ನವದೆಹಲಿ, 21 ಸೆಪ್ಟೆಂಬರ್ (ಹಿ.ಸ.):

ಆ್ಯಂಕರ್:ವಿದೇಶಿ ಬೆದರಿಕೆಗೆ ಎದುರಾಗಿ ಒಂದಾಗುವ ಬದಲು, ವಿರೋಧ ಪಕ್ಷಗಳು ಪ್ರಧಾನಿ ನರೇಂದ್ರ ಮೋದಿಯವರನ್ನೇ ಗುರಿಯಾಗಿಸಿಕೊಂಡಿವೆ ಎಂದು ಮಾಜಿ ವಿದೇಶಾಂಗ ಕಾರ್ಯದರ್ಶಿ ಕನ್ವಾಲ್ ಸಿಬಲ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತವು ಎಚ್೧ಬಿ ವೀಸಾ ಶುಲ್ಕ ಹೆಚ್ಚಿಸಿದ್ದನ್ನು ಖಂಡಿಸಿ ಅವರು ಪ್ರತಿಕ್ರಿಯೆ ನೀಡಿದರು. “ಹೆಚ್ಚಿನ ಫಲಾನುಭವಿಗಳು ಭಾರತೀಯರು, ಅವರು ಅಮೆರಿಕನ್ ಕಂಪನಿಗಳಲ್ಲಿನ ವೃತ್ತಿಪರ ಕೊರತೆಯನ್ನು ತುಂಬುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಪ್ರಧಾನಿ ಮೋದಿಯವರನ್ನು ದೂಷಿಸುವುದು ನಮ್ಮ ಪ್ರತಿರೋಧವನ್ನು ದುರ್ಬಲಗೊಳಿಸುತ್ತದೆ” ಎಂದು ಸಿಬಲ್ ಅಭಿಪ್ರಾಯಪಟ್ಟರು.

ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರು ಸಿಬಲ್ ಅವರನ್ನು ಶ್ಲಾಘಿಸಿ, “ಅವರು ಬೌದ್ಧಿಕ, ಚಿಂತನಶೀಲ ಹಾಗೂ ತೀಕ್ಷ್ಣ ದೃಷ್ಟಿಕೋನ ಹೊಂದಿದ ರಾಜತಾಂತ್ರಿಕರು. ರಾಷ್ಟ್ರೀಯ ಹಿತಾಸಕ್ತಿಗಳ ವಿಷಯದಲ್ಲಿ ಎಲ್ಲರೂ ಒಗ್ಗಟ್ಟಿನಿಂದ ಮಾತನಾಡಬೇಕು” ಎಂದು ಹೇಳಿದರು.

ಇದಕ್ಕೆ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ತಿರುಗೇಟು ನೀಡಿ, “ವಿದೇಶಾಂಗ ನೀತಿಯು ಕೇವಲ ಘೋಷಣೆಗಳು, ಸಂಗೀತ ಕಚೇರಿಗಳು ಅಥವಾ ‘ಮೋದಿ, ಮೋದಿ’ ಘೋಷಣೆಗಳಲ್ಲ. ಅದು ರಾಷ್ಟ್ರಹಿತವನ್ನು ರಕ್ಷಿಸುವುದು, ವಿವೇಕದಿಂದ ಸ್ನೇಹವನ್ನು ಕಾಪಾಡಿಕೊಳ್ಳುವುದು” ಎಂದು ವಾಗ್ದಾಳಿ ನಡೆಸಿದರು.

ಟ್ರಂಪ್ ಅವರ ನಡೆ ಎಲ್ಲರ ಮೇಲೂ ಕಠಿಣವಾಗಿದೆ ಎಂದು ಸಿಬಲ್ ಸ್ಪಷ್ಟಪಡಿಸಿ, “ಯುರೋಪ್, ಜಪಾನ್, ದಕ್ಷಿಣ ಕೊರಿಯಾ, ಕೆನಡಾ, ಮೆಕ್ಸಿಕೊ — ಎಲ್ಲರನ್ನೂ ಅವರು ಅವಮಾನಿಸಿದ್ದಾರೆ. ಭಾರತವು ಪಾಕಿಸ್ತಾನದಂತೆ ವ್ಯವಹಾರ ಒಪ್ಪಂದಗಳಿಂದ ಮೆಚ್ಚುಗೆಯನ್ನು ಪಡೆಯಲು ಯತ್ನಿಸಿಲ್ಲ. ಅಂತರರಾಷ್ಟ್ರೀಯ ಸವಾಲುಗಳನ್ನು ದೇಶೀಯ ರಾಜಕೀಯಕ್ಕಾಗಿ ಬಳಸುವುದು ತಪ್ಪು” ಎಂದು ಎಚ್ಚರಿಸಿದರು.

---------------

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa