ಬೆಂಗಳೂರು, 08 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ‎ಭಾರತವು ಈಗ ವಿಶ್ವದ 4ನೇ ಅತಿ ದೊಡ್ಡ ಆರ್ಥಿಕ ಶಕ್ತಿಯಾಗಿ ಹೊರಹೊಮ್ಮಿದೆ. ಇದಕ್ಕೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಕೈಗೊಂಡ ಕೈಗಾರಿಕಾ ಸುಧಾರಣೆಗಳು ಮತ್ತು ದೃಢ ನಿರ್ಧಾರಗಳು ಇನ್ನಷ್ಟು ಬಲನೀಡಿ ದೇಶದ ಉತ್ಪಾದನಾ ವಲಯವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದಿವೆ.

‎

‎2023–24ರಲ್ಲಿ ಉತ್ಪಾದನಾ ವಲಯ 11.89% ಮೌಲ್ಯವರ್ಧಿತ ಉತ್ಪಾದನೆ (GVA) ಸಾಧಿಸಿದ್ದು, ಹಿಂದಿನ ಸಾಲಿನ 7.3% ಹೋಲಿಕೆಯಲ್ಲಿ ಭರ್ಜರಿ ಏರಿಕೆಯಾಗಿದೆ. ಕೈಗಾರಿಕಾ ಉತ್ಪಾದನೆ ಏಪ್ರಿಲ್ 2023–ಮಾರ್ಚ್ 2024 ಅವಧಿಯಲ್ಲಿ 5.80% ಹೆಚ್ಚಳ ಕಂಡಿದೆ.

‎

‎ಉದ್ಯೋಗ ವಲಯದಲ್ಲೂ ಭರ್ಜರಿ ಬೆಳವಣಿಗೆ

‎ಉದ್ಯೋಗ ಸೃಷ್ಟಿಯಲ್ಲಿಯೂ ಉತ್ಪಾದನಾ ವಲಯವು ಮಹತ್ವದ ಪ್ರಗತಿ ದಾಖಲಿಸಿದೆ. FY24ರಲ್ಲಿ ಉದ್ಯೋಗ 5.92% ಏರಿಕೆಯಾಗಿ, ಕಳೆದ ದಶಕದಲ್ಲಿ 57 ಲಕ್ಷಕ್ಕೂ ಹೆಚ್ಚು ಹೊಸ ಉದ್ಯೋಗಗಳು ಸೃಷ್ಟಿಯಾಗಿದ್ದು, ಇಂದು 1.95 ಕೋಟಿ ಕಾರ್ಮಿಕರು ಕಾರ್ಖಾನೆ ಉದ್ಯೋಗಗಳಲ್ಲಿ ತೊಡಗಿಕೊಂಡಿದ್ದಾರೆ.

‎

‎ಉದ್ಯೋಗ ವೃದ್ಧಿಗೆ ಭಾರತ ಸರ್ಕಾರದ ಕೈಗಾರಿಕಾ ನೀತಿಗಳು ಕಾರಣವೆಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. “ಮೇಕ್ ಇನ್ ಇಂಡಿಯಾ”, “ಆತ್ಮನಿರ್ಭರ ಭಾರತ” ಮತ್ತು ಉತ್ಪಾದನೆ ಆಧಾರಿತ ಪ್ರೋತ್ಸಾಹ (PLI) ಯೋಜನೆಗಳು ಉದ್ಯಮ ವಲಯಕ್ಕೆ ಹೊಸ ಚೈತನ್ಯ ತುಂಬಿವೆ.

‎

‎ಉತ್ಪಾದನಾ ಬೆಳವಣಿಗೆಯ ಪ್ರಮುಖ ಚಾಲಕರು ಲೋಹೋತ್ಪಾದನೆ, ವಾಹನೋತ್ಪಾದನೆ, ರಸಾಯನ ವಸ್ತುಗಳು, ಆಹಾರ ಉತ್ಪಾದನೆ ಮತ್ತು ಔಷಧೋತ್ಪಾದನೆ. ಈ ವಲಯಗಳಲ್ಲಿ ಹೂಡಿಕೆ ಏರಿಕೆಯಿಂದ GDPಗೂ ಬಲ ಸಿಕ್ಕಿದ್ದು ಹಾಗೂ ಹೊಸ ಉದ್ಯೋಗವಕಾಶಗಳು ಸೃಷ್ಟಿಯಾಗಿವೆ.

‎

‎ರಾಜ್ಯ ಮಟ್ಟದಲ್ಲೂ ಉತ್ಪಾದನಾ ವಲಯ ವೇಗ ಪಡೆದುಕೊಂಡಿದೆ. ತಮಿಳುನಾಡು, ಗುಜರಾತ್, ಮಹಾರಾಷ್ಟ್ರ, ಉತ್ತರ ಪ್ರದೇಶ ಮತ್ತು ಕರ್ನಾಟಕ ರಾಜ್ಯಗಳು ಹೂಡಿಕೆ ಆಕರ್ಷಣೆ ಹಾಗೂ ಉದ್ಯೋಗ ಸೃಷ್ಟಿಯಲ್ಲಿ ಮುಂಚೂಣಿಯಲ್ಲಿ ನಿಂತಿವೆ. ಈ ರಾಜ್ಯಗಳ ಸಾಧನೆಗೆ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಕಾರ್ಮಿಕ ಶಕ್ತಿ ಹಾಗೂ ಕೇಂದ್ರ ಸರ್ಕಾರದ ಸಮಗ್ರಾಭಿವೃದ್ಧಿ ದೃಷ್ಟಿಯ ಪ್ರತಿಫಲನವಾಗಿದೆ.

‎

‎GDPಯಲ್ಲಿ ಉತ್ಪಾದನೆಯ ಪಾಲು:

‎ಪ್ರಸ್ತುತ ಉತ್ಪಾದನಾ ವಲಯವು ಭಾರತದ GDPಯಲ್ಲಿ 17% ಪಾಲು ನೀಡುತ್ತಿದ್ದು, ಕೋವಿಡ್ ನಂತರದ ಆರ್ಥಿಕ ಪುನರುತ್ಥಾನದಲ್ಲಿ ಉತ್ಪಾದನಾ ವಲಯದ ಕೊಡುಗೆ ಮಹತ್ವದ್ದಾಗಿದೆ. ಕೈಗಾರಿಕಾ ವಿಸ್ತರಣೆ, ಹೂಡಿಕೆ ಪ್ರೋತ್ಸಾಹ, ಸ್ಥಳೀಯ ಉತ್ಪಾದನೆ ಹಾಗೂ ಸರ್ಕಾರದ ನೀತಿಗಳಿಂದ ಆರ್ಥಿಕತೆ ಮತ್ತಷ್ಟು ಬಲಿಷ್ಠವಾಗಿದೆ.

‎

‎FY24ರ ಸಾಧನೆಗಳು ಭಾರತವನ್ನು ಜಾಗತಿಕ ಉತ್ಪಾದನಾ ಕೇಂದ್ರವನ್ನಾಗಿ ರೂಪಿಸಿದೆ. ವಿದೇಶಿ ಹೂಡಿಕೆದಾರರು ಭಾರತವನ್ನು ಉತ್ಪಾದನಾ ಕೇಂದ್ರವೆಂದು ಪರಿಗಣಿಸುತ್ತಿದ್ದಾರೆ. ಉತ್ಪಾದನಾ ಸಾಮರ್ಥ್ಯ, ಕಾರ್ಮಿಕ ಶಕ್ತಿ ಹಾಗೂ ಮಾರುಕಟ್ಟೆ ವಿಸ್ತರಣೆ ಭಾರತವನ್ನು ಹೂಡಿಕೆ ಗುರಿಯನ್ನಾಗಿ ಮಾಡಿವೆ.ಇದು ಆರ್ಥಿಕ ಭವಿಷ್ಯಕ್ಕೆ ಭರವಸೆ ನೀಡುತ್ತಿದೆ.

‎

‎“ಮೇಕ್ ಇನ್ ಇಂಡಿಯಾ” ಅಭಿಯಾನ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷೆಯ ಯೋಜನೆ. FY24ರ ಸಾಧನೆಗಳು ಈ ಗುರಿಯನ್ನು ಬಲಪಡಿಸುತ್ತಿದ್ದು, 2025 ಮುಗಿಯುವುದರೊಳಗೆ ಉತ್ಪಾದನಾ ವಲಯದಿಂದ GDPಯಲ್ಲಿ 25% ಹಂಚಿಕೆ ತಲುಪಿಸುವ ಗುರಿಯತ್ತ ಭಾರತ ವೇಗವಾಗಿ ಸಾಗುತ್ತಿದೆ.

‎

‎ಭಾರತ ಸರ್ಕಾರದ ಯೋಜನೆಗಳು, ಉದ್ಯೋಗ ಸೃಷ್ಟಿ, ಆರ್ಥಿಕ ಪುನರುತ್ಥಾನ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಯಲ್ಲಿ ಭಾರತ ಸಾಧಿಸಿರುವ ಹೆಜ್ಜೆಗಳು ಇವೆಲ್ಲವೂ ಭಾರತವನ್ನು ಜಾಗತಿಕ ಕೈಗಾರಿಕಾ ಶಕ್ತಿ ಕೇಂದ್ರವನ್ನಾಗಿ ರೂಪಿಸುತ್ತಿವೆ.

‎

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa