ನವದೆಹಲಿ, 26 ಅಕ್ಟೋಬರ್ (ಹಿ.ಸ.):

ಪ್ರಧಾನಿ ನರೇಂದ್ರ ಮೋದಿ ಅವರು ಮಹರ್ಷಿ ವಾಲ್ಮೀಕಿ ಜಯಂತಿಯ ಅಂಗವಾಗಿ ಭಾನುವಾರ ದೇಶದ ಜನತೆಗೆ ಶುಭಾಶಯ ಕೋರಿದ್ದಾರೆ. ಈ ಸಂದರ್ಭದಲ್ಲಿ ತಮ್ಮ ಸುಭಾಷಿತ ಸಂದೇಶದಲ್ಲಿ ಸೀತಾಮಾತೆಗೆ ಮಹರ್ಷಿ ವಾಲ್ಮೀಕಿ ಆಶ್ರಯ ನೀಡಿದ ಪ್ರಸಂಗವನ್ನೂ ಹಂಚಿಕೊಂಡಿದ್ದಾರೆ.

ಪ್ರಧಾನಿ ಮೋದಿ ಅವರು ಸಾಮಾಜಿಕ ಜಾಲತಾಣದಲ್ಲಿ ಸಂದೇಶ ಪ್ರಕಟಿಸಿ, ಮಹರ್ಷಿ ವಾಲ್ಮೀಕಿ ಜಯಂತಿಯಂದು ಎಲ್ಲರಿಗೂ ಹೃತ್ಪೂರ್ವಕ ಶುಭಾಶಯಗಳನ್ನು ತಿಳಿಸಿದ್ದಾರೆ. ಮಹರ್ಷಿ ವಾಲ್ಮೀಕಿ ಅವರ ಸದ್ವಿಚಾರಗಳು ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆಯ ಮೂಲತತ್ವಗಳಾಗಿದ್ದು, ಪ್ರತಿಯೊಂದು ಯುಗದಲ್ಲೂ ರಾಷ್ಟ್ರದ ಬೆಳವಣಿಗೆಗೆ ಪ್ರೇರಣೆ ನೀಡಲಿವೆ. ಮಾನವಕುಲಕ್ಕೆ ಅವರು ನೀಡಿದ ಅಮೂಲ್ಯ ಸಂದೇಶಗಳು ದೇಶದ ಜನರಿಗೆ ಸದಾ ಮಾರ್ಗದರ್ಶಕವಾಗಿರಲಿವೆ ಎಂದು ಹೇಳಿದ್ದಾರೆ.

ಈ ಸಂದರ್ಭದಲ್ಲಿ ಪ್ರಧಾನಿ ಅವರು ಮಹಾಕವಿ ಕಾಳಿದಾಸ ವಿರಚಿತ ರಘುವಂಶ ಮಹಾಕಾವ್ಯದ 14ನೇ ಸರ್ಗದ 70ನೇ ಶ್ಲೋಕವನ್ನು ಹಂಚಿಕೊಂಡಿದ್ದಾರೆ. ಈ ಶ್ಲೋಕವು ಸೀತಾಮಾತೆ ವನವಾಸದಲ್ಲಿದ್ದಾಗ ಮಹರ್ಷಿ ವಾಲ್ಮೀಕಿ ಅವರನ್ನು ಭೇಟಿಯಾಗಿ ಆಶ್ರಯ ನೀಡಿದ ಪ್ರಸಂಗವನ್ನು ವಿವರಿಸುತ್ತದೆ.

ಸೀತಾಮಾತೆಯನ್ನು ಲಕ್ಷ್ಮಣರು ಅರಣ್ಯದಲ್ಲಿ ಬಿಟ್ಟು ತೆರಳಿದ ಬಳಿಕ, ಅವರ ಅಳುವಿನ ಧ್ವನಿಯನ್ನು ಕೇಳಿ ಮಹರ್ಷಿ ವಾಲ್ಮೀಕಿ ಅಲ್ಲಿಗೆ ಆಗಮಿಸುತ್ತಾರೆ ಎಂಬುದು ಈ ಶ್ಲೋಕದ ಸಾರವಾಗಿದೆ. ಮಹರ್ಷಿ ವಾಲ್ಮೀಕಿ ಅವರು ಸೀತಾಮಾತೆಗೆ ತಮ್ಮ ಆಶ್ರಮದಲ್ಲಿ ಆಶ್ರಯ ನೀಡುವುದರ ಜೊತೆಗೆ ಲವ ಮತ್ತು ಕುಶರಿಗೆ ರಾಮಕಥೆಯನ್ನು ಹಾಡುವುದನ್ನೂ ಕಲಿಸುತ್ತಾರೆ ಎಂಬುದು ರಾಮಾಯಣದ ಪ್ರಸಂಗದಲ್ಲಿ ಉಲ್ಲೇಖವಾಗಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.