ನವದೆಹಲಿ, 16 ಡಿಸೆಂಬರ್ (ಹಿ.ಸ.) :
ಆ್ಯಂಕರ್ : ಲೋಕ ಸಭೆಯಲ್ಲಿ ಪ್ರತಿದಿನವೂ ಸದಸ್ಯರು ತಮ್ಮದೇ ಆದ ವಿಷಯಗಳಿಗೆ ಮುಂದೂಡಿಕೆ ಸೂಚನೆಗಳನ್ನು ಸಲ್ಲಿಸುವ ಪ್ರವೃತ್ತಿಗೆ ಲೋಕಸಭಾಧ್ಯಕ್ಷ ಓಂ ಬಿರ್ಲಾ ಮಂಗಳವಾರ ಅಸಮಾಧಾನ ವ್ಯಕ್ತಪಡಿಸಿದರು.
ಮುಂದೂಡಿಕೆ ಸೂಚನೆಗಳು ತುರ್ತು ಹಾಗೂ ಅತ್ಯಂತ ಗಂಭೀರ ವಿಷಯಗಳಿಗೆ ಮಾತ್ರ ಸೀಮಿತವಾಗಿರಬೇಕು ಎಂದು ಅವರು ಸ್ಪಷ್ಟಪಡಿಸಿದರು.
ಪ್ರಶ್ನೋತ್ತರ ಅವಧಿ ಬಳಿಕ ಮಾತನಾಡಿದ ಲೋಕಸಭಾಧ್ಯಕ್ಷ, ಮುಂದೂಡಿಕೆ ಸೂಚನೆಗಳನ್ನು ಸಲ್ಲಿಸಿದ್ದ ಹಲವು ಸದಸ್ಯರ ಹೆಸರನ್ನು ಉಲ್ಲೇಖಿಸಿ, ಅವುಗಳನ್ನು ತಿರಸ್ಕರಿಸಿರುವುದಾಗಿ ಘೋಷಿಸಿದರು.
ಕೆಲವರು ಪ್ರತಿದಿನವೂ ತಮ್ಮದೇ ಆದ ವಿಷಯಗಳಿಗೆ ಸಂಬಂಧಿಸಿದ ಮುಂದೂಡಿಕೆ ಸೂಚನೆಗಳನ್ನು ನೀಡುತ್ತಿರುವುದನ್ನು ಅವರು ಗಮನಕ್ಕೆ ತಂದರು. ಈ ಹಿನ್ನೆಲೆಯಲ್ಲಿ, ಅಂಥ ಸದಸ್ಯರ ಹೆಸರುಗಳನ್ನು ಸದನದಲ್ಲಿ ಉಲ್ಲೇಖಿಸುವ ಅಗತ್ಯ ಬಿದ್ದಿದೆ ಎಂದು ಹೇಳಿದರು.
“ಮುಂದೂಡಿಕೆ ಸೂಚನೆಗಳು ತುರ್ತು ಮತ್ತು ಅತ್ಯಂತ ಮಹತ್ವದ ವಿಷಯಗಳಿಗೆ ಮಾತ್ರ ಇರಬೇಕು. ಈ ನಿಯಮವನ್ನು ಸದಸ್ಯರು ಪಾಲಿಸಿದಲ್ಲಿ, ಅವರ ಹೆಸರನ್ನು ಉಲ್ಲೇಖಿಸುವ ಪರಿಸ್ಥಿತಿ ಬರದು,” ಎಂದು ಲೋಕಸಭಾಧ್ಯಕ್ಷ ಓಂ ಬಿರ್ಲಾ ಸದಸ್ಯರಿಗೆ ಸಲಹೆ ನೀಡಿದರು.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
