ಜೆಡ್ಡಾ, 03 ಜನವರಿ (ಹಿ.ಸ.) :
ಆ್ಯಂಕರ್ : ಶುಕ್ರವಾರ ರಾತ್ರಿ ಜೆಡ್ಡಾದ ಕಿಂಗ್ ಅಬ್ದುಲ್ಲಾ ಸ್ಪೋರ್ಟ್ಸ್ ಸಿಟಿ ಕ್ರೀಡಾಂಗಣದಲ್ಲಿ ನಡೆದ ಸೌದಿ ಪ್ರೊ ಲೀಗ್ ಪಂದ್ಯದಲ್ಲಿ ಇಂಗ್ಲೆಂಡ್ ಸ್ಟ್ರೈಕರ್ ಇವಾನ್ ಟೋನಿ ಎರಡು ಅದ್ಭುತ ಗೋಲುಗಳನ್ನು ಗಳಿಸಿ ಅಲ್-ಅಹ್ಲಿ ಸೌದಿ ತಂಡಕ್ಕೆ 3–2 ಅಂತರದ ರೋಚಕ ಜಯ ತಂದುಕೊಟ್ಟರು. ಇದರೊಂದಿಗೆ 2025–26 ಋತುವಿನಲ್ಲಿ ಅಲ್-ನಾಸ್ರ್ ಎದುರಿಸಿದ ಮೊದಲ ಸೋಲು ಇದಾಗಿದೆ.
ಪಂದ್ಯದ ಆರಂಭದಿಂದಲೇ ಆತಿಥೇಯ ಅಲ್-ಅಹ್ಲಿ, ಅಲ್-ನಾಸ್ರ್ ತಂಡದ ಹೈ ಡಿಫೆನ್ಸಿವ್ ಲೈನ್ನ ದುರ್ಬಲತೆಯನ್ನು ಸಮರ್ಪಕವಾಗಿ ಬಳಸಿಕೊಂಡಿತು. ಮೊದಲ ನಿಮಿಷದಲ್ಲೇ ಗ್ಯಾಲೆನೊ ಅವರ ಶಾಟ್ ಕ್ರಾಸ್ಬಾರ್ಗೆ ತಗುಲಿ ಬಿದ್ದು ಆತಿಥೇಯರ ಆಕ್ರಮಣಾತ್ಮಕ ಉದ್ದೇಶವನ್ನು ತೋರಿಸಿತು. ಏಳನೇ ನಿಮಿಷದಲ್ಲಿ ಗ್ಯಾಲೆನೊ ನೀಡಿದ ಸ್ಕ್ವೇರ್ ಪಾಸ್ಗೆ ಇವಾನ್ ಟೋನಿ ಹೆಡರ್ ಮೂಲಕ ಗೋಲು ಬಾರಿಸಿ ಅಲ್-ಅಹ್ಲಿಗೆ ಮುನ್ನಡೆ ತಂದರು.
20ನೇ ನಿಮಿಷದಲ್ಲಿ ಟೋನಿ ತಮ್ಮ ಎರಡನೇ ಗೋಲು ದಾಖಲಿಸಿದರು. ತಮ್ಮದೇ ಅರ್ಧಭಾಗದಿಂದ ಬಂದ ದೀರ್ಘ ಪಾಸ್ಗೆ ಚುರುಕಾಗಿ ಪ್ರತಿಕ್ರಿಯಿಸಿದ ಅವರು, ಅಲ್-ನಾಸ್ರ್ ಗೋಲ್ಕೀಪರ್ ನವಾಫ್ ಅಲ್-ಅಕಿಡಿಯ ಮೇಲಿಂದ ಬಲಿಷ್ಠ ಶಾಟ್ ಹೊಡೆದು ಸ್ಕೋರ್ನ್ನು 2–0ಕ್ಕೆ ಏರಿಸಿದರು.
ಆದರೆ 30ನೇ ನಿಮಿಷದಲ್ಲಿ ಅಲ್-ನಾಸ್ರ್ಗೆ ಭಾಗ್ಯ ಕೈ ಹಿಡಿಯಿತು. ಅಬ್ದುಲ್ಲೆಲಾ ಅಲ್-ಅಮ್ರಿಯ ಸರಳ ಪ್ರಯತ್ನ ಅಲ್-ಅಹ್ಲಿ ಗೋಲ್ಕೀಪರ್ ಅಬ್ದುಲ್ರಹಮಾನ್ ಅಲ್-ಸನಾಬಿಯ ಕಾಲುಗಳ ನಡುವೆ ಜಾರಿ ನೆಟ್ ಸೇರಿತು. ಅರ್ಧಾವಧಿಗೆ ಸ್ವಲ್ಪ ಮೊದಲು ಮಾರ್ಸೆಲೊ ಬ್ರೋಜೋವಿಕ್ ಅವರ ಕಾರ್ನರ್ಗೆ ಅಲ್-ಅಮ್ರಿ ಪ್ರಬಲ ಹೆಡರ್ ಹೊಡೆದು ಸ್ಕೋರ್ನ್ನು 2–2ಕ್ಕೆ ಸಮಗೊಳಿಸಿದರು.
ಅರ್ಧಾವಧಿಗೆ ಮುನ್ನ ಟೋನಿ ಮತ್ತೊಮ್ಮೆ ಗೋಲು ಸಾಧಿಸುವ ಹಂತಕ್ಕೆ ಬಂದರೂ, ಅವರ ಶಾಟ್ ಪೋಸ್ಟ್ನ ಕೆಳಭಾಗಕ್ಕೆ ತಗುಲಿ ಹೊರಬಿದ್ದಿತು. ಹೀಗಾಗಿ ಎರಡೂ ತಂಡಗಳು ಸಮಬಲದಲ್ಲಿ ಬ್ರೇಕ್ಗೆ ಹೋದವು.
ದ್ವಿತೀಯಾರ್ಧದಲ್ಲಿ ಅಲ್-ಅಹ್ಲಿ ನಿರ್ಣಾಯಕ ಗೋಲು ದಾಖಲಿಸಿತು. ಮ್ಯಾಥ್ಯೂಸ್ ಗೊನ್ಸಾಲ್ವ್ಸ್ ಫ್ರೀ-ಕಿಕ್ಗೆ ಟೋನಿ ಕಲಾತ್ಮಕ ಟಚ್ ನೀಡಿದ ಬಳಿಕ, ಮೆರಿಹ್ ಡೆಮಿರಲ್ ಆರು ಗಜಗಳ ಪೆಟ್ಟಿಗೆಯೊಳಗಿಂದ ಹೆಡರ್ ಮೂಲಕ ಚೆಂಡನ್ನು ಜಾಲಕ್ಕೆ ತಲುಪಿಸಿದರು.
ಆ ಬಳಿಕ ಅಲ್-ನಾಸ್ರ್ ಹೆಚ್ಚಿನ ಪೊಸೆಷನ್ ಕಾಯ್ದುಕೊಂಡರೂ ಸಮಬಲ ಸಾಧಿಸಲು ಸ್ಪಷ್ಟ ಅವಕಾಶಗಳನ್ನು ನಿರ್ಮಿಸಲು ವಿಫಲವಾಯಿತು. ಪಂದ್ಯ ಅಂತಿಮ ಕ್ಷಣಗಳಲ್ಲಿ ತೀವ್ರತೆಯನ್ನು ಪಡೆದಿದ್ದು, ಎರಡೂ ತಂಡಗಳ ಆಟಗಾರರಿಗೆ ಕೆಂಪು ಕಾರ್ಡ್ ತೋರಿಸಲಾಯಿತು. ಜೊವೊ ಫೆಲಿಕ್ಸ್ಗೆ ಕೆನ್ನೆಗೆ ಹೊಡೆದ ಕಾರಣ ಅಲ್-ಅಹ್ಲಿಯ ಅಲಿ ಮಜ್ರಶಿಯನ್ನು ಹೊರ ಕಳುಹಿಸಲಾಯಿತಾದರೆ, ಕೊನೆಯ ಡಿಫೆಂಡರ್ಗೆ ಫೌಲ್ ಮಾಡಿದ ಹಿನ್ನೆಲೆಯಲ್ಲಿ ಅಲ್-ನಾಸ್ರ್ನ ನವಾಫ್ ಬೌಷಲ್ ಕೂಡ ಕೆಂಪು ಕಾರ್ಡ್ ಪಡೆದರು.
ಅಲ್-ನಾಸ್ರ್ ಸ್ಟಾರ್ ಕ್ರಿಸ್ಟಿಯಾನೊ ರೊನಾಲ್ಡೊ ನೀರಸ ಪ್ರದರ್ಶನ ನೀಡಿದ್ದು, ಮೊದಲಾರ್ಧದಲ್ಲಿ ಹೆಡರ್ ಮೂಲಕ ಸಿಕ್ಕ ಅವಕಾಶವೊಂದನ್ನು ಕೈಚೆಲ್ಲಿದುದು ಅವರ ಏಕೈಕ ಗಮನಾರ್ಹ ಪ್ರಯತ್ನವಾಗಿತ್ತು.
ಈ ಸೋಲಿನೊಂದಿಗೆ, ಜನವರಿ 4ರಂದು ಡಮಾಕ್ ವಿರುದ್ಧ ಅಲ್-ಹಿಲಾಲ್ ಗೆಲುವು ಸಾಧಿಸಿದರೆ ಪ್ರಶಸ್ತಿ ಪೈಪೋಟಿಯಲ್ಲಿ ಅಗ್ರಸ್ಥಾನಕ್ಕೇರಲು ಅವಕಾಶ ಸಿಕ್ಕಿದೆ. ಮತ್ತೊಂದೆಡೆ, ಗೆಲುವಿನ ಹೊರತಾಗಿಯೂ ಅಲ್-ಅಹ್ಲಿ ಸೌದಿ ನಾಲ್ಕನೇ ಸ್ಥಾನದಲ್ಲೇ ಉಳಿದಿದ್ದು, ಅಲ್-ತಾವೂನ್ ಜೊತೆಗೆ ಪಾಯಿಂಟ್ಗಳ ಅಂತರವನ್ನು ಮೂರಕ್ಕೆ ಇಳಿಸಿಕೊಂಡಿದೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
