಾರಣೆ ನಡೆದ ಸಂದರ್ಭದಲ್ಲಿ ಪತಿ, ತಮಗೆ ಜನಿಸಿದ ಮಗುವಿನ ಪಿತೃತ್ವವನ್ನು ಪ್ರಶ್ನಿಸಿ ಹೆಂಡತಿಯ ಚಾರಿತ್ರ್ಯ ವಧೆ ಮಾಡುವ ಪ್ರಯತ್ನ ಮಾಡಿದ್ದರು.

ಆದರೆ, ಮಗುವಿನ ಸತ್ಯಾಸತ್ಯತೆಯನ್ನು ವೈಜ್ಞಾನಿಕವಾಗಿ ಸಾಬೀತುಪಡಿಸಲು ನ್ಯಾಯಾಲಯವು ಸೂಚಿಸಿದ ಡಿಎನ್ಎ ಪರೀಕ್ಷೆಗೆ ಒಳಪಡಲು ಪತಿ ಸ್ಪಷ್ಟವಾಗಿ ನಿರಾಕರಿಸಿದ್ದರು.

ಭಾರತೀಯ ಸಾಕ್ಷ್ಯ ಕಾಯ್ದೆಯ ಸೆಕ್ಷನ್ 112ರ ಪ್ರಕಾರ, ವಿವಾಹದ ಅವಧಿಯಲ್ಲಿ ಜನಿಸುವ ಯಾವುದೇ ಮಗು ಕಾನೂನುಬದ್ಧವಾಗಿ ಗಂಡನದ್ದೇ ಆಗಿರುತ್ತದೆ.

ಇಂತಹ ಪರಿಸ್ಥಿತಿಯಲ್ಲಿ ಯಾವುದೇ ಸ್ಪಷ್ಟ ಸಾಕ್ಷ್ಯಗಳಿಲ್ಲದೆ ಸಾರ್ವಜನಿಕವಾಗಿ ಪತ್ನಿಯ ನಡತೆಯನ್ನು ಶಂಕಿಸುವುದು ಹಾಗೂ ನಿಂದಿಸುವುದು ಆಕೆಗೆ ಎಸಗುವ ಅತಿ ದೊಡ್ಡ ಮಾನಸಿಕ ಹಿಂಸೆಯಾಗಿದೆ ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.

ಪತಿಯು ಪತ್ನಿಯ ವಿರುದ್ಧ ಹಲವು ಸಾಮಾನ್ಯ ಆರೋಪಗಳನ್ನು ಮಾಡಿದ್ದರ ಹೊರತಾಗಿ, ನ್ಯಾಯಾಲಯದಲ್ಲಿ ಅವುಗಳನ್ನು ಸಾಬೀತುಪಡಿಸಲು ವಿಫಲರಾಗಿದ್ದಾರೆ. ಪತ್ನಿ ಗರ್ಭಿಣಿಯಾಗಿದ್ದಾಗ ವಿವಾದ ಉಂಟಾಗಿ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದ ಸಂದರ್ಭದಲ್ಲಿ, ಹೆರಿಗೆಯವರೆಗೂ ಪತ್ನಿ ತವರು ಮನೆಯಲ್ಲಿಯೇ ಇರಲು ಪತಿ ಸಮ್ಮತಿಸಿ ಲಿಖಿತ ಭರವಸೆ ನೀಡಿದ್ದರು.

ಆದರೆ, ಕೌಟುಂಬಿಕ ನ್ಯಾಯಾಲಯವು ಇವುಗಳನ್ನು ಸರಿಯಾಗಿ ಪರಿಗಣಿಸದೆ ಪತ್ನಿಯಿಂದಲೇ ಕ್ರೌರ್ಯ ನಡೆದಿದೆ ಎಂದು ತಪ್ಪಾಗಿ ಭಾವಿಸಿ ವಿಚ್ಛೇದನ ಮಂಜೂರು ಮಾಡುವ ಮೂಲಕ ಆತುರದ ಹಾಗೂ ದೋಷಪೂರಿತ ನಿರ್ಧಾರ ಕೈಗೊಂಡಿದೆ ಎಂದು ಹೈಕೋರ್ಟ್ ತರಾಟೆಗೆ ತೆಗೆದುಕೊಂಡಿದೆ.

ಭಾರತೀಯ ವಿಚ್ಛೇದನ ಕಾಯ್ದೆಯ ಸೆಕ್ಷನ್ 10(1)(9)ರ ಪ್ರಕಾರ, ವಿಚ್ಛೇದನ ಕೋರಿ ಅರ್ಜಿ ಸಲ್ಲಿಸುವ ಮುನ್ನ ದಂಪತಿ ಕನಿಷ್ಠ 2 ವರ್ಷಗಳ ಕಾಲ ಪ್ರತ್ಯೇಕವಾಗಿ ವಾಸಿಸಿರಬೇಕು ಎಂಬ ಕಡ್ಡಾಯ ನಿಯಮವಿದೆ. ಆದರೆ, ಸ್ವತಃ ಪತಿಯೇ ಒಪ್ಪಿಕೊಂಡಿರುವ ದಿನಾಂಕಗಳ ಪ್ರಕಾರವೇ (ಮಾರ್ಚ್ 2011ರಿಂದ ಸೆಪ್ಟಂಬರ್ 2012) ಈ ಕಡ್ಡಾಯ ಎರಡು ವರ್ಷಗಳ ಅವಧಿ ಪೂರ್ಣಗೊಂಡಿರಲಿಲ್ಲ.

ಈ ಮೂಲಭೂತ ಕಾನೂನು ಅಂಶವನ್ನೇ ಗಮನಿಸದೆ ಕೌಟುಂಬಿಕ ನ್ಯಾಯಾಲಯವು ವಿಚ್ಛೇದನ ನೀಡಿರುವುದು ಕಾನೂನುಬಾಹಿರ ಎಂದು ಹೈಕೋರ್ಟ್ ತನ್ನ ತೀರ್ಪಿನಲ್ಲಿ ಸ್ಪಷ್ಟಪಡಿಸಿದೆ.

ಪ್ರಕರಣದ ಹಿನ್ನೆಲೆ

ಕ್ರಿಶ್ಚಿಯನ್ ಸಮುದಾಯಕ್ಕೆ ಸೇರಿರುವ ದಂಪತಿ 2008ರಲ್ಲಿ ಧಾರ್ಮಿಕ ಸಂಪ್ರದಾಯದಂತೆ ವಿವಾಹವಾಗಿದ್ದರು. ಮದುವೆಯಾಗಿ ಕೆಲಕಾಲ ಒಟ್ಟಿಗೆ ಇದ್ದ ಬಳಿಕ ದಂಪತಿಯಲ್ಲಿ ಮನಸ್ತಾಪ ಉಂಟಾಗಿ ಪತ್ನಿ ತವರು ಮನೆಗೆ ತೆರಳಿದ್ದರು.

ದಂಪತಿಗೆ 2011ರಲ್ಲಿ ಗಂಡು ಮಗು ಜನಿಸಿತ್ತು. ಪತಿ ವಿಚ್ಛೇದನ ಕೋರಿ ಅರ್ಜಿ ಸಲ್ಲಿಸಿದರೆ, ಪತ್ನಿ ತಮ್ಮ ಮೇಲಿನ ಎಲ್ಲಾ ಆರೋಪಗಳನ್ನು ತಳ್ಳಿಹಾಕಿದ್ದರು. ಪತಿಯ ಕಿರುಕುಳ, ಹಲ್ಲೆ ಹಾಗೂ ಮನೆಗೆ ಬೀಗ ಹಾಕಿ ಹೊರಹಾಕಿದ ಹಿನ್ನೆಲೆಯಲ್ಲಿ ಅನಿವಾರ್ಯವಾಗಿ ತವರು ಮನೆ ಸೇರಬೇಕಾಯಿತು ಎಂದು ಆಕ್ಷೇಪಣೆ ಸಲ್ಲಿಸಿದ್ದರು.

ಅಂತಿಮವಾಗಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ.ಐ. ಅರುಣ್ ಹಾಗೂ ನ್ಯಾಯಮೂರ್ತಿ ರಾಘವೇಂದ್ರ ಸೀತಾರಾಮ್ ಶ್ರೀವತ್ಸ ಅವರಿದ್ದ ವಿಭಾಗೀಯ ಪೀಠವು ಪತ್ನಿಯ ಮೇಲ್ಮನವಿಯನ್ನು ಪುರಸ್ಕರಿಸಿ ಕೌಟುಂಬಿಕ ನ್ಯಾಯಾಲಯದ ಆದೇಶವನ್ನು ರದ್ದುಗೊಳಿಸಿದೆ.

---------------

ಹಿಂದೂಸ್ತಾನ್ ಸಮಾಚಾರ್ / BHARGAVI G R