ನವದೆಹಲಿ, 13 ನವೆಂಬರ್ (ಹಿ.ಸ.) :
ಆ್ಯಂಕರ್ : ದೆಹಲಿ ಸಾರಿಗೆ ನಿಗಮದ ಮಹಾರಾಣಾ ಪ್ರತಾಪ್ (ಕಾಶ್ಮೀರ ಗೇಟ್) ಐಎಸ್‌ಬಿಟಿಯಿಂದ ಹರಿಯಾಣದ ಸೋನಿಪತ್‌ಗೆ ಹೊಸ ಎಲೆಕ್ಟ್ರಿಕ್ ಬಸ್ ಸೇವೆಗೆ ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ ಚಾಲನೆ ನೀಡಿದರು.
ದೆಹಲಿಯಿಂದ ಸೋನಿಪತ್‌ಗೆ ಅಂತರರಾಜ್ಯ ಬಸ್ ಸೇವೆಗಳ ಆರಂಭವು ಸಾರ್ವಜನಿಕ ಅನುಕೂಲತೆ ಮತ್ತು ಹಸಿರು ಸಾರಿಗೆಯತ್ತ ಸರ್ಕಾರದ ಬದ್ಧತೆಯ ಸಂಕೇತವಾಗಿದೆ. ಈ ಪರಿಸರ ಸ್ನೇಹಿ ಇವಿ ಬಸ್‌ಗಳು ಪ್ರಯಾಣವನ್ನು ಹೆಚ್ಚು ಆರಾಮದಾಯಕ, ವೇಗದ ಮತ್ತು ವಿಶ್ವಾಸಾರ್ಹವಾಗಿಸುತ್ತದೆ ಎಂದು ರೇಖಾ ಗುಪ್ತಾ ಹೇಳಿದರು.
ಹಿಂದೆ ದೆಹಲಿ ಮತ್ತು ನೆರೆಯ ರಾಜ್ಯಗಳ ನಡುವೆ ಬಸ್ ಸೇವೆಗಳು ನಿಂತಿದ್ದರೂ, ಈಗ ಅವುಗಳನ್ನು ಹಂತ ಹಂತವಾಗಿ ಪುನಃಸ್ಥಾಪಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು. ಸೆಪ್ಟೆಂಬರ್‌ನಲ್ಲಿ ಉತ್ತರ ಪ್ರದೇಶದ ಬರೌತ್‌ಗೆ ಪ್ರಾರಂಭಿಸಿದ ಇ-ಬಸ್ ಸೇವೆಯ ನಂತರ, ದೆಹಲಿ–ಸೋನಿಪತ್ ಮಾರ್ಗದ ಸೇವೆ ಮತ್ತೊಂದು ಹಸಿರು ಹೆಜ್ಜೆಯಾಗಿದೆ.
ದೆಹಲಿ ಸರ್ಕಾರವು ಡಿಟಿಸಿ ಫ್ಲೀಟ್‌ಗೆ ನಿರಂತರವಾಗಿ ಎಲೆಕ್ಟ್ರಿಕ್ ಬಸ್‌ಗಳನ್ನು ಸೇರಿಸುತ್ತಿದ್ದು, ರಾಜಧಾನಿಯ ಸಾರ್ವಜನಿಕ ಸಾರಿಗೆಯನ್ನು ಸಂಪೂರ್ಣವಾಗಿ ಹೊರಸೂಸುವಿಕೆ ಮುಕ್ತ ವ್ಯವಸ್ಥೆಯಾಗಿ ಪರಿವರ್ತಿಸುವ ಗುರಿ ಹೊಂದಿದೆ ಎಂದು ಗುಪ್ತಾ ಹೇಳಿದರು.
ಈ ಸಂದರ್ಭದಲ್ಲಿ ದೆಹಲಿ ಸಾರಿಗೆ ಸಚಿವ ಪಂಕಜ್ ಕುಮಾರ್ ಸಿಂಗ್ ಮತ್ತು ಇತರ ಅಧಿಕಾರಿಗಳು ಉಪಸ್ಥಿತರಿದ್ದರು.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
