ನವದೆಹಲಿ, 15 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ಭಾರತೀಯ ನೌಕಾಪಡೆಯ ಸ್ಥಳೀಯವಾಗಿ ವಿನ್ಯಾಸಗೊಳಿಸಿ ನಿರ್ಮಿಸಲಾದ ಹೊಸ ಡೈವಿಂಗ್ ಬೆಂಬಲ ಹಡಗು ಐಎನ್ಎಸ್ ನಿಸ್ತಾರ್ ಮೊದಲ ಬಾರಿಗೆ ಸಿಂಗಾಪುರದ ಚಾಂಗಿ ನೌಕಾ ನೆಲೆಗೆ ಆಗಮಿಸಿದೆ.

ಇದು ಪೂರ್ವ ನೌಕಾ ದಳದ ನಿಯಂತ್ರಣದಲ್ಲಿ ನಡೆಯುವ ಬಹುರಾಷ್ಟ್ರೀಯ ಪೆಸಿಫಿಕ್ ಪ್ರದೇಶ ವ್ಯಾಯಾಮದಲ್ಲಿ ಭಾಗವಹಿಸಲಿದ್ದು, 40 ಕ್ಕೂ ಹೆಚ್ಚು ದೇಶಗಳು ಈ ಅಭ್ಯಾಸದಲ್ಲಿ ಸಕ್ರಿಯ ಸದಸ್ಯರಾಗಿ ಭಾಗಿಯಾಗಲಿವೆ.

ನೌಕಾಪಡೆಯ ವಕ್ತಾರ ಕ್ಯಾಪ್ಟನ್ ವಿವೇಕ್ ಮಧ್ವಾಲ್ ಅವರ ಮಾಹಿತಿಯಂತೆ, ಬಂದರು ಹಂತದಲ್ಲಿ ಜಲಾಂತರ್ಗಾಮಿ ರಕ್ಷಣಾ ಚರ್ಚೆಗಳು, ತಜ್ಞರ ವಿನಿಮಯ, ವೈದ್ಯಕೀಯ ಸಮ್ಮೇಳನ ಹಾಗೂ ಕ್ರಾಸ್-ಡೆಕ್ ಭೇಟಿಗಳು ನಡೆಯಲಿವೆ. ನಂತರದ ಸಮುದ್ರ ಹಂತದಲ್ಲಿ ನಿಸ್ತಾರ್ ಮತ್ತು ಜಲಾಂತರ್ಗಾಮಿ ರಕ್ಷಣಾ ಘಟಕ (ಪೂರ್ವ) ದಕ್ಷಿಣ ಚೀನಾ ಸಮುದ್ರದಲ್ಲಿ ಬಹು ಹಸ್ತಕ್ಷೇಪ ಮತ್ತು ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಭಾಗವಹಿಸಲಿವೆ.

ಜುಲೈ 18ರಂದು ನೌಕಾಪಡೆಯಲ್ಲಿ ಸೇರಿಸಲ್ಪಟ್ಟ ಐಎನ್ಎಸ್ ನಿಸ್ತಾರ್ ವಿಶಾಖಪಟ್ಟಣಂನ ಹಿಂದೂಸ್ತಾನ್ ಶಿಪ್‌ಯಾರ್ಡ್ ಲಿಮಿಟೆಡ್‌ನಲ್ಲಿ ನಿರ್ಮಿತವಾಗಿದ್ದು, ‘ಆತ್ಮನಿರ್ಭರ ಭಾರತ’ ಅಭಿಯಾನದ ಮಹತ್ವದ ಸಾಧನೆಯಾಗಿದೆ. 118.4 ಮೀಟರ್ ಉದ್ದ, 22.8 ಮೀಟರ್ ಅಗಲ ಹಾಗೂ 9,350 ಟನ್ ತೂಕ ಹೊಂದಿರುವ ಈ ಹಡಗು ಆಳ ಸಮುದ್ರ ಡೈವಿಂಗ್ ಕಾರ್ಯಾಚರಣೆ, ಜಲಾಂತರ್ಗಾಮಿ ರಕ್ಷಣಾ ಮಿಷನ್, ಗಸ್ತು ಹಾಗೂ ಹುಡುಕಾಟ-ರಕ್ಷಣಾ ಕಾರ್ಯಾಚರಣೆಗಳನ್ನು ನಡೆಸಲು ಸಮರ್ಥವಾಗಿದೆ. ಜೊತೆಗೆ, ಇದು ಡೀಪ್ ಸಬ್‌ಮರ್ಜೆನ್ಸ್ ರೆಸ್ಕ್ಯೂ ವೆಹಿಕಲ್ ಗಾಗಿ ಮಾತೃಶಿಪ್ ಆಗಿಯೂ ಕಾರ್ಯನಿರ್ವಹಿಸುತ್ತದೆ.

ಇದರಿಂದ ಭಾರತವು ಜಲಾಂತರ್ಗಾಮಿ ರಕ್ಷಣಾ ಸಾಮರ್ಥ್ಯ ಹೊಂದಿರುವ ಗಣ್ಯ ರಾಷ್ಟ್ರಗಳ ಸಾಲಿನಲ್ಲಿ ಸ್ಥಾನ ಪಡೆದಿದೆ ಎಂದು ನೌಕಾಪಡೆಯ ವಕ್ತಾರರು ತಿಳಿಸಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa