ನವದೆಹಲಿ, 17 ಜನವರಿ (ಹಿ.ಸ.) :

ಆ್ಯಂಕರ್ : ಉತ್ತರ ಭಾರತದಲ್ಲಿ ಮುಂದುವರಿದಿರುವ ಶೀತಗಾಳಿ ಪರಿಣಾಮವಾಗಿ ಶನಿವಾರ ಬೆಳಿಗ್ಗೆ ರಾಷ್ಟ್ರ ರಾಜಧಾನಿ ನವದೆಹಲಿಯ ಬಹುತೇಕ ಭಾಗಗಳಲ್ಲಿ ದಟ್ಟ ಮಂಜು ಆವರಿಸಿತ್ತು. ಇದರಿಂದಾಗಿ ವಿಮಾನ ಮತ್ತು ರೈಲು ಸಂಚಾರದ ಮೇಲೆ ತೀವ್ರ ಪರಿಣಾಮ ಬೀರಿದ್ದು, ಪ್ರಯಾಣಿಕರು ಭಾರಿ ತೊಂದರೆ ಅನುಭವಿಸಿದರು.

ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಳಪೆ ಗೋಚರತೆಯಿಂದಾಗಿ ಹಲವಾರು ವಿಮಾನಗಳು ವಿಳಂಬವಾಗಿವೆ. ಮಂಜಿನ ಕಾರಣದಿಂದ ವಿಮಾನ ಕಾರ್ಯಾಚರಣೆಗಳು ಮಧ್ಯಂತರವಾಗಿ ಅಡಚಣೆಗೆ ಒಳಗಾಗುವ ಸಾಧ್ಯತೆ ಇರುವುದರಿಂದ, ಪ್ರಯಾಣಿಕರು ವಿಮಾನ ನಿಲ್ದಾಣಕ್ಕೆ ತೆರಳುವ ಮೊದಲು ತಮ್ಮ ವಿಮಾನಗಳ ಸ್ಥಿತಿಯನ್ನು ಸಂಬಂಧಿತ ವಿಮಾನಯಾನ ಸಂಸ್ಥೆಗಳೊಂದಿಗೆ ಪರಿಶೀಲಿಸಿಕೊಳ್ಳುವಂತೆ ದೆಹಲಿ ವಿಮಾನ ನಿಲ್ದಾಣ ಆಡಳಿತ ಸಲಹೆ ನೀಡಿದೆ.

ಇನ್ನು ರೈಲು ಸಂಚಾರವೂ ಗಂಭೀರವಾಗಿ ಅಸ್ತವ್ಯಸ್ತಗೊಂಡಿದ್ದು, ಮಂಜು ಮತ್ತು ಕಡಿಮೆ ಗೋಚರತೆಯಿಂದಾಗಿ ಒಟ್ಟು 177 ರೈಲುಗಳು ವಿಳಂಬವಾಗಿವೆ. ರೈಲ್ವೆ ಸಂಚಾರ ಪಟ್ಟಿಯ ಪ್ರಕಾರ, ಅನೇಕ ರೈಲುಗಳು ಎರಡು ಗಂಟೆಯಿಂದ ಎಂಟು ಗಂಟೆಗಳವರೆಗೆ ತಡವಾಗಿ ಚಲಿಸುತ್ತಿವೆ. ದೆಹಲಿ-ಎನ್‌ಸಿಆರ್ ಪ್ರದೇಶಕ್ಕೆ ಹೋಗುವ ಮತ್ತು ಹೊರಡುವ ಬಹುತೇಕ ಪ್ರಮುಖ ರೈಲುಗಳು ಇದರ ಪರಿಣಾಮಕ್ಕೆ ಒಳಗಾಗಿವೆ.

ಪ್ರಯಾಗ್‌ರಾಜ್, ಲಕ್ನೋ, ಕಾನ್ಪುರ, ಗಾಜಿಯಾಬಾದ್, ಮೀರತ್, ಆಗ್ರಾ ಹಾಗೂ ಝಾನ್ಸಿ ವಿಭಾಗಗಳಲ್ಲಿನ ರೈಲುಗಳಲ್ಲಿ ಗಮನಾರ್ಹ ವಿಳಂಬ ಉಂಟಾಗಿದೆ. ರೈಲ್ವೆ ಅಧಿಕಾರಿಗಳ ಪ್ರಕಾರ, ಮಂಜು ಸಿಗ್ನಲಿಂಗ್ ವ್ಯವಸ್ಥೆ ಮತ್ತು ಮಾರ್ಗದ ಗೋಚರತೆಯನ್ನು ಹಿಂಜರಿಸುವುದರಿಂದ, ರೈಲುಗಳನ್ನು ನಿಯಂತ್ರಿತ ವೇಗದಲ್ಲಿ ಸಂಚರಿಸಲಾಗುತ್ತಿದೆ.

ಭಾರತ ಹವಾಮಾನ ಇಲಾಖೆ ಶೀತ ಅಲೆ ಮತ್ತು ದಟ್ಟ ಮಂಜಿನ ಹಿನ್ನೆಲೆಯಲ್ಲಿ ಹಳದಿ ಎಚ್ಚರಿಕೆ ಘೋಷಿಸಿದೆ. ಆದರೆ ಕನಿಷ್ಠ ತಾಪಮಾನದಲ್ಲಿ ಸ್ವಲ್ಪ ಸುಧಾರಣೆ ಕಂಡುಬಂದಿದ್ದು, ಜನವರಿ 16ರಂದು 4 ಡಿಗ್ರಿ ಸೆಲ್ಸಿಯಸ್ ಇದ್ದ ತಾಪಮಾನವು ಜನವರಿ 17ರ ಬೆಳಿಗ್ಗೆ 7 ಡಿಗ್ರಿ ಸೆಲ್ಸಿಯಸ್‌ಗೆ ಏರಿಕೆಯಾಗಿದೆ ಎಂದು ವರದಿ ಮಾಡಿದೆ.

ಇದರ ನಡುವೆ, ದೆಹಲಿಯ ಗಾಳಿಯ ಗುಣಮಟ್ಟವೂ ತೀವ್ರ ಕಳವಳಕಾರಿಯಾಗಿ ಉಳಿದಿದೆ. ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ನೀಡಿದ ಮಾಹಿತಿಯಂತೆ, ಬೆಳಿಗ್ಗೆ 7 ಗಂಟೆಯ ವೇಳೆಗೆ ದೆಹಲಿಯ ವಾಯು ಗುಣಮಟ್ಟ ಸೂಚ್ಯಂಕ 368 ದಾಖಲಾಗಿದ್ದು, ಇದು “ತುಂಬಾ ಕಳಪೆ” ವರ್ಗಕ್ಕೆ ಸೇರಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa