ನಾಗ್ಪುರ, 19 ಅಕ್ಟೋಬರ್ (ಹಿ.ಸ.):

ರಾಷ್ಟ್ರೀಯ ಸ್ವಯಂಸೇವಕ ಸಂಘದ ವಿಜಯದಶಮಿ ಸಮಾರಂಭವು ನಾಗಪುರದ ರೇಶಿಮ್‌ಬಾಗ್ ಮೈದಾನದಲ್ಲಿ ಅ.20ರ ಮಂಗಳವಾರ ಬೆಳಿಗ್ಗೆ 7.40ಕ್ಕೆ ಆರಂಭವಾಗಲಿದೆ. ಸಂಘದ ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಅವರು ಸಮಾರಂಭದಲ್ಲಿ ಭಾಷಣ ಮಾಡಲಿದ್ದು, ಸಂಘದ 100 ವರ್ಷಗಳ ಪಯಣದ ಅವಲೋಕನ, ಭವಿಷ್ಯದ ಕಾರ್ಯಯೋಜನೆ ಹಾಗೂ ಆದ್ಯತೆಗಳ ಕುರಿತು ಅವರು ವ್ಯಕ್ತಪಡಿಸಲಿರುವ ಅಭಿಪ್ರಾಯಗಳ ಬಗ್ಗೆ ದೇಶದ ಗಮನ ಕೇಂದ್ರೀಕೃತವಾಗಿದೆ.

ದೈನಿಕ ಜಾಗರಣ ಪತ್ರಿಕೆಯ ಪ್ರಧಾನ ಸಂಪಾದಕ ಸಂಜಯ್ ಗುಪ್ತಾ ಅವರು ಸಮಾರಂಭದ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ಮಾಜಿ ಉಪರಾಷ್ಟ್ರಪತಿ ಜಗದೀಪ್ ಧನಖರ ಹಾಗೂ ಮುಂಬೈನಲ್ಲಿರುವ ಇಸ್ರೇಲ್‌ನ ಮಹಾವಾಣಿಜ್ಯ ದೂತ ಯಾನಿವ್ ರೆವಾಚ್ ಅವರಿಗೂ ಆಹ್ವಾನ ನೀಡಲಾಗಿದೆ.

ಸಂಘದ ಶತಮಾನೋತ್ಸವ ವರ್ಷದ ಸಮಾರೋಪದ ಹಿನ್ನೆಲೆಯಲ್ಲಿ ಈ ಬಾರಿಯ ವಿಜಯದಶಮಿ ಸಮಾರಂಭ ವಿಶೇಷ ಮಹತ್ವ ಪಡೆದುಕೊಂಡಿದೆ.

ಸಂಘದ ಸ್ಥಾಪನಾ ದಿನವೂ ವಿಜಯದಶಮಿ

ಡಾ. ಕೇಶವ ಬಲಿರಾಮ್ ಹೆಡ್ಗೆವಾರ್ ಅವರು 1925ರಲ್ಲಿ ವಿಜಯದಶಮಿಯಂದು ನಾಗಪುರದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘವನ್ನು ಸ್ಥಾಪಿಸಿದರು. ಹೀಗಾಗಿ ವಿಜಯದಶಮಿ ಸಂಘಕ್ಕೆ ವಾರ್ಷಿಕ ಸಂಪ್ರದಾಯದ ಜೊತೆಗೆ ಸ್ಥಾಪನಾ ದಿನವಾಗಿಯೂ ವಿಶೇಷ ಮಹತ್ವ ಹೊಂದಿದೆ. ಅ.20ರಂದು ನಡೆಯುವ ಸಮಾರಂಭದೊಂದಿಗೆ ಸಂಘದ ಶತಮಾನೋತ್ಸವ ವರ್ಷದ ಕಾರ್ಯಕ್ರಮಗಳು ಸಮಾರೋಪಗೊಳ್ಳಲಿವೆ.

ಸಂಘದ ಜನ್ಮಸ್ಥಳವಾದ ನಾಗಪುರದ ರೇಶಿಮ್‌ಬಾಗ್ ಮೈದಾನದಲ್ಲಿ ನಡೆಯುವ ಈ ಸಮಾರಂಭ ಐತಿಹಾಸಿಕ ಹಾಗೂ ಸಂಘಟನಾತ್ಮಕ ದೃಷ್ಟಿಯಿಂದ ಮಹತ್ವದ್ದಾಗಿದೆ. ಶತಮಾನೋತ್ಸವದ ಸಂದರ್ಭದಲ್ಲಿ ಸಂಘದ ವಿಸ್ತರಣೆ, ಶಾಖೆಗಳ ಕಾರ್ಯವ್ಯವಸ್ಥೆ, ಸ್ವಯಂಸೇವಕರ ತರಬೇತಿ ಮತ್ತು ಸಾಮಾಜಿಕ ಕ್ಷೇತ್ರದಲ್ಲಿ ನಡೆಯುತ್ತಿರುವ ಕಾರ್ಯಗಳ ಅವಲೋಕನಕ್ಕೂ ಮಹತ್ವ ನೀಡಲಾಗಿದೆ.

ಮೋಹನ್ ಭಾಗವತ್ ಭಾಷಣದತ್ತ ಗಮನ

ವಿಜಯದಶಮಿ ಸಮಾರಂಭದಲ್ಲಿ ಸರಸಂಘಚಾಲಕರ ಭಾಷಣ ಪ್ರಮುಖ ಆಕರ್ಷಣೆಯಾಗಿರುತ್ತದೆ. ಈ ಭಾಷಣದ ಮೂಲಕ ಸಂಘವು ದೇಶದ ಸಾಮಾಜಿಕ, ಸಾಂಸ್ಕೃತಿಕ ಹಾಗೂ ರಾಷ್ಟ್ರೀಯ ವಿಚಾರಗಳ ಕುರಿತು ತನ್ನ ನಿಲುವನ್ನು ವ್ಯಕ್ತಪಡಿಸುತ್ತದೆ.

ಈ ಬಾರಿ ಸಾಮಾಜಿಕ ಸಾಮರಸ್ಯ, ರಾಷ್ಟ್ರೀಯ ಏಕತೆ, ಸ್ವದೇಶಿ ಚಿಂತನೆ, ನಾಗರಿಕರ ಸಾಮಾಜಿಕ ಹೊಣೆಗಾರಿಕೆ ಮತ್ತು ಸಂಘಟನೆಯ ವಿಸ್ತರಣೆಯಂತಹ ವಿಷಯಗಳ ಕುರಿತು ಮೋಹನ್ ಭಾಗವತ್ ಅವರು ಏನು ಹೇಳಲಿದ್ದಾರೆ ಎಂಬ ಕುತೂಹಲವಿದೆ. ಈ ವಿಚಾರಗಳಲ್ಲಿ ಸಂಘದ ನಿಲುವು ಹಾಗೂ ಮುಂದಿನ ಕಾರ್ಯಯೋಜನೆಗಳ ಸ್ಪಷ್ಟ ಚಿತ್ರಣ ಭಾಷಣದ ಬಳಿಕವೇ ಲಭ್ಯವಾಗಲಿದೆ.

ಶತಮಾನೋತ್ಸವ ವರ್ಷದ ಸಮಾರೋಪವು ಸಂಘಕ್ಕೆ ಕಳೆದ 100 ವರ್ಷಗಳ ಸಾಧನೆಗಳನ್ನು ಅವಲೋಕಿಸುವುದರ ಜತೆಗೆ ಮುಂದಿನ ದಿನಗಳ ಆದ್ಯತೆ ಮತ್ತು ಕಾರ್ಯದಿಕ್ಕನ್ನು ಸ್ಪಷ್ಟಪಡಿಸಲು ಅವಕಾಶ ಕಲ್ಪಿಸಿದೆ. ಹೀಗಾಗಿ ಈ ಬಾರಿಯ ವಿಜಯದಶಮಿ ಸಮಾರಂಭವು ಸಾಂಪ್ರದಾಯಿಕ ಆಚರಣೆಗೆ ಮಾತ್ರ ಸೀಮಿತವಾಗದೆ, ಸಂಘದ ಭವಿಷ್ಯದ ಕಾರ್ಯತಂತ್ರ ಹಾಗೂ ಸಮಕಾಲೀನ ರಾಷ್ಟ್ರೀಯ ಮತ್ತು ಸಾಮಾಜಿಕ ವಿಚಾರಗಳ ಕುರಿತ ನಿಲುವನ್ನು ಅರಿಯುವ ದೃಷ್ಟಿಯಿಂದಲೂ ಮಹತ್ವ ಪಡೆದಿದೆ.

-------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.