ವಾಷಿಂಗ್ಟನ್ (ಅಮೆರಿಕ)/ಟೆಹ್ರಾನ್ (ಇರಾನ್), 21 ಅಕ್ಟೋಬರ್(ಹಿ.ಸ.):

ಅಮೆರಿಕ ಮತ್ತು ಇರಾನ್ ತಮ್ಮ ನಿಲುವುಗಳಿಗೆ ಬದ್ಧವಾಗಿರುವುದರಿಂದ ಉಭಯ ದೇಶಗಳ ನಡುವಿನ ಶಾಂತಿ ಒಪ್ಪಂದದ ಸಾಧ್ಯತೆ ಕ್ಷೀಣಿಸಿದೆ. ಹೋರ್ಮುಜ್ ಜಲಸಂಧಿಯಲ್ಲಿ ವಾಣಿಜ್ಯ ಹಡಗುಗಳ ಮೇಲೆ ದಾಳಿ ನಿಲ್ಲಿಸುವವರೆಗೆ ಇರಾನ್‌ ಮೇಲೆ ಆರ್ಥಿಕ ಒತ್ತಡ ಮುಂದುವರಿಸುವುದಾಗಿ ಅಮೆರಿಕದ ವಿದೇಶಾಂಗ ಸಚಿವ ಮಾರ್ಕೊ ರೂಬಿಯೊ ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಇರಾನ್‌ನ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ, ವಾಷಿಂಗ್ಟನ್‌ ಇರಾನ್‌ನ ಷರತ್ತುಗಳನ್ನು ಒಪ್ಪಿಕೊಳ್ಳುವವರೆಗೆ ಹೋರ್ಮುಜ್ ಜಲಸಂಧಿಯನ್ನು ಮುಚ್ಚಿಯೇ ಇಡಲಾಗುವುದು ಎಂದು ಸ್ಪಷ್ಟಪಡಿಸಿದ್ದಾರೆ.

ಅಲ್‌ ಜಝೀರಾ ಮತ್ತು ಸಿಬಿಎಸ್‌ ನ್ಯೂಸ್‌ ವರದಿಗಳ ಪ್ರಕಾರ, ರೂಬಿಯೊ ಮತ್ತು ಅರಾಘ್ಚಿ ತಮ್ಮ ತಮ್ಮ ದೇಶಗಳ ಮಾಧ್ಯಮಗಳೊಂದಿಗೆ ಮಾತನಾಡುವಾಗ ಈ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ. ಇದೇ ವೇಳೆ, ಇರಾನ್‌ ವಿರುದ್ಧ ಮತ್ತಷ್ಟು ಸೇನಾ ಕ್ರಮ ಕೈಗೊಳ್ಳಲು ಅಮೆರಿಕ ಸಿದ್ಧವಿದೆ ಎಂದು ಅಮೆರಿಕದ ರಕ್ಷಣಾ ಸಚಿವ ಪೀಟ್‌ ಹೆಗ್ಸೆತ್‌ ಹೇಳಿದ್ದಾರೆ.

“ಇರಾನ್‌ ಎಂದಿಗೂ ಪರಮಾಣು ಅಸ್ತ್ರಗಳನ್ನು ಹೊಂದದಂತೆ ನೋಡಿಕೊಳ್ಳುವುದು ನಮ್ಮ ಉದ್ದೇಶ” ಎಂದು ಅವರು ತಿಳಿಸಿದ್ದಾರೆ.

ವರ್ಧಿತ ಯುರೇನಿಯಂ ಹಸ್ತಾಂತರಕ್ಕೆ ನಿರಾಕರಣೆ

ತನ್ನಲ್ಲಿರುವ ವರ್ಧಿತ ಯುರೇನಿಯಂ ದೇಶದೊಳಗೇ ಉಳಿಯಲಿದೆ ಎಂದು ಇರಾನ್‌ ಹೇಳಿದೆ. ಸುಮಾರು 400 ಕಿಲೋಗ್ರಾಂಗಳಷ್ಟು ಪರಮಾಣು ವಸ್ತುವನ್ನು ರಷ್ಯಾದ ವಶಕ್ಕೆ ಒಪ್ಪಿಸುವ ಪ್ರಸ್ತಾವವನ್ನು ಇರಾನ್‌ ತಿರಸ್ಕರಿಸಿದೆ.

ಇರಾನ್‌ ಮತ್ತು ಅಮೆರಿಕದ ನಡುವಿನ ಮಾತುಕತೆಗಳಿಗೆ ಮಧ್ಯಸ್ಥಿಕೆ ವಹಿಸುವ ಪ್ರಯತ್ನವನ್ನು ಮುಂದುವರಿಸಲು ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಆಸಿಮ್‌ ಮುನೀರ್‌ ತೆಹ್ರಾನ್‌ಗೆ ಭೇಟಿ ನೀಡಿರುವ ಸಂದರ್ಭದಲ್ಲಿ ಇರಾನ್‌ ಈ ನಿಲುವು ಪ್ರಕಟಿಸಿದೆ.

ಅಮೆರಿಕದ ಮೇಲೆ ವಿಶ್ವಾಸ ಮರುಸ್ಥಾಪನೆಗೆ ಒತ್ತಾಯ

ಮಾತುಕತೆ ಪುನರಾರಂಭವಾಗುವ ಮೊದಲು ಅಮೆರಿಕವು ವಿಶ್ವಾಸವನ್ನು ಮರುಸ್ಥಾಪಿಸಬೇಕು ಎಂದು ಇರಾನ್‌ ಅಧಿಕಾರಿಗಳು ಒತ್ತಾಯಿಸಿದ್ದಾರೆ. ಈ ಸಂದರ್ಭದಲ್ಲಿ ರಾಜತಾಂತ್ರಿಕ ಮಾತುಕತೆಗಳ ವೇಳೆ ಅಮೆರಿಕ ನಡೆಸಿದ ಹಿಂದಿನ ದಾಳಿಗಳು ಹಾಗೂ ತೆಹ್ರಾನ್‌ ಮುಂದಿಟ್ಟಿರುವ ಏಳು ಅಂಶಗಳ ಪ್ರಸ್ತಾವವನ್ನು ಅವರು ಉಲ್ಲೇಖಿಸಿದ್ದಾರೆ.

ಇದೇ ವೇಳೆ, ನವೆಂಬರ್‌ 3ರಂದು ನಡೆಯಲಿರುವ ಮಧ್ಯಂತರ ಚುನಾವಣೆಗೂ ಮುನ್ನ ಇರಾನ್‌ ಮೇಲೆ ದಾಳಿ ನಡೆಸುವ ಯಾವುದೇ ಯೋಜನೆ ಅಮೆರಿಕಕ್ಕಿಲ್ಲ ಎಂದು ಶ್ವೇತಭವನ ಸ್ಪಷ್ಟಪಡಿಸಿದೆ.

ರಷ್ಯಾದೊಂದಿಗಿನ ಇರಾನ್‌ನ ಸಂಬಂಧಗಳು ಹಿಂದೆಂದಿಗಿಂತಲೂ ಹೆಚ್ಚು ನಿಕಟವಾಗಿವೆ ಎಂದು ಅರಾಘ್ಚಿ ಹೇಳಿದ್ದಾರೆ. ಆದರೆ, ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಸಂದರ್ಭದಲ್ಲಿ ರಷ್ಯಾ ಇರಾನ್‌ಗೆ ಅತ್ಯಲ್ಪ ನೆರವು ನೀಡುತ್ತಿದೆ ಎಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಈ ಹಿಂದೆ ಹೇಳಿದ್ದರು.

ಮಧ್ಯಸ್ಥಿಕೆ ಪ್ರಯತ್ನ ಮುಂದುವರಿಕೆ

ಹೋರ್ಮುಜ್ ಜಲಸಂಧಿ ತೆರೆಯುವ ವಿಚಾರ, ಪರಮಾಣು ವಸ್ತುಗಳ ನಿರ್ವಹಣೆ ಮತ್ತು ಅಮೆರಿಕದ ಮೇಲಿನ ವಿಶ್ವಾಸ ಮರುಸ್ಥಾಪನೆ ಸೇರಿದಂತೆ ಪ್ರಮುಖ ವಿಷಯಗಳಲ್ಲಿ ಉಭಯ ದೇಶಗಳ ನಡುವೆ ಭಿನ್ನಾಭಿಪ್ರಾಯ ಮುಂದುವರಿದಿದೆ. ಪಾಕಿಸ್ತಾನ ಮತ್ತು ಕತಾರ್‌ ಮೂಲಕ ಪರೋಕ್ಷ ಮಾತುಕತೆಗಳು ನಡೆಯುತ್ತಿವೆ ಎಂದು ಅರಾಘ್ಚಿ ತಿಳಿಸಿದ್ದಾರೆ. ಆದಾಗ್ಯೂ, ಎರಡೂ ದೇಶಗಳು ತಮ್ಮ ಷರತ್ತುಗಳಿಗೆ ಬದ್ಧವಾಗಿರುವುದರಿಂದ ಶಾಂತಿ ಒಪ್ಪಂದದ ಹಾದಿ ಕಠಿಣವಾಗಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.