ಗ್ವಾಲಿಯರ್, 18 ಅಕ್ಟೋಬರ್ (ಹಿ.ಸ.):

ಮಧ್ಯಪ್ರದೇಶದ ಗ್ವಾಲಿಯರ್‌ನ ಶೀತಲಾ ಮಾತಾ ದೇವಸ್ಥಾನದಲ್ಲಿ ದೇವಿಯ ದರ್ಶನಕ್ಕೆ ಆಗಮಿಸಿದ್ದ ಭಕ್ತರಿಗೆ ಭಾನುವಾರ ನಸುಕಿನಲ್ಲಿ ಸಂಭವಿಸಿದ ಭೀಕರ ಅಪಘಾತ ಆಘಾತ ಉಂಟುಮಾಡಿದೆ. ಸಪ್ತಮಿ ಹಿನ್ನೆಲೆಯಲ್ಲಿ ದೇವಸ್ಥಾನಕ್ಕೆ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದ ಸಂದರ್ಭದಲ್ಲಿ, ಚಿನೋರ್ ರಸ್ತೆಯ ಇಳಿಜಾರಿನಲ್ಲಿ ನಿಯಂತ್ರಣ ತಪ್ಪಿ ಬಂದ ಭಾರಿ ಸರಕು ಸಾಗಣೆ ಲಾರಿ ಪೊಲೀಸರ ತಡೆಗೋಡೆಗಳನ್ನು ಮುರಿದು ದೇವಸ್ಥಾನದ ಪ್ರವೇಶದ್ವಾರದವರೆಗೆ ನುಗ್ಗಿದೆ. ಮಾರ್ಗಮಧ್ಯೆ ಭಕ್ತರು ಮತ್ತು ಪ್ರಸಾದದ ಅಂಗಡಿಗಳಿಗೆ ಡಿಕ್ಕಿ ಹೊಡೆದಿದ್ದು, ದೇವಸ್ಥಾನದ ಗೋಡೆ ಕುಸಿದು ಹಲವರು ಅವಶೇಷಗಳಡಿ ಸಿಲುಕಿದ್ದಾರೆ.

ಜಿಲ್ಲಾಡಳಿತದ ಪ್ರಕಾರ, ಈ ಅಪಘಾತದಲ್ಲಿ 14 ಮಂದಿ ಮೃತಪಟ್ಟಿದ್ದು, ಹಲವು ಗಾಯಾಳುಗಳಿಗೆ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಮೃತರಲ್ಲಿ ಮಕ್ಕಳು, ಹದಿಹರೆಯದವರು, ಮಹಿಳೆಯರು ಹಾಗೂ ವೃದ್ಧರು ಸೇರಿದ್ದಾರೆ. ಧಾರ್ಮಿಕ ಕಾರ್ಯಕ್ರಮಗಳ ಸಂದರ್ಭದಲ್ಲಿ ಭಕ್ತರ ಸುರಕ್ಷತೆ, ಜನದಟ್ಟಣೆ ನಿಯಂತ್ರಣ ಮತ್ತು ಸಂಚಾರ ವ್ಯವಸ್ಥೆ ಕುರಿತು ಈ ಘಟನೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಭಾರಿ ವಾಹನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸಿದ್ದರೂ ಲಾರಿ ಭಕ್ತರ ಗುಂಪಿನವರೆಗೆ ತಲುಪಿದ್ದು ಹೇಗೆ ಎಂಬ ಪ್ರಶ್ನೆ ಎದ್ದಿದೆ.

ನಸುಕಿನ 1.30ಕ್ಕೆ ಸಂಭವಿಸಿದ ದುರಂತ

ಶನಿವಾರ ಮತ್ತು ಭಾನುವಾರದ ಮಧ್ಯರಾತ್ರಿ ಸುಮಾರು 1.30ಕ್ಕೆ ಈ ಅಪಘಾತ ಸಂಭವಿಸಿದೆ. ಸಪ್ತಮಿ ಹಿನ್ನೆಲೆಯಲ್ಲಿ ಗ್ವಾಲಿಯರ್ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಶೀತಲಾ ಮಾತಾ ದೇವಸ್ಥಾನಕ್ಕೆ ಆಗಮಿಸಿದ್ದರು. ದೇವಸ್ಥಾನದ ಸುತ್ತಮುತ್ತ ಪ್ರಸಾದ ಮತ್ತು ಪೂಜಾ ಸಾಮಗ್ರಿಗಳ ಅಂಗಡಿಗಳನ್ನು ತೆರೆಯಲಾಗಿತ್ತು.

ಭಕ್ತರು ದರ್ಶನಕ್ಕೆ ತೆರಳುತ್ತಿದ್ದ ಸಂದರ್ಭದಲ್ಲಿ ಚಿನೋರ್ ಕಡೆಯಿಂದ ಭಾರಿ ಸರಕು ತುಂಬಿಕೊಂಡು ಬರುತ್ತಿದ್ದ ಲಾರಿ ಚಾಲಕನ ನಿಯಂತ್ರಣ ತಪ್ಪಿದೆ. ಇಳಿಜಾರಿನಲ್ಲಿ ವೇಗವಾಗಿ ಬಂದ ಲಾರಿಯು ಜನರಿಗೆ ತಪ್ಪಿಸಿಕೊಳ್ಳಲು ಅವಕಾಶವನ್ನೇ ನೀಡದೆ ಪೊಲೀಸರ ತಡೆಗೋಡೆಗಳನ್ನು ಮುರಿದು ಮುನ್ನುಗ್ಗಿದೆ. ಭಕ್ತರಿಗೆ ಡಿಕ್ಕಿ ಹೊಡೆದ ಬಳಿಕ ದೇವಸ್ಥಾನದ ಪ್ರವೇಶದ್ವಾರದ ಗೋಡೆಗೆ ಅಪ್ಪಳಿಸಿದೆ. ಡಿಕ್ಕಿಯ ತೀವ್ರತೆಗೆ ಗೋಡೆ ಕುಸಿದಿದ್ದು, ಸುತ್ತಮುತ್ತಲಿದ್ದ ಹಲವರು ಅವಶೇಷಗಳಡಿ ಸಿಲುಕಿದ್ದಾರೆ.

ಘಟನಾ ಸ್ಥಳದಲ್ಲಿ ಹಾಹಾಕಾರ ಉಂಟಾಗಿದ್ದು, ಸ್ಥಳೀಯರು ಪೊಲೀಸರು ಮತ್ತು ಆಡಳಿತದ ಸಿಬ್ಬಂದಿಯೊಂದಿಗೆ ಸೇರಿ ರಕ್ಷಣಾ ಕಾರ್ಯಾಚರಣೆ ನಡೆಸಿದರು. ಗಾಯಾಳುಗಳನ್ನು ತಕ್ಷಣವೇ ವಿವಿಧ ಆಸ್ಪತ್ರೆಗಳಿಗೆ ಸಾಗಿಸಲಾಯಿತು.

ಎಂಟು ಮೃತರ ಗುರುತು ಪತ್ತೆ

ಜಿಲ್ಲಾಡಳಿತವು 14 ಮಂದಿ ಮೃತಪಟ್ಟಿರುವುದನ್ನು ದೃಢಪಡಿಸಿದೆ. ಈ ಪೈಕಿ ಎಂಟು ಮಂದಿಯ ಗುರುತು ಪತ್ತೆಯಾಗಿದ್ದು, ಉಳಿದ ಆರು ಮಂದಿಯ ಗುರುತು ಪತ್ತೆಹಚ್ಚುವ ಕಾರ್ಯ ಮುಂದುವರಿದಿದೆ.

ಗುರುತು ಪತ್ತೆಯಾದ ಮೃತರನ್ನು ಸತ್ಯೇಂದ್ರ ಗುರ್ಜರ್ (22), ಸರಳಾ ತೋಮರ್ (50), ಗೌರವ್ ಪರಿಹಾರ್ (18), ಮಹೇಶ್ ಶರ್ಮಾ (45), ವಿಮಲೇಶ್ (18), ದೇವೇಶ್ ಬಘೇಲ್ (17), ಪ್ರಿನ್ಸ್ ಅಲಿಯಾಸ್ ಛೋಟು ಜಾಟವ್ (16) ಮತ್ತು ಶೌರ್ಯ ಶರ್ಮಾ (15) ಎಂದು ಗುರುತಿಸಲಾಗಿದೆ.

ಮೃತರಲ್ಲಿ ಹಲವು ಹದಿಹರೆಯದವರೂ ಸೇರಿರುವುದು ದುರಂತದ ತೀವ್ರತೆಯನ್ನು ಎತ್ತಿತೋರಿಸಿದೆ. ದೇವಿಯ ದರ್ಶನಕ್ಕೆ ಕುಟುಂಬದೊಂದಿಗೆ ಬಂದಿದ್ದ ಹಲವರಿಗೆ ಈ ಘಟನೆ ಮರೆಯಲಾಗದ ನೋವು ತಂದಿದೆ. ಅಪಘಾತದ ಬಳಿಕ ಆಸ್ಪತ್ರೆಗಳಲ್ಲಿ ತಮ್ಮವರಿಗಾಗಿ ಸಂಬಂಧಿಕರು ಹುಡುಕಾಟ ನಡೆಸಿದರು. ಮಗ, ಸಹೋದರ, ಸೋದರಳಿಯ ಸೇರಿದಂತೆ ಕುಟುಂಬದ ಸದಸ್ಯರ ಸ್ಥಿತಿಗತಿ ತಿಳಿದುಕೊಳ್ಳಲು ಅನೇಕರು ಒಂದು ಆಸ್ಪತ್ರೆಯಿಂದ ಮತ್ತೊಂದು ಆಸ್ಪತ್ರೆಗೆ ಅಲೆದಾಡಿದರು.

ಗಾಯಾಳುಗಳಿಗೆ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ

ಅಪಘಾತದಲ್ಲಿ ಗಾಯಗೊಂಡವರನ್ನು ವಿವಿಧ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ. ಲಭ್ಯ ಮಾಹಿತಿಯ ಪ್ರಕಾರ, ಕೌಶಿಕ್ ಪಾಲ್ (25), ಜಾನವಿ ಪಾಲ್ (22), ಯಶ್ ಶರ್ಮಾ (11), ನಿತೇಶ್/ರಿತೇಶ್ (18), ಆಶು ಶರ್ಮಾ (19), ಮನೀಷ್ (32), ಅನುಜ್ ಶರ್ಮಾ (19), ರಾಜ್ ಬಹದ್ದೂರ್ (20), ಶುಭಂ ರಾಥೋಡ್ (21), ರಾಜೇಶ್ ಸಿಂಗ್ (32), ಮುನ್ನುದ್ದೀನ್ ಖಾನ್ (56), ಪವನ್ ರಾಥೋಡ್ (28), ಶಿವಂ ಶರ್ಮಾ (19), ರಾಜೇಂದ್ರ ಶರ್ಮಾ (60), ಅನುಪ್ರಿಯಾ ಗೋಸ್ವಾಮಿ (18), ಸೋನು ತೋಮರ್ (42), ಶೈಲೇಂದ್ರ ತೋಮರ್ (17), ರವಿ ಕುಶ್ವಾಹ (20), ರಾಧಾ ರಾಥೋಡ್ (19), ಆದಿತ್ಯ ಯಾದವ್ (19), ವಿವೇಕ್ ರಾಥೋಡ್ (20), ಸಬ್ಬಿ (29), ಸಾವನ್ ಮೌರ್ಯ (33) ಮತ್ತು ನಿಕೇಶ್ ಜಾಟವ್ (18) ಗಾಯಾಳುಗಳ ಪಟ್ಟಿಯಲ್ಲಿದ್ದಾರೆ.

ಇದಲ್ಲದೆ, ಇತರ ಕೆಲವು ಗಾಯಾಳುಗಳ ಗುರುತು ಮತ್ತು ವಯಸ್ಸಿನ ವಿವರಗಳನ್ನು ಸಂಗ್ರಹಿಸಲಾಗುತ್ತಿದೆ.

ಆಸ್ಪತ್ರೆಗಳಲ್ಲಿ ಸಂಬಂಧಿಕರ ಹುಡುಕಾಟ

ಅಪಘಾತದ ಬಳಿಕ ಆಸ್ಪತ್ರೆಗಳಲ್ಲಿ ದುಃಖದ ವಾತಾವರಣ ನಿರ್ಮಾಣವಾಗಿತ್ತು. ಗಾಯಾಳುಗಳು ಮತ್ತು ಮೃತರ ಮಾಹಿತಿ ಪಡೆಯಲು ಕುಟುಂಬದ ಸದಸ್ಯರು ಪರದಾಡಿದರು.

ದಿವ್ಯಾಂಶ್ ಅವರ ಸಂಬಂಧಿ ಸಾವಿತ್ರಿ ಅವರ ಪ್ರಕಾರ, ದೇವರ ದರ್ಶನದ ಬಳಿಕ ಕುಟುಂಬದವರು ಹೊರಗೆ ಬಂದಿದ್ದರು. ಆದರೆ ಅವರ ಮೈದುನನ ಮಗ ದಿವ್ಯಾಂಶ್ ಕಾಣೆಯಾಗಿದ್ದ. ಬಹಳ ಹೊತ್ತು ಹುಡುಕಾಟ ನಡೆಸಿದ ಬಳಿಕ ಆತನ ಗುರುತು ಪತ್ತೆಯಾಯಿತು.

ಥಾಟಿಪುರ ನಿವಾಸಿ ನಿಕೇಶ್ ಅವರ ಸಂಬಂಧಿ ಸಂದೀಪ್ ಹೇಳುವಂತೆ, ಭಾನುವಾರ ಬೆಳಿಗ್ಗೆ ಸುಮಾರು ಐದು ಗಂಟೆಗೆ ನಿಕೇಶ್ ಗಾಯಗೊಂಡಿರುವುದಾಗಿ ದೂರವಾಣಿ ಮೂಲಕ ಮಾಹಿತಿ ಬಂದಿತ್ತು. ಸ್ಥಳಕ್ಕೆ ತೆರಳಿದಾಗ ನಿಕೇಶ್ ಗಂಭೀರವಾಗಿ ಗಾಯಗೊಂಡಿದ್ದು, ಆತನ ಎರಡೂ ಕಾಲುಗಳು ಮುರಿದಿದ್ದವು. ಆತನನ್ನು ಕೃತಕ ಉಸಿರಾಟದ ವ್ಯವಸ್ಥೆಯಲ್ಲಿರಿಸಲಾಗಿತ್ತು.

ಇನ್ನೊಂದೆಡೆ, ಮಹಿಳೆಯೊಬ್ಬರು ತಮ್ಮ ಮಗ ಛೋಟುಗಾಗಿ ಆಸ್ಪತ್ರೆಗಳಲ್ಲಿ ಹುಡುಕಾಟ ನಡೆಸುತ್ತಿದ್ದರೆ, ಆತನ ಸ್ನೇಹಿತ ಅಭಿಷೇಕ್ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದನು.

ತಡೆಗೋಡೆ ಮುರಿದು ನುಗ್ಗಿದ ಲಾರಿ: ಭದ್ರತಾ ವ್ಯವಸ್ಥೆ ಬಗ್ಗೆ ಪ್ರಶ್ನೆ

ಪೊಲೀಸ್ ವರಿಷ್ಠಾಧಿಕಾರಿ ಧರ್ಮವೀರ್ ಸಿಂಗ್ ಯಾದವ್ ಅವರ ಪ್ರಕಾರ, ದೇವಸ್ಥಾನಕ್ಕೆ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದ ಹಿನ್ನೆಲೆಯಲ್ಲಿ ಆ ಮಾರ್ಗದಲ್ಲಿ ಭಾರಿ ವಾಹನಗಳ ಸಂಚಾರವನ್ನು ತಡೆಯಲು ವ್ಯವಸ್ಥೆ ಮಾಡಲಾಗಿತ್ತು. ಆದರೂ ಲಾರಿಯು ಪೊಲೀಸರ ತಡೆಗೋಡೆಗಳನ್ನು ಮುರಿದು ದೇವಸ್ಥಾನದ ಕಡೆಗೆ ನುಗ್ಗಿದೆ. ಕರ್ತವ್ಯದಲ್ಲಿದ್ದ ಇಬ್ಬರು ಪೊಲೀಸ್ ಸಿಬ್ಬಂದಿ ಮತ್ತು ಒಬ್ಬ ಗೃಹರಕ್ಷಕ ದಳದ ಸಿಬ್ಬಂದಿಯೂ ಅಪಘಾತದಲ್ಲಿ ಗಾಯಗೊಂಡಿದ್ದಾರೆ.

ಅಪಘಾತ ಸಂಭವಿಸುವ ಸುಮಾರು 15 ನಿಮಿಷಗಳ ಹಿಂದಿನವರೆಗೂ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿಯವರು ಘಟನಾ ಸ್ಥಳದ ಸುತ್ತಮುತ್ತ ಸಂಚಾರ ವ್ಯವಸ್ಥೆಯನ್ನು ನಿರ್ವಹಿಸುತ್ತಿದ್ದರು ಎಂದು ತಿಳಿದುಬಂದಿದೆ. ಆದರೂ ಭಾರಿ ವಾಹನವು ಭಕ್ತರ ಗುಂಪಿನೊಳಗೆ ನುಗ್ಗಿರುವುದು ಭದ್ರತಾ ವ್ಯವಸ್ಥೆಯ ಕುರಿತು ಅನುಮಾನಗಳನ್ನು ಮೂಡಿಸಿದೆ.

ಮೃತ ಸರಳಾ ತೋಮರ್ ಅವರ ಸೋದರಳಿಯ ಲೋಕೇಂದ್ರ ಸಿಂಗ್ ತೋಮರ್, ಮಾರ್ಗದಲ್ಲಿ ಭಾರಿ ವಾಹನಗಳ ಪ್ರವೇಶಕ್ಕೆ ನಿರ್ಬಂಧವಿದ್ದರೂ ಲಾರಿ ಅಲ್ಲಿಗೆ ತಲುಪಿದ್ದು ಹೇಗೆ ಮತ್ತು ಅದಕ್ಕೆ ಪ್ರವೇಶ ನೀಡಿದವರು ಯಾರು ಎಂದು ಪ್ರಶ್ನಿಸಿದ್ದಾರೆ.

ತನಿಖೆಯಿಂದ ಲೋಪದ ಕಾರಣ ತಿಳಿಯಲಿದೆ: ಜಿಲ್ಲಾಧಿಕಾರಿ

ಲಾರಿ ಇಳಿಜಾರಿನಲ್ಲಿ ನಿಯಂತ್ರಣ ತಪ್ಪಿ ದೇವಸ್ಥಾನದ ಕಡೆಗೆ ಬಂದಿದೆ ಎಂದು ಜಿಲ್ಲಾಧಿಕಾರಿ ರುಚಿಕಾ ಚೌಹಾಣ್ ತಿಳಿಸಿದ್ದಾರೆ. ಘಟನಾ ಸ್ಥಳದಲ್ಲಿ ಮುರಿದುಬಿದ್ದ ತಡೆಗೋಡೆಗಳು ಪತ್ತೆಯಾಗಿವೆ. ಲಾರಿ ನಿಯಂತ್ರಣ ತಪ್ಪಲು ಕಾರಣವೇನು ಮತ್ತು ಭದ್ರತಾ ವ್ಯವಸ್ಥೆಯಲ್ಲಿ ಲೋಪ ಸಂಭವಿಸಿದೆಯೇ ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.

ಗಾಯಾಳುಗಳಿಗೆ ಉತ್ತಮ ಚಿಕಿತ್ಸೆ ಒದಗಿಸುವುದರ ಜೊತೆಗೆ, ನೆರವಿನ ಅಗತ್ಯವಿರುವ ಕುಟುಂಬಗಳಿಗೆ ರೆಡ್‌ಕ್ರಾಸ್ ಮೂಲಕ ಸಹಾಯ ನೀಡಲಾಗುವುದು ಎಂದು ಜಿಲ್ಲಾಡಳಿತ ತಿಳಿಸಿದೆ. ಜಿಲ್ಲಾಧಿಕಾರಿ ರುಚಿಕಾ ಚೌಹಾಣ್ ಮತ್ತು ಪೊಲೀಸ್ ಇಲಾಖೆಯ ಅಧಿಕಾರಿಗಳು ಆಸ್ಪತ್ರೆಗಳಿಗೆ ಭೇಟಿ ನೀಡಿ ಅಗತ್ಯ ನೆರವು ಒದಗಿಸುವ ಕಾರ್ಯದಲ್ಲಿ ತೊಡಗಿದ್ದಾರೆ. ಜಿಲ್ಲಾಧಿಕಾರಿಯವರು ಮೃತರು ಮತ್ತು ಗಾಯಾಳುಗಳ ಕುಟುಂಬ ಸದಸ್ಯರನ್ನು ಭೇಟಿಯಾಗಿ ಸಾಂತ್ವನ ಹೇಳುವುದರೊಂದಿಗೆ ಅಗತ್ಯ ನೆರವು ಕಲ್ಪಿಸುತ್ತಿದ್ದಾರೆ.

ಧಾರ್ಮಿಕ ಕಾರ್ಯಕ್ರಮದ ಸಂದರ್ಭದಲ್ಲಿ ಸಂಭವಿಸಿದ ಈ ದುರಂತವು ಭಕ್ತರ ಸುರಕ್ಷತೆ ಮತ್ತು ಸಂಚಾರ ನಿಯಂತ್ರಣ ವ್ಯವಸ್ಥೆಯ ಪರಿಣಾಮಕಾರಿತ್ವದ ಕುರಿತು ಗಂಭೀರ ಚರ್ಚೆಗೆ ಕಾರಣವಾಗಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.