ನವದೆಹಲಿ, 27 ಡಿಸೆಂಬರ್ (ಹಿ.ಸ.) :

ಆ್ಯಂಕರ್ : ಮಾನವ ರೇಬೀಸ್ ವಿರೋಧಿ ಲಸಿಕೆ ಅಭಯ್ರಾಬ್ ಕುರಿತು ಇತ್ತೀಚೆಗೆ ಪ್ರಕಟವಾದ ವರದಿಗಳ ಬಗ್ಗೆ ಲಸಿಕೆ ತಯಾರಕ ಸಂಸ್ಥೆ ಇಂಡಿಯನ್ ಇಮ್ಯುನೊಲಾಜಿಕಲ್ಸ್ ಲಿಮಿಟೆಡ್ (IIL) ಶನಿವಾರ ಸ್ಪಷ್ಟೀಕರಣ ನೀಡಿದೆ.

ಆಸ್ಟ್ರೇಲಿಯಾದಿಂದ ಹೊರಡಿಸಲಾದ ಆರೋಗ್ಯ ಸಲಹೆಯನ್ನು “ಅತಿಯಾದ ಎಚ್ಚರಿಕೆಯ ಹಾಗೂ ದಾರಿತಪ್ಪಿಸುವಂತದ್ದು” ಎಂದು ಕಂಪನಿ ಬಲವಾಗಿ ತಿರಸ್ಕರಿಸಿದೆ.

ಅಭಯ್ರಾಬ್ ರೇಬೀಸ್ ಲಸಿಕೆಯ (ಬ್ಯಾಚ್ ಸಂಖ್ಯೆ KA24014, ಉತ್ಪಾದನಾ ದಿನಾಂಕ: ಮಾರ್ಚ್ 2024, ಮುಕ್ತಾಯ ದಿನಾಂಕ: ಫೆಬ್ರವರಿ 2027) ಸಂಬಂಧಿಸಿದ ನಕಲಿ ಲಸಿಕೆ ಘಟನೆಯನ್ನು ಜನವರಿ 2025ರ ಆರಂಭದಲ್ಲೇ ಪತ್ತೆ ಹಚ್ಚಲಾಗಿದೆ ಎಂದು ಐಐಎಲ್ ತಿಳಿಸಿದೆ. ಸಂಬಂಧಿತ ನಕಲಿ ಬ್ಯಾಚ್ ಇದೀಗ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲ ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ನಿರ್ದಿಷ್ಟ ಬ್ಯಾಚ್‌ನಲ್ಲಿ ಪ್ಯಾಕೇಜಿಂಗ್ ಸಂಬಂಧಿತ ದೋಷ ಪತ್ತೆಯಾದ ತಕ್ಷಣವೇ ಭಾರತೀಯ ಔಷಧ ನಿಯಂತ್ರಣ ಸಂಸ್ಥೆಗಳು ಹಾಗೂ ಕಾನೂನು ಜಾರಿ ಏಜೆನ್ಸಿಗಳಿಗೆ ಮಾಹಿತಿ ನೀಡಲಾಗಿದ್ದು, ಔಪಚಾರಿಕ ದೂರು ದಾಖಲಿಸಿ, ತ್ವರಿತ ಕ್ರಮಕ್ಕೆ ಸಂಬಂಧಿತ ಅಧಿಕಾರಿಗಳೊಂದಿಗೆ ನಿಕಟವಾಗಿ ಕೆಲಸ ಮಾಡಲಾಗಿದೆ ಎಂದು ಐಐಎಲ್ ಹೇಳಿದೆ. ಇದು ಒಂದು ಪ್ರತ್ಯೇಕ ಘಟನೆ ಆಗಿದ್ದು, ನಕಲಿ ಬ್ಯಾಚ್‌ನ್ನು ಈಗಾಗಲೇ ಮಾರುಕಟ್ಟೆಯಿಂದ ಹಿಂಪಡೆಯಲಾಗಿದೆ ಎಂದು ಕಂಪನಿ ಪುನರುಚ್ಚರಿಸಿದೆ.

ಆರೋಗ್ಯ ವೃತ್ತಿಪರರು ಮತ್ತು ಸಾರ್ವಜನಿಕರಿಗೆ ಭರವಸೆ ನೀಡಿದ ಐಐಎಲ್, ಭಾರತದಲ್ಲಿ ತಯಾರಾಗುವ ಪ್ರತಿಯೊಂದು ಲಸಿಕೆಯನ್ನು ಮಾರಾಟ ಅಥವಾ ಬಳಕೆಗೆ ಮುನ್ನ ಕೇಂದ್ರ ಔಷಧ ಪ್ರಯೋಗಾಲಯ (ಭಾರತ ಸರ್ಕಾರ) ಕಟ್ಟುನಿಟ್ಟಾಗಿ ಪರೀಕ್ಷಿಸಿ ಅನುಮೋದನೆ ನೀಡುತ್ತದೆ ಎಂದು ತಿಳಿಸಿದೆ.

ಈ ಕುರಿತು ಪ್ರತಿಕ್ರಿಯಿಸಿದ ಐಐಎಲ್‌ನ ಉಪಾಧ್ಯಕ್ಷ ಹಾಗೂ ಗುಣಮಟ್ಟ ನಿರ್ವಹಣಾ ಮುಖ್ಯಸ್ಥ ಸುನಿಲ್ ತಿವಾರಿ, “ಸರ್ಕಾರಿ ಸಂಸ್ಥೆಗಳು ಮತ್ತು ಅಧಿಕೃತ ವಿತರಕರ ಮೂಲಕ ಸರಬರಾಜು ಮಾಡಲಾಗುವ ಎಲ್ಲ ಲಸಿಕೆಗಳು ಸಂಪೂರ್ಣವಾಗಿ ಸುರಕ್ಷಿತವಾಗಿದ್ದು, ನಿಗದಿತ ಗುಣಮಟ್ಟ ಮಾನದಂಡಗಳಿಗೆ ಅನುಗುಣವಾಗಿವೆ” ಎಂದು ಹೇಳಿದ್ದಾರೆ.

ಗಮನಾರ್ಹವಾಗಿ, ಈ ವಾರದ ಆರಂಭದಲ್ಲಿ ಆಸ್ಟ್ರೇಲಿಯನ್ ಟೆಕ್ನಿಕಲ್ ಅಡ್ವೈಸರಿ ಗ್ರೂಪ್ ಆನ್ ಇಮ್ಯುನೈಸೇಶನ್ ಎಚ್ಚರಿಕೆ ಪ್ರಕಟಿಸಿ, ನವೆಂಬರ್ 1, 2023ರಿಂದ ಭಾರತದಲ್ಲಿ ಅಭಯ್ರಾಬ್ ಲಸಿಕೆಯ ನಕಲಿ ಬ್ಯಾಚ್‌ಗಳು ಚಲಾವಣೆಯಲ್ಲಿವೆ ಎಂದು ಹೇಳಿತ್ತು. ನವೆಂಬರ್ 1, 2023ರ ನಂತರ ಭಾರತದಲ್ಲಿ ಅಭಯ್ರಾಬ್ ಲಸಿಕೆಯನ್ನು ಪಡೆದ ಆಸ್ಟ್ರೇಲಿಯಾದ ಪ್ರಯಾಣಿಕರು ಆ ಲಸಿಕೆಯನ್ನು ಅಮಾನ್ಯವೆಂದು ಪರಿಗಣಿಸಿ ಹೊಸ ಲಸಿಕೆ ಕೋರ್ಸ್ ಆರಂಭಿಸಬೇಕು ಎಂಬ ಸಲಹೆಯನ್ನೂ ನೀಡಿತ್ತು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa