ಲಕ್ನೋ, 19 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ಮುಂದಿನ ವಿಜಯದಶಮಿಯಿಂದ ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್‌ಎಸ್‌ಎಸ್) ತನ್ನ ಸ್ಥಾಪನೆಯ ಶತಮಾನೋತ್ಸವ ವರ್ಷವನ್ನು ಆಚರಿಸಲಿದ್ದು, ಇದರ ಅಂಗವಾಗಿ ವಿಶ್ವದ ಅತಿದೊಡ್ಡ ಮನೆ-ಮನೆ ಸಂಪರ್ಕ ಅಭಿಯಾನ ಆರಂಭವಾಗಲಿದೆ.

ನವೆಂಬರ್ 20ರಿಂದ ಡಿಸೆಂಬರ್ 21ರವರೆಗೆ ನಡೆಯಲಿರುವ ಈ ಅಭಿಯಾನದಲ್ಲಿ ಸಂಘದ ಸುಮಾರು 20 ಲಕ್ಷ ಸ್ವಯಂಸೇವಕರು ದೇಶದ ಆರು ಲಕ್ಷ ಹಳ್ಳಿಗಳಲ್ಲಿನ 20 ಕೋಟಿಗೂ ಹೆಚ್ಚು ಕುಟುಂಬಗಳನ್ನು ಸಂಪರ್ಕಿಸಲಿದ್ದಾರೆ.

ಉತ್ತರ ಪ್ರದೇಶದಲ್ಲೇ 2.5 ಕೋಟಿಗೂ ಹೆಚ್ಚು ಮನೆಗಳನ್ನು ತಲುಪುವ ಗುರಿ ಹೊಂದಲಾಗಿದೆ. ಪ್ರತಿ ಮನೆಯಲ್ಲಿ ಭಾರತ ಮಾತೆಯ ಚಿತ್ರ, ಕರಪತ್ರಗಳು ಹಾಗೂ ಸಂಘದ ಸಾಹಿತ್ಯವನ್ನು ವಿತರಿಸಲಾಗುವುದು.

ಬ್ರಜ್ ಪ್ರಾಂತ್ಯದಲ್ಲಿ 45 ಲಕ್ಷ ಮನೆಗಳು, ಮೀರಟ್ ಪ್ರಾಂತ್ಯದಲ್ಲಿ 46 ಲಕ್ಷ ಮನೆಗಳು, ಕಾಶಿ ಮತ್ತು ಅವಧ್ ಪ್ರಾಂತ್ಯಗಳಲ್ಲಿ ತಲಾ 40 ಲಕ್ಷ ಮನೆಗಳನ್ನು ಸಂಪರ್ಕಿಸಲು ಯೋಜಿಸಲಾಗಿದೆ. ಕಾಶಿ ಪ್ರಾಂತ್ಯದ 15 ಸಾವಿರ ಹಳ್ಳಿಗಳ 40 ಲಕ್ಷ ಕುಟುಂಬಗಳು ಹಾಗೂ ಅವಧ್ ಪ್ರಾಂತ್ಯದಲ್ಲಿ 6.5 ಮಿಲಿಯನ್ ಪುಸ್ತಕಗಳ ಮುದ್ರಣದೊಂದಿಗೆ ಪ್ರಚಾರ ಕಾರ್ಯ ನಡೆಯಲಿದೆ.

ಶತಮಾನೋತ್ಸವ ಆಚರಣೆಯ ಅಂಗವಾಗಿ ಅಕ್ಟೋಬರ್ 2ರಿಂದ 12ರವರೆಗೆ ಮಹಾನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿ ಪಥಸಂಚಲನಗಳು ನಡೆಯಲಿದ್ದು, ಜನವರಿ 2026ರಲ್ಲಿ ಹಳ್ಳಿ ಹಾಗೂ ನಗರ ಮಟ್ಟದಲ್ಲಿ ಹಿಂದೂ ಸಮ್ಮೇಳನಗಳನ್ನು ಆಯೋಜಿಸಲಾಗುವುದು.

ವಿಜಯದಶಮಿ ದಿನದಂದು ಎಲ್ಲ ಸ್ವಯಂಸೇವಕರು ಪೂರ್ಣ ಸಮವಸ್ತ್ರದಲ್ಲಿ ಬೃಹತ್ ಮೆರವಣಿಗೆ ಹಾಗೂ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದ್ದಾರೆ.

ಈ ಮಹಾ ಅಭಿಯಾನದ ಮೂಲಕ ಸಂಘವು ತನ್ನ ವಿಚಾರಧಾರೆ, ಉದ್ದೇಶಗಳು ಹಾಗೂ ಕಾರ್ಯಗಳನ್ನು ನೇರವಾಗಿ ಮನೆಮನೆಗೆ ತಲುಪಿಸುವ ಗುರಿ ಹೊಂದಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa